បរធនបាលកិច្ច អាចជាឱកាសសម្អាតលុយកខ្វក់និងហិរញ្ញប្បទានភេរវកម្ម តែមន្ត្រីថាឃ្លាំមើលបានល្អ
បរធនបាលកិច្ចនៅកម្ពុជាបច្ចុប្បន្ន បានក្លាយជាការចាប់អារម្មណ៍ពីសំណាក់វិនិយោគិនបរទេស។ ក៏ប៉ុន្តែបរធនបាលកិច្ច មានជួបបញ្ហាប្រឈមមួយចំនួនទាក់ទងទៅនឹងការលាងលុយកខ្វក់ និងការទទួលហិរញ្ញប្បទានភេរវកម្មជាដើម។ នេះបើតាមការធ្វើបទបង្ហាញរបស់និយ័តករបរធនបាលកិច្ច នៅថ្ងៃព្រហស្បតិ៍នេះ។ ទោះយ៉ាងនេះក្តី និយ័តករបរធនបាលកិច្ច ក៏អះអាងថាបានឃ្លាំមើលលើបញ្ហាទាំងនេះយ៉ាងម៉ត់ចត់។
ចុះផ្សាយនៅថ្ងៃ៖
ស្តាប់ - ០២:១០
ស្របពេលដែលវិស័យបរធនបាលកិច្ចនៅកម្ពុជាកំពុងបន្តរីកចម្រើន បញ្ហាប្រឈមមួយចំនួនក៏កំពុងកើតមានឡើងនៅទន្ទឹមគ្នា។ តាមរយៈបទបង្ហាញរបស់មន្ត្រីនិយ័តករបរធនបាលកិច្ច បញ្ហាប្រឈមមួយចំនួននោះរួមជាអាទិ៍ ការយល់ដឹងជាសាធារណៈពីវិស័យបរធនបាលកិច្ចនិងច្បាប់ពាក់ព័ន្ធនៅមានកម្រិត អស្ថិរភាពហិរញ្ញវត្ថុនិងវិបត្តិកូវីដ១៩ កង្វះនូវបច្ចេកវិទ្យាព័ត៌មានវិទ្យាថ្មីៗ និងបញ្ហាប្រឈមទាក់ទងទៅនឹង ការលាងសម្អាតលុយកខ្វក់ រួមនឹងហិរញ្ញប្បទានភេរវកម្មជាដើម
កញ្ញា ឈាន សុខារី ប្រធាននាយកដ្ឋានកិច្ចការគតិយុត្ត និងអធិការកិច្ចនៃនិយ័តករបរធនបាលកិច្ច បានអះអាងថា ពាក់ព័ន្ធនឹងបញ្ហាលាងសម្អាតលុយកខ្វក់ និងការទទួលហិរញ្ញប្បទានភេរវកម្មជាដើមតាមរយៈយន្តការបរធនបាលកិច្ច ខាងនិយ័តករតែងតែឃ្លាំមើលជាប្រចាំ។
បើតាមកញ្ញា ឈាន សុខារី និយ័តករបរធនបាលកិច្ចតែងតែពិនិត្យលើប្រភពលុយនៃម្ចាស់ទ្រព្យ ថាស្របច្បាប់ឬមិនស្របច្បាប់ ទៅតាមលក្ខខណ្ឌបញ្ជីខ្មៅរបស់អង្គការសហប្រជាជាតិ។ បន្ថែមពីនេះ និយ័តករក៏សិក្សាលើអ្នកដែលទទួលទ្រព្យទាំងនោះ ថាជាអ្នកណាមុននឹងធ្វើបរធនបាលកិច្ចដូចគ្នា។ ហើយនិយ័តករក៏តែងតែជូនដំណឹងជាប្រចាំដល់អ្នកដែលផ្តល់សេវាបរធនបាលកិច្ច។
គួរបញ្ជាក់ថា បរធនបាលកិច្ចគឺជាកិច្ចការក្នុងការថែរក្សាទ្រព្យសម្បត្តិរបស់អ្នកដទៃ ដើម្បីប្រើប្រាស់ជាប្រយោជន៍នៃបុគ្គលឬសាធារណៈឬក្នុងវិស័យអ្វីមួយ។ នេះមានន័យថា បរធនបាលកិច្ច គឺជាដំណើរនៃការថែរក្សាប្រាក់ ទ្រព្យ មូលនិធិ ជាដើមរបស់ម្ចាស់ដើម ដែលគេហៅថា បរធនបានទាយក ដោយអ្នកផ្តល់សេវាកម្មគឺបរធានបាល មុននឹងសម្រេចផ្ទេរប្រាក់ ឬមូលនិធិទាំងនោះទៅកាន់បុគ្គល សាធារណៈ ឬក្នុងវិស័យអភិវឌ្ឍន៍អ្វីមួយ ដែលត្រូវបានហៅថា អត្តគាហកៈ ស្របទៅបទបញ្ញត្តិ និងខ្លឹមសារដែលមានចែង។ នេះបើតាមការពន្យល់របស់និយ័តករបរធនបាលកិច្ច។
បើតាម លោក សុខ ដារ៉ា អគ្គនាយកនៃនិយ័តករបរធនបាលកិច្ច វិស័យមួយនេះបានចាប់ផ្តើមឡើងនៅឆ្នាំ២០០៨ ហើយផ្តើមមានសន្ទុះខ្លាំងនៅឆ្នាំ២០២០។ រហូតមកដល់ខែមីនាឆ្នាំ២០២៣ បរធនបាលកិច្ចដែលបានចុះបញ្ជីនៅនិយ័តករមានចំនួន១៧ គិតជាទឹកប្រាក់ចំនួន២៥៦លានដុល្លារអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ