អ្នកសេដ្ឋកិច្ច៖ តំបន់សាងសង់អាកាសយន្តដ្ឋានអន្តរជាតិថ្មីខេត្តសៀមរាប នឹងប្រែជាទីក្រុងពាណិជ្ជកម្មនាពេលអនាគត
រដ្ឋាភិបាលកម្ពុជារំពឹងថា ទីតាំងជុំវិញអាកាសយានដ្ឋានអន្តរជាតិថ្មីខេត្តសៀមរាប នឹងប្រែទៅជាកូនទីក្រុងអភិវឌ្ឍន៍ពាណិជ្ជកម្មដ៏រីកចម្រើនមួយនាពេលអនាគត។ ភាពរីកចម្រើនក៏ដោយសារ លំហូរការវិនិយោគ ពាណិជ្ជកម្ម វិស័យទេសចរណ៍នឹងផុសឡើងនៅតំបន់នេះច្រើន។ ក្នុងនោះ អ្នកជំនាញផ្នែកសេដ្ឋកិច្ច និងទេសចរណ៍មួយចំនួន ក៏បង្ហាញការយល់ឃើញដែរថា តាមរយៈការវិនិយោគសាងសង់អាកាសយានដ្ឋានថ្មីនេះ សន្ទុះអ្នកវិនិយោគិននឹងមានការចាប់អារម្មណ៍ខ្ពស់ ជាពិសេសអាចស្រូបទាញកំណើនភ្ញៀវទេសចរ ដែលចំណុចទាំងនេះនឹងជំរុញទីតាំងសាងសង់អាកាសយានដ្ឋានខាងលើឱ្យទៅជាតំបន់ពាណិជ្ជកម្មដ៏រស់រវើកមួយបន្ថែមទៀតរបស់ខេត្តសៀមរាប។
ចុះផ្សាយនៅថ្ងៃ៖
ស្តាប់ - ០២:១២
ក្នុងពិធីចុះពិនិត្យដំណើរការសាងសង់អាកាសយានដ្ឋានអន្តរជាតិថ្មីខេត្តសៀមរាប លោក តឹករ៉េត សំរេច រដ្ឋលេខាធិការទីស្តីការគណៈរដ្ឋមន្ត្រីបានបញ្ជាក់យ៉ាងច្បាស់ថា ទីតាំងជុំវិញអាកាសយានដ្ឋានអន្តរជាតិ នឹងប្រែក្លាយទៅជាទីក្រុងរណប ពាណិជ្ជកម្ម ទេសចរណ៍ដ៏សម្បូរបែបមួយថ្មីបន្ថែមទៀតរបស់ខេត្តសៀមរាបនាពេលអនាគត។ ខណៈបច្ចុប្បន្នក្រុមហ៊ុនសាងសង់អាកាសយានដ្ឋានផ្ទាល់ ក៏មានគម្រោងពាណិជ្ជកម្មនៅក្បែរតំបន់ខាងលើនេះផងដែរ។ លោក សំរេច បន្តថា គម្រោងខាងលើនេះ ក៏នឹងអាចស្រូបទាញចំនួនអ្នកវិនិយោគិនក្នុងស្រុក និងបរទេសបានច្រើន ជាពិសេសការពង្រើកវិស័យពាណិជ្ជកម្ម ទេសចរណ៍របស់ខេត្ត។
ទាក់ទិននឹងរឿនេះ លោកបណ្ឌិត ហុង វណ្ណៈ អ្នកជំនាញផ្នែកសេដ្ឋកិច្ចមកពីរាជបណ្ឌិតសភាកម្ពុជាក៏បានអះអាងថា នេះជាការវិនិយោគដែលផ្តល់ផលចំណេញខ្ពស់ដល់សេដ្ឋកិច្ចជាតិ ខណៈលោកបណ្ឌិតកត់សម្គាល់ថា ប្រជាពលរដ្ឋដែលរស់នៅជុំវិញតំបន់សាងសង់ខាងលើនឹងមានជីវភាពរីកចម្រើនឡើង ហើយការធ្វើពាណិជ្ជកម្មនៅតំបន់នោះទៀតសោធ នឹងកាន់តែមមាញឹកថែមទៀត។ បើតាមលោកបណ្ឌិត ហុង វណ្ណៈ ការសាងសង់អាកាសយានដ្ឋានអន្តរជាតិថ្មីនេះ ប្រៀបបានទៅនឹងការបោះទុនដើម្បីយកផលចំណេញមកជំរុញកំណើនសេដ្ឋកិច្ចជាតិដូចគ្នាអញ្ចឹងដែរ។
ដោយឡែក ពីជ្រុងទេសចរណ៍វិញ លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជាបានបញ្ជាក់ថា ខេត្តសៀមរាបជាគោលដៅទេសចរណ៍ធំស្រាប់ទៅហើយរបស់កម្ពុជា។ ក៏ប៉ុន្តែ នេះជាវឌ្ឍនភាព និងឱកាសមួយថ្មីបន្ថែមទៀតរបស់ខេត្តសៀមរាប ក្នុងការទាក់ទាញភ្ញៀវទេសចរបរទេសដែលមានបំណងចង់មកទស្សនាកម្សាន្ត។ លោកស្រីរំពឹងថា វិស័យទេសចរណ៍ក្នុងខេត្តសៀមរាបនឹងកាន់តែរីកចម្រើន ក៏ព្រោះថាពួកគេអាចហោះត្រង់មកខេត្តបានដោយមិនបាច់ចំណាយពេលវេលាច្រើននោះទេ។
សូមជម្រាបថា អាកាសយានដ្ឋានអន្តរជាតិថ្មីខេត្តសៀមរាប គឺជាការវិនិយោគដោយក្រុមហ៊ុនចិន ក្រោមទុនប្រមាណ ៨៨០លានដុល្លារ និងសាងសង់លើផ្ទៃដីប្រមាណ៧០០ហិកតា ស្ថិតនៅក្នុងភូមិក្រៀលពង ឃុំពពេល និងភូមិប្រវ៉ាល ឃុំតាយ៉ែក ស្រុកសូទ្រនិគម ខេត្តសៀមរាប។ ក្នុងនោះ អាកាសយានដ្ឋានខាងលើនេះ មានចំណតយន្តហោះរហូតដល់ទៅ៣៨ និងមានសមត្ថភាពទទួលអ្នកដំណើរបានប្រមាណ ៧លាននាក់ក្នុងមួយឆ្នាំក្នុងដំណាក់កាលទី១។ ដោយឡែកដំណាក់កាលទី២ អាចទទួលអ្នកដំណើរដល់ ១០លាននាក់ក្នុងមួយឆ្នាំ និងដំណាក់កាលទី៣ អាចទទួលអ្នកដំណើរបានរហូតដល់ ២០លាននាក់នៅក្នុងមួយឆ្នាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ