ក្រសួងរ៉ែថា ដំណើរការបូមប្រេងនឹងបន្តឡើងវិញ ក្រោយក្រុមហ៊ុនពីប្រទេសចំនួន៥ កំពុងសិក្សាអំពីលទ្ធភាព
ក្រសួងរ៉ែ និងថាមពលបានអះអាងថា បច្ចុប្បន្នមានក្រុមហ៊ុនមកពីបណ្តាប្រទេសចំនួន៥ កំពុងចាប់អារម្មណ៍ និងសម្លឹងមើលអំពីលទ្ធភាពជីករុករកប្រេង និងឧស្ម័ននៅកម្ពុជា។ ការចូលមកនៃក្រុមហ៊ុនថ្មីទាំងអស់នេះ ធ្វើឡើងបន្ទាប់ពីដំណើរការរុករកប្រេងនៅកម្ពុជាត្រូវស្ងាត់សូន្យឈឹងអស់រយៈពេលជាង១ឆ្នាំ ក្រោយក្រុមហ៊ុនរុករកប្រេងរបស់សឹង្ហបុរីKrisEnergy បានប្រកាសក្ស័យធន់មក។ បើតាម លោក ចៀប សួរ អគ្គនាយកនៃអគ្គនាយកដ្ឋានប្រេងកាត វត្តមាននៃក្រុមហ៊ុនទាំងអស់នេះ ជាក្តីសង្ឃឹមថ្មីរបស់កម្ពុជាក្នុងការបន្តប្រតិបត្តិការបូមប្រេងឡើងវិញ។
ចុះផ្សាយនៅថ្ងៃ៖
ស្តាប់ - ០២:១៨
ក្រោយក្រុមហ៊ុនបូមប្រេងរបស់សឹង្ហបុរីKrisEnergy បានប្រកាសក្ស័យធន់កាលពីដើមខែមិថុនា ឆ្នាំ២០២១ អគ្គនាយកដ្ឋានប្រេងកាតនៃក្រសួងរ៉ែនិងថាមពលបានបញ្ជាក់ថា ឥឡូវនេះ ក្រុមហ៊ុនជាច្រើនមកពីបណ្តាប្រទេសចំនួន៥កំពុងចូលមកសិក្សាស្រាវជ្រាវអំពីលទ្ធភាពបូមប្រេងនិងឧស្ម័ននៅកម្ពុជា។ ខណៈការស្រាវជ្រាវនេះ គឺស្ថិតក្នុងជំហានដំបូងនៅឡើយ ដោយមិនទាន់ប្រាកដច្បាស់ថា នឹងមានក្រុមហ៊ុនប៉ុន្មានអាចទទួលសិទ្ធិបូមប្រេងនៅកម្ពុជាឡើយ។
ក៏ប៉ុន្តែចំពោះវត្តមាននៃក្រុមហ៊ុនទាំងអស់នេះ លោក ចៀប សួរ អគ្គនាយកនៃអគ្គនាយកដ្ឋានប្រេងកាតបានបញ្ជាក់ថា នេះជាក្តីសង្ឃឹមថ្មីមួយទៀតមកលើដំណើការបូមប្រេងនៅកម្ពុជា បន្ទាប់ពីប្រតិបត្តិការបូមប្រេងនេះត្រូវបានស្ងាត់សូន្យឈឹងអស់ជាយូរ។ លោក ចៀប សួរបន្តថា ទោះបីការបូមប្រេងរបស់កម្ពុជាលើកដំបូងត្រូវបានបរាជ័យក៏ដោយ តែសម្រាប់ប្រទេសកម្ពុជា គឺជាទីតាំងដ៏មានសក្តានុពលសម្រាប់ឱ្យអ្នកវិនិយោគិនបរទេស សម្លឹងមើលអំពីឱកាសនៃការបូមប្រេងនេះបាន។
ដោយឡែក ស្ថិតក្នុងស្ថានភាពតម្លៃប្រេងនៅលើពិភពលោកកំពុងកើនថ្លៃខ្ពស់ អគ្គនាយកនៃអគ្គនាយកដ្ឋានប្រេងកាតរូបនេះបានលើកឡើងថា អ្នកវិនិយោគិនតែងតែចាប់អារម្មណ៍ទៅលើប្រទេសដែលមានប្រភពផ្សេងដូចកម្ពុជានេះឯង។
សូមជម្រាបថា អគ្គនាយកដ្ឋានប្រេងកាតមិនទាន់បញ្ជាក់ឈ្មោះក្រុមហ៊ុននីមួយៗបាននោះទេ ក៏ប៉ុន្តែក្រុមហ៊ុនទាំងអស់នេះមកពីបណ្តាប្រទេសមួយចំនួនដូចជា៖ ប្រទេសថៃ កាណាដា ចិន ម៉ាឡេស៊ី និងកាហ្សាក់ស្តង់។
តែយ៉ាងណា គេនៅមិនទាន់ភ្លេចនោះទេ ជុំវិញសំណុំរឿងប្រេងឆៅជាង៣០ម៉ឺនបារ៉ែលដែលត្រូវបាននាវាMT Strovolos លួចដឹកចេញពីដែនទឹកកម្ពុជា។ បើតាម លោក ចៀប សួរ កម្ពុជានៅមិនទាន់ទទួលតម្រុយថា អាចទទួលបានប្រេងដែលជារបស់កម្ពុជាវិញនៅពេលណានោះទេ ខណៈកម្ពុជាផ្ទាល់កំពុងបន្តធ្វើការលើរឿងនេះជាប់ជាប្រចាំ ដើម្បីនាំយកប្រេងដែលកម្ពុជាបាត់មកវិញគ្រប់ចំនួន។
សូមរំឭកបន្តិចថា ប្រេងឆៅរបស់កម្ពុជាជាង៣០ម៉ឺនបារ៉ែល ត្រូវបានក្រុមហ៊ុនMT Strolovos លួចដឹកចេញពីដែនទឹកកម្ពុជា កាលពីថ្ងៃទី០៤ មិថុនា ឆ្នាំ២០២១។ ការលួចដឹកចេញនេះ ភាគីក្រុមហ៊ុននាវាដឹកប្រេងបានអះអាងថា ដោយសារក្រុមហ៊ុន KrisEnergy ដែលជាក្រុមហ៊ុនទទួលបានសិទ្ធិបូមប្រេងក្នុងប្លុកអេ រឺហៅថាប្លុកអប្សរារបស់កម្ពុជា មិនបានបង់ប្រាក់មកឱ្យខ្លួន ក្រោយក្រុមហ៊ុននេះប្រកាសក្ស័យធន់ ។ ក្រោយមក នាវាដឹកប្រេង ក៏ត្រូវបានអាជ្ញាធរឥណ្ឌូនេស៊ីចាប់បាន ហើយភាគីកម្ពុជាកំពុងរៀបចំនិតិវិធីបញ្ចូនប្រេងមកកម្ពុជាវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ