ពលករជាង១ពាន់នាក់ចាប់ផ្តើមត្រលប់ចូលស្រុកមុនពិធីបុណ្យចូលឆ្នាំប្រពៃណីខ្មែរ
ពលករខ្មែរដែលធ្វើការនៅប្រទេសថៃ ចាប់ផ្តើមត្រលប់ចូលមកប្រទេសកម្ពុជាវិញតាមច្រកព្រំដែនមួយចំនួន។ នេះបើតាមការអះអាងរបស់អាជ្ញាធរខេត្តប្រាប់វិទ្យុបារាំងអន្តរជាតិនៅថ្ងៃអាទិត្យនេះ។ បើតាមការបញ្ជាក់ យ៉ាងហោចណាស់មានពលករជាង១ពាន់នាក់ក្នុងមួយថ្ងៃ វិលចូលស្រុកវិញ ដើម្បីជួបជុំក្រុមគ្រួសារនាពិធីបុណ្យចូលឆ្នាំប្រពៃណីខ្មែរដែលជិតមកដល់។
ចុះផ្សាយនៅថ្ងៃ៖
ស្តាប់ - ០២:០៥
ពីខេត្តឧត្តរមានជ័យ លោក ឌី រ៉ាដូ អភិបាលរងខេត្ត បានបញ្ជាក់ប្រាប់វិទ្យុបារាំងអន្តរជាតិថា មួយសប្តាហ៍នេះចរន្តពលករត្រលប់ចូលមកកម្ពុជាតាមច្រកព្រំដែនអូរស្មាច់ មានចំនួនច្រើនគួរឲ្យកត់សម្គាល់ បើធៀបទៅនឹងមួយរយៈពេលមុន។ យ៉ាងហោចណាស់ មានពលករចន្លោះពី ៧០០ ទៅ ៨០០នាក់ ក្នុងមួយថ្ងៃ ខណៈថ្ងៃខ្លះ មានរហូតដល់ជាង១០០០ពាន់។
លំហូរពលករត្រលប់ចូលប្រទេសកម្ពុជានាពេលនេះ គឺដើម្បីជួបជុំក្រុមគ្រួសារនាឱកាសពិធីបុណ្យចូលឆ្នាំប្រពៃណីខ្មែរ ដែលនឹងត្រូវធ្វើឡើងនាថ្ងៃទី១៤មេសា។ បើតាម លោក ឌី រ៉ាដូ កន្លងមកមានពលករតែខ្ទង់ចន្លោះពី៥០០ទៅ៦០០នាក់ប៉ុណ្ណោះ ដែលត្រលប់ចូលកម្ពុជាតាមច្រកព្រំដែនអូរស្មាច់ជាប្រចាំ។
យ៉ាងណាមិញ អភិបាលរងរូបនេះ ក៏បានបញ្ជាក់ថា អាជ្ញាធរបានត្រួតពិនិត្យសុខភាពពលករយ៉ាងម៉ត់ចត់ ទោះបីជាមិនតម្រូវឲ្យធ្វើចត្តាឡីស័កដើម្បីបង្ការហានិភ័យកូវីដ១៩ក្តី។ បើតាមលោក ឌី រ៉ាដូ ប្រសិនបើពលករបានចាក់វ៉ាក់សាំងកូវីដ១៩នោះ មិនតម្រូវឲ្យធ្វើតេស្តនោះទេ តែប្រសិនបើមិនទាន់បានចាក់វ៉ាក់សាំង នោះអាជ្ញាធរនឹងតម្រូវឲ្យពលករទាំងនោះ ធ្វើតេស្តរកមេរោគកូវីដ១៩។
រីឯខេត្តបន្ទាយមានជ័យ តាមរយៈច្រកព្រំដែនអន្តរជាតិប៉ោយប៉ែតក៏មានពលករមួយចំនួនត្រលប់ចូលកម្ពុជាវិញដែរ។ តែបើតាមការអះអាងរបស់លោក ង៉ោ ម៉េងជ្រួន អភិបាលរងខេត្តបន្ទាយមានជ័យ ចំនួនពលករដែលត្រលប់ចូលមកកម្ពុជាមានក្នុងរង្វង់តិចតួចប៉ុណ្ណោះ។ លោកថា ជាប្រចាំមានពលករតែត្រឹមជាង១០០នាក់ប៉ុណ្ណោះ ដែលចូលមកកម្ពុជាវិញ តាមច្រកព្រំដែនអន្តរជាតិប៉ោយប៉ែត។
ទោះជាមិនតម្រូវឲ្យធ្វើតេស្តរហ័សលើពលករ ក៏ប៉ុន្តែលោក ង៉ោ ម៉េងជ្រួន បានអះអាងថា អាជ្ញាធរខេត្តបន្ទាយមានជ័យបានណែនាំជាប្រចាំអំពីវិធានការសុខាភិបាលដើម្បីបង្ការការឆ្លងជំងឺកូវីដ១៩។
គួរបញ្ជាក់ថា បច្ចុប្បន្ន ពលករខ្មែរដែលកំពុងធ្វើការនៅប្រទេសថៃ ទាំងមានឯកសារ និងមិនមានឯកសារ មានចន្លោះពី ១,៨លាននាក់ ទៅ ២លាននាក់។ ពួកគេទាំងនោះ កំពុងបំរើការងារនៅក្នុងវិស័យផ្សេងៗនៅក្នុងប្រទេសថៃ មានជាអាទិ៍ វិស័យសំណង់ ឧស្សាហកម្មម្ហូបអាហារ គ្រឿងអេឡិចត្រូនិក ឧស្សាហកម្មនេសាទ កសិកម្ម សេវាកម្ម និងអ្នកធ្វើការតាមផ្ទះ។ នេះបើតាមរបាយការណ៍របស់សង់ត្រាល់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ