ព្រឹត្តិការណ៍១៧មេសា៖អ្នកនយោបាយខ្មែររំឭកឡើងវិញពីមេរៀនដែលត្រូវជៀសវាង
ថ្ងៃនេះ កាលពី៤៧ឆ្នាំមុន គឺជាគ្រាដែលកម្ពុជាបានធ្លាក់ចូលទៅក្នុងភាពអន្តរាយ ដោយសារតែជម្លោះដណ្តើមអំណាចរវាងខ្មែរនិងខ្មែរ។ ការចាត់ទុក អ្នកដែលមានទស្សនៈផ្សេងឬអ្នកមាននិន្នាការនយោបាយផ្សេងជាសត្រូវ គឺបាននាំឲ្យរបបនោះ ឈានទៅដល់ការប្រល័យពូជសាសន៍ដែលសម្លាប់ប្រជាជនជិត ២លាននាក់ តែក្នុងរយៈពេល៣ឆ្នាំ៨ខែនិង២០ថ្ងៃ។ ឆ្លងកាត់បទពិសោធន៍ដ៍ជូរចត់នេះ អ្នកនយោបាយខ្មែរបច្ចុប្បន្ន ចាត់ទុកព្រឹត្តិការណ៍១៧មេសា ដែលខ្មែរក្រហមឡើងកាន់អំណាចថាជាមេរៀនដែលត្រូវតែជៀសវាង។
ចុះផ្សាយនៅថ្ងៃ៖
ស្តាប់ - ០២:០៨
ក្នុងឱកាសខួបទី៤៧ឆ្នាំដែលរបបខ្មែរក្រហម ឡើងកាន់អំណាចនៅកម្ពុជា តាមរយៈក្រុមអ្នកនយោបាយនៃគណបក្សកុម្មុយនិស្តនិយម លោក កឹម សុខា ប្រធានអតីតបក្សជំទាស់បានលើកឡើងថា ការឈានរករបបប្រល័យពូជសាសន៍នៃរបបអាវខ្មៅមួយនេះ ដោយសារ តែការចាត់ទុក អ្នកដែលមានទស្សនៈផ្សេង ឬ មាននិន្នាការនយោបាយផ្សេងជាសត្រូវ។
ដោយលើកពីឧទាហរណ៍ជាក់ស្តែង ដែលឪពុករបស់លោកដែលត្រូវបានពួកខ្មែរក្រហមចូលទៅចាប់ខ្លួនដល់ក្នុងផ្ទះយកទៅសម្លាប់ចោល ដោយគ្រាន់តែដឹងថាឪពុកលោកធ្លាប់ធ្វើជាមន្ត្រីរាជការពីមុន លោក កឹម សុខា យល់ច្បាស់ណាស់ថា សន្តិភាពពិតប្រាកដកើតមានឡើងតែពេលណាដែលសង្គមមួយ អាចទទួលយកបាននូវទស្សនៈខុសគ្នា មិនចាត់ទុកគ្នាជាសត្រូវ និងគោរពសិទ្ធិមូលដ្ឋានរបស់មនុស្សគ្រប់រូប និង គ្រប់និន្នាការ។
បើតាមអ្នកនយោបាយមកពីបក្សជំទាស់រូបនេះ ការកំចាត់ និងបំបាត់អ្នកដែលមានទស្សនៈផ្សេងអាចត្រឹមតែបង្កើតភាពស្ងប់ស្ងាត់បណ្តោះអាសន្នប៉ុណ្ណោះ។
ចំណែក គណបក្សប្រជាធិបតេយ្យមូលដ្ឋាន បានចាត់ទុកព្រឹត្តិការណ៍ ថ្ងៃទី១៧ខែមេសា ឆ្នាំ១៩៧៥ ថាជាមេរៀនរបស់នយោបាយខ្មែរក្នុងការដឹកនាំរដ្ឋដើម្បីកុំឲ្យដើរជាន់ប្រវត្តិសាស្ត្រ។
បើតាមគណបក្សដែលនៅក្រៅរដ្ឋាភិបាលនេះ ការប្រកួតប្រជែងដណ្តើមអំណាច តាមរយៈមធ្យោបាយសង្គ្រាម និងមធ្យោបាយហិង្សាផ្សេងៗទៀត ដែលជាលទ្ធផលមិនអាចនាំឱ្យខ្មែររស់បានសុខនោះឡើយ។ ដូចគ្នាដែរ ការប្រកួតប្រជែងនយោបាយ ដែលផ្តោតទៅលើការបណ្តុះឱ្យមានការស្អប់ គំនុំគុំគួន ធ្វើជាសត្រូវរវាងគ្នានិងគ្នាទៅវិញទៅមកក្នុងនាមជាខ្មែរ ចុងក្រោយបំផុតក៏នាំមកនូវគ្រោះមហន្តរាយដល់ប្រទេសជាតិ។
មួយវិញទៀតការធ្វើនយោបាយ ដោយពឹងពាក់ ឬជឿជាក់លើបរទេសពេក ដើម្បីយកឈ្នះគូប្រកួតប្រជែងខ្មែរគ្នាឯង វាមិនត្រឹមតែមិនបានជួយអ្វីដល់ជាតិខ្មែរខ្លួនឯងទេ ថែមទាំងរុញឱ្យប្រទេសខ្មែរ រងនូវការបំផ្លិចបំផ្លាញ និងងាយបាត់បង់ឯករាជ្យភាពនៃជាតិថែមទៀតផង។ នេះបើតាមគណបក្សដដែលនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ