សំណុំរឿងណាហ្គាវើលដ៍៖ក្រុមហ៊ុននិងតំណាងកម្មករគ្រោងជួបគ្នាថ្មីបន្ទាប់ពីជំនួបមុនៗគ្មានការវិវត្តន៍ទៅមុខ
តាមគម្រោងភាគីក្រុមហ៊ុនណាហ្គាវើលដ៍ និងតំណាងកូដករគ្រោងជួបគ្នាជាថ្មីទៀតនៅថ្ងៃទី២២មេសាខាងមុននេះ។ ជំនួបគ្រោងធ្វើនៅបីថ្ងៃខាងមុខទៀតជាជំនួបលើកទី៨ ដែលតំណាងកូដករសង្ឃឹម នឹងទទួលបានដំណោះស្រាយដើម្បីឈានទៅបញ្ចប់រឿងឲ្យបានឆាប់ ខណៈសំណុំរឿងនេះត្រូវបានចាត់ទុកថា ជាវិវាទរ៉ាំរៃ។
ចុះផ្សាយនៅថ្ងៃ៖
ស្តាប់ - ០២:០៣
គិតមកដល់ពេលនេះ សំណុំរឿងក្រុមហ៊ុនណាហ្គាវើល៍ និងតំណាងកូដករ នៅទ្រឹងមួយកន្លែងជាប់គាំងដោយមិនទាន់រកច្រកចេញឃើញនៅឡើយទេ ទោះជាភាគីទាំងពីរបានជួបគ្នាច្រើនលើកច្រើនសារហើយក៏ដោយ។ ផ្អែកតាមសក្ដីកម្មនានា ភាគីទាំងសង់ខាងប្រកាន់ជំហររឹងត្អឹងរៀងខ្លួនដោយមិនទាន់មានភាគីណាមួយព្រមដកថយមួយជំហ៊ាន។
ថ្លែងប្រាប់វិទ្យុបារាំងអន្តរជាតិនៅថ្ងៃទី១៩ខែមេសានេះកញ្ញា ឈឹម ស៊ីថរ សង្ឃឹមថា ជំនួបជាថ្មីនឹងមានច្រកចេញដោយក្រុមហ៊ុនព្រមទទួលកម្មករជាង២០០នាក់ចូលធ្វើការវិញ បើក្រុមហ៊ុនមិនទទួលយកសំណើរនេះទេ កញ្ញាស៊ីថរជឿជាក់ថា បញ្ហានឹងមិនត្រូវបានបញ្ចប់ឡើយ ហើយកម្មករជាង២០០នាក់នៅតែបន្តចុះផ្លូវធ្វើបាតុកម្មរហូតមានដំណោះស្រាយ ទោះជាត្រូវរងការទប់ស្កាត់ពីសំណាក់អាជ្ញាធរក៏ដោយ។
លោក មាស នី អ្នកស្រាវជ្រាវបញ្ហាសង្គមចាត់ទុកថា នេះជាបរាជ័យរបស់គូភាគីពាក់ព័ន្ធទាំងអស់ ព្រោះគ្មាននរណាដឹងឡើយថា នៅក្នុងជំនួបតទល់ម្ដងៗ តើភាគីណាមួយជាអ្នកដាក់សម្ពាធ ហើយភាគីណាមួយជាអ្នករងសម្ពាធនោះទេ។ សម្រាប់លោក មាស នី យល់ថា បើដំណោះស្រាយបន្តអូសបន្លាយភាគីទាំងសង់ខាងបាត់បង់ប្រយោជន៍ដូចគ្នា។ ជាក់ស្ដែង ភាគីក្រុមហ៊ុនរងការរិះគន់រំលោភសិទ្ធិកម្មករ ខណៈកម្មកររងការខាតបង់ខាតចំណូល។
នៅក្នុងសំណុំរឿងនេះ កន្លងមករដ្ឋាភិបាលកម្ពុជាបានធ្វើជាអាជ្ញាកណ្ដាលចេញមុខសម្របសម្រួលម្ដងរួចមកហើយ តាមរយៈសេចក្ដីថ្លែងការណ៍ចុះថ្ងៃទី១៥ ខែមីនា។ តាមរយៈសេចក្តីថ្លែងការណ៍របស់ខ្លួន កាលណោះរដ្ឋាភិបាល បានលើកឡើងថា ក្រុមហ៊ុន ណាហ្គាវើលដ៍ ត្រូវបានបង្ខំឱ្យកាត់បន្ថយបុគ្គលិករបស់ខ្លួន ប្រហែល ២៥% មកនៅត្រឹមជាង ៦០០០នាក់។ ក្នុងនោះកម្មករនិយោជិតចំនួន ៣៧៣នាក់ ដែលជាសមាជិកសហជីព បានជំទាស់នឹងគម្រោងកាត់បន្ថយបុគ្គលិក ហើយកំពុងទាមទារឱ្យក្រុមហ៊ុនទទួលយកខ្លួន និងអតីតបុគ្គលិកផ្សេងទៀតចូលធ្វើការវិញ រួមនឹងការ ទាមទារផ្សេងទៀត។
ប៉ុន្តែយ៉ាងណាមិញគិតមកដល់ពេលនេះ ក្នុងចំណោមកម្មករ៣៧៣នាក់មានកម្មករមួយចំនួនព្រមទូទាត់សំណងដើម្បីបញ្ចប់រឿងរួចទៅហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ