អ្នកដំណើរពីបរទេសដែលមិនទាន់បានចាក់វ៉ាក់សាំងកូវីដ៖ កម្ពុជាកាត់បន្ថយពេលធ្វើចត្តាឡីស័កពី១៤ថ្ងៃ មកត្រឹម៧ថ្ងៃ
ចាប់ពីថ្ងៃទី២១ខែមេសានេះតទៅ អ្នកដំណើរមកពីបរទេសចូលមកកាន់កម្ពុជាដែលមិនទាន់បានចាក់វ៉ាក់សាំងបង្ការជំងឺកូវីដ១៩ ឬមិនទាន់បានចាក់វ៉ាក់សាំងពេញលេញ លែងតម្រូវឲ្យធ្វើចត្តាឡីស័ករយៈពេលយូរ ដល់ទៅ១៤ថ្ងៃដូចមុនទៀតហើយ។ ការធ្វើចត្តាឡីស័កត្រូវកាត់បន្ថយពី១៤ថ្ងៃ មកត្រឹមតែ៧ថ្ងៃប៉ុណ្ណោះ។ នេះបើតាមការប្រកាសរបស់ក្រសួងសុខាភិបាល នៅថ្ងៃព្រហស្បតិ៍ ទី២១ ខែមេសានេះ។
ចុះផ្សាយនៅថ្ងៃ៖
ស្តាប់ - ០២:២៤
ជំនួសឲ្យការធ្វើចត្តាឡីស័ក១៤ថ្ងៃ អ្នកដំណើរពីបរទេសចូលមកកម្ពុជាដែលមិនទាន់បានចាក់វ៉ាក់សាំងបង្ការជំងឺកូវីដ១៩ ឬមិនទាន់បានចាក់វ៉ាក់សាំងពេញលេញ ត្រូវធ្វើចត្តាឡីស័ក ឬដាក់ខ្លួនឯងឲ្យនៅដាច់ដោយឡែក តែ៧ថ្ងៃប៉ុណ្ណោះ។ ការសម្រេចថ្មីនេះ មានសុពលភាពគ្របដណ្ដប់ទៅលើអ្នកដំណើរដែលចូលមកកម្ពុជា តាមផ្លូវអាកាស និងតាមព្រំដែនគោក។
សម្រាប់អ្នកដំណើរពីបរទេសចូលមកកម្ពុជាតាមផ្លូវអាកាស ក្រសួងសុខាភិបាលបញ្ជាក់ថា ពួកគេត្រូវធ្វើតេស្តរហ័សនៅថ្ងៃទី៧ ដើម្បីបញ្ចប់ការធ្វើចត្តាឡីស័ក។ ចំណែកអ្នកដំណើរចូលមកតាមព្រំដែនគោកវិញ ត្រូវធ្វើតេស្តរហ័សចំនួន២លើក៖ លើកទី១ នៅថ្ងៃទី១ មុនពេលចូលមណ្ឌលចត្តាឡីស័ក និងលើកទី២ នៅថ្ងៃទី៧ ដើម្បីបញ្ចប់ការធ្វើចត្តាឡីស័ក។
គួររំឭកថា កន្លងមក អ្នកដំណើរពីបរទេសដែលមិនទាន់បានចាក់វ៉ាក់សាំង ឬមិនទាន់បានចាក់វ៉ាក់សាំងពេញលេញ ត្រូវអនុវត្តរបបចត្តាឡីស័ករយៈពេល១៤ថ្ងៃ និងត្រូវធ្វើតេស្តដោយម៉ាស៊ីន PCR ពេលដាក់ជើងជាន់ទឹកដីកម្ពុជា។ រីឯអ្នកដំណើរដែលបានចាក់វ៉ាក់សាំងរួចរាល់ មិនតម្រូវឲ្យធ្វើចត្តាឡីស័កឡើយ ដោយគ្រាន់តែយកសំណាករកមេរោគកូវីដ១៩ ដោយឧបករណ៍តេស្តរហ័សពេលមកដល់តែប៉ុណ្ណោះ។
ដោយឡែក ភ្ជាប់នឹងការសម្រេចថ្មី កាត់បន្ថយរយៈពេលធ្វើចត្តាឡីស័ក ក្រសួងសុខាភិបាល បានស្នើដល់អាជ្ញាធរមានសមត្ថកិច្ចពាក់ព័ន្ធ ត្រូវបន្តរក្សាការចាក់វ៉ាក់សាំងកូវីដ១៩ ដូសទី១ ឬដូសទី២ ជូនដល់ពលរដ្ឋខ្មែរ និងពលករខ្មែរ នៅថ្ងៃដែលត្រូវបានអនុញ្ញាតឲ្យចាកចេញពីមណ្ឌលចត្តាឡីស័កផងដែរ។ ចំពោះការចាក់វ៉ាក់សាំងនេះទៀតសោត សម្រាប់អ្នកចាក់ដូសទី១រួច គឺទាល់តែមានលក្ខណៈសម្បត្តិគ្រប់គ្រាន់សម្រាប់ការចាក់ដូសទី២ ទើបអនុញ្ញាតឲ្យចាក់។ នេះបើតាមការបញ្ជាក់របស់ក្រសួងសុខាភិបាល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ