ក្រុមអង្គការសង្គមស៊ីវិលនៅតែបន្តទាមទាររកយុត្តិធម៌ឲ្យលោក ឈុត វុទ្ធី
ក្រុមអង្គការសង្គមស៊ីវិលនៅក្នុងស្រុកនៅតែទទួចឲ្យស្វែងរកយុត្តិធម៌ជូនលោក ឈុត វុទ្ធី ជាសកម្មជនព្រៃដែលត្រូវបានបាញ់សម្លាប់ក្នុងចុះល្បាតព្រៃនៅខេត្តកោះកុង។ ការទទួចជាថ្មីទៀតនេះ គឺធ្វើឡើងនៅពេលដែលក្រុមអង្គការ សមាគម និងសហជីពចំនួន៨ បាននាំគ្នារំឭកខួប១០ឆ្នាំនៅថ្ងៃនេះ នៃការស្លាប់របស់លោក ឈុត វុទ្ធី ខណៈដែលតុលាការកម្ពុជាបានបិទបញ្ចប់សំណុំរឿងនេះទៅហើយ។
ចុះផ្សាយនៅថ្ងៃ៖
ស្តាប់ - ០២:២១
លោកឈុត វុទ្ធី ត្រូវបានបាញ់សម្លាប់ នៅតំបន់ដាច់ស្រយាលមួយកន្លែង ឆ្ងាយពីភ្នំក្រវាញ កាលពីថ្ងៃទី២៦ខែមេសាឆ្នាំ២០១២ ក្នុងខណៈពេលដែលគាត់កំពុងស៊ើបអង្កេតករណីកាប់ឈើខុសច្បាប់ ជាមួយអ្នកកាសែត Cambodia Daily ពីររូបទៀត។ មន្ត្រីយោធា ឈ្មោះ អ៊ិន រតនា ក៏ត្រូវបានបាញ់សម្លាប់នៅពេលផ្ទុះអាវុធផងដែរ។
សំណុំរឿងនេះគឺមានបុគ្គលិកក្រុមហ៊ុន Timber Green លោក រ៉ាន់ បូរ័ត្ន ម្នាក់ប៉ុណ្ណោះត្រូវបានតុលាការខេត្តកោះកុងផ្តន្ទាទោសនៅថ្ងៃទី២២ ខែតុលា ឆ្នាំ២០១២ ឲ្យជាប់ពន្ធនាគារ ពីរឆ្នាំ ពីបទបាញ់សម្លាប់មន្ត្រីយោធា ដែលរដ្ឋាភិបាលបានអះអាងថាបានសម្លាប់លោក ឈុត វុទ្ធី។
ទោះជាយ៉ាងណាក្រុមអង្គការសិទ្ធិមនុស្សដែលតាមដានករណីនេះ បានកត់សំគាល់ថា មន្ត្រីរដ្ឋាភិបាលបានរៀបចំលំដាប់នៃការពន្យល់ដែលមានលក្ខណៈផ្ទុយគ្នា ហើយចំលែកៗជាច្រើន សម្រាប់ការស្លាប់របស់លោក វុទ្ធី នៅមុនបិទបញ្ចប់ដោយការចង្អុលនូវការបាញ់ទៅលោក អ៊ិន រតនា។
នាយិការអង្គការសិទិ្ធមនុស្ស លីកាដូ អ្នកនាង ណាលី ពីឡូក បានិយាយកាលពីពេលនោះថា “ការស៊ើបអង្កេតលើករណីការសម្លាប់លោក ឈុត វុទ្ធី គឺជាការមិនយកចិត្តទុកដាក់ដល់ភាពយុត្តិធម៌ទេ។ មន្ត្រីសិទ្ធិមនុស្សរូបនេះ បានហៅការបាញ់សម្លាប់ លោក ឈុត វុទ្ធី ថាជា ទម្លាប់បំភិតបំភ័យដល់អ្នកទាំងឡាយ ដែលចង់និយាយរិះគន់នឹងស្ថានភាពបច្ចុប្បន្ននៅក្នុងប្រទេសកម្ពុជា។”
សាក្សីសំខាន់ជាច្រើន មិនបានមកបង្ហាញខ្លួននៅសវនាការនោះឡើយ រួមទាំងយោធាម្នាក់ដែលជាបុគ្គលិកសន្តិសុខក្រុមហ៊ុន Timber Green ដោយយោងតាមរបាយការណ៍ជាច្រើន គឺជាតួសំដែងយ៉ាងសំខាន់នៅក្នុងព្រឹត្តិការណ៍ដែលឈានដល់ការបាញ់ប្រហារ ហើយដែលនៅក្នុងព្រឹត្តិការណ៍នោះយោធានោះបានពាក់ម៉ាសមុខ និងមានភាពស្រវឹងស្រាខ្លាំង។ នេះបើតាមរបាយការណ៍របស់លីកាដូ។
ដោយសារតែហេតុផលទាំងនេះ ទើបក្រុមអង្គការសង្គមស៊ីវិលនៅក្នុងស្រុកនៅតែទទួចឲ្យស្វែងរកយុត្តិធម៌ជូនលោក ឈុត វុទ្ធី ខណៈដែលក្រុមអង្គការ សមាគម និងសហជីពចំនួន៨ បាននាំគ្នារំឭកខួប១០ឆ្នាំនៃការស្លាប់របស់សកម្មជនព្រៃឈើរូបនេះ។
បើតាមអង្គការលីកាដូ “ការស្លាប់របស់លោកវុទ្ធី សមនឹងទទួលបាននូវភាពយុត្តិធម៌ ហើយការណ៍នេះទាមទារឲ្យមានការស៊ើបអង្កេតឲ្យបានត្រឹមត្រូវ និងការលាតត្រដាងនូវភស្តុតាងដែលគួរឲ្យជឿដល់សាធារណជន ដើម្បីលុបបំបាត់ទស្សនៈនិទណ្ឌភាពដែលនៅតែបន្តមាន នៅជុំវិញសោកនាដកម្មនេះ”៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ