សង្គមស៊ីវិលដាក់ពាក្យបណ្ដឹងទៅស្ថាប័នហិរញ្ញវត្ថុអន្តរជាតិចោទមីក្រូហិរញ្ញវត្ថុនិងធនាគារ៦ពីបទរំលោភសិទ្ធិមនុស្ស
អង្គការសង្គមស៊ីវិលក្នុងស្រុកចំនួនពីរ តំណាងឲ្យអ្នកខ្ចីប្រាក់នៅកម្ពុជា បានដាក់ពាក្យបណ្ដឹងទៅកាន់ស្ថាប័នហិរញ្ញវត្ថុអន្តរជាតិ ដោយធ្វើការចោទប្រកាន់គ្រឹះស្ថានមីក្រូហិរញ្ញវត្ថុ និងធនាគារចំនួន៦ពីបទរំលោភសិទ្ធិមនុស្សធ្ងន់ធ្ងរ។ ម្ចាស់បណ្ដឹងអំពាវនាវឱ្យទីប្រឹក្សាដោះស្រាយវិវាទនៃសាជីវកម្មហិរញ្ញវត្ថុអន្តរជាតិ ចាប់ផ្ដើមស៊ើបអង្កេតជាបន្ទាន់ ទៅលើការខូចខាតបង្កឡើងដោយការវិនិយោគជាមួយ គ្រឹះស្ថានមីក្រូហិរញ្ញវត្ថុនិងធនាគារចំនួន៦។ នេះបើតាមសេចក្ដីថ្លែងការណ៍របស់អង្គការលីកាដូនៅថ្ងៃទី៣ខែឧសភានេះ។
ចុះផ្សាយនៅថ្ងៃ៖
ស្តាប់ - ០២:៥៥
សម្ព័ន្ធខ្មែរជំរឿននិងការពារសិទ្ធិមនុស្សលីកាដូ និងអង្គការសមធម៌កម្ពុជា ជាតំណាងម្ចាស់បណ្ដឹងអ្នកខ្ចីប្រាក់ដែលរងផលប៉ះពាល់ពីគ្រឹះស្ថានមីក្រូហិរញ្ញវត្ថុ និងធនាគារចំនួន៦នៅកម្ពុជា។ ស្ថាប័នទាំង៦ដែលអង្គការទាំងពីរចង្អុលមុខនោះរួមមាន៖ ធនាគារអេស៊ីលីដា ធនាគារហត្ថា ធនាគារស្ថាបនា គ្រឹះស្ថានមីក្រូហិរញ្ញវត្ថុអម្រឹត គ្រឹះស្ថានមីក្រូហិរញ្ញវត្ថុអិលអូអិលស៊ី និងគ្រឹះស្ថានមីក្រូហិរញ្ញវត្ថុប្រាសាក់ ដែលរួមគ្នាកាន់កាប់ប្រមាណជា ៧៥ភាគរយ នៃកម្ចីឥទានខ្នាតតូចនៅក្នុងប្រទេសទាំងមូល ។
បើតាមអង្គការលីកាដូ និងអង្គការសមធម៌កម្ពុជា សាជីវកម្មហិរញ្ញវត្ថុអន្តរជាតិបានទទួលពាក្យបណ្ដឹង និងបន្តដំណើរការពិនិត្យមើលបណ្តឹងចោទប្រកាន់អំពីការរំលោភសិទ្ធិមនុស្សនិងការរំលោភលើបទដ្ឋានអនុវត្តស្តង់ដារ របស់សាជីវកម្មហិរញ្ញវត្ថុអន្តរជាតិដែលប្រព្រឹត្តដោយគ្រឹះស្ថានមីក្រូហិរញ្ញវត្ថុ និងធនាគារចំនួន៦ដែលផ្តល់កម្ចីឥណទានខ្នាតតូចនៅក្នុងប្រទេសកម្ពុជា។
ស្ថាប័នទាំង៦ទទួលបានការអនុម័តទឹកប្រាក់ច្រើនជាង៤០០លានដុល្លារ ពីមូលនិធិសាជីវកម្មហិរញ្ញវត្ថុអន្តរជាតិ នៅរយៈពេល៥ឆ្នាំចុងក្រោយនេះ រួមមានកម្ចីឥណទានដោយផ្ទាល់ កម្ចីបញ្ចូលគ្នា កម្ចីឥណទាននិងការវិនិយោគផ្អែកលើសមភាពពីមូលនិធិដែលគាំទ្រដោយមានសាជីវកម្មហិរញ្ញវត្ថុអន្តរជាតិ។
សម្រាប់អង្គការទាំងពីរ ការវិនិយោគប្រកបដោយគ្រោះថ្នាក់ និងខ្វះការចាត់វិធានការចាំបាច់ឱ្យបានគ្រប់ជ្រុងជ្រោយរបស់សាជីវកម្មហិរញ្ញវត្ថុអន្តរជាតិ ពាក់ព័ន្ធនឹងគម្រោងកម្ចីឥណទានខ្នាតតូចរបស់ខ្លួន បានបំផ្លិចបំផ្លាញការរស់នៅ និងខូចខាតដល់សហគមន៍ជាច្រើននៅក្នុងប្រទេស ហើយពួកគេត្រូវតែចាត់វិធានការ ដើម្បីផ្ដល់ការអនុគ្រោះពិតប្រាកដសម្រាប់អ្នកខ្ចីប្រាក់ទាំងនេះ។
លោក អៀង វុទ្ធី នាយកប្រតិបត្តិនៃអង្គការសមធម៌កម្ពុជាបានលើកឡើង នៅក្នុងសេចក្ដីថ្លែងការណ៍នៅថ្ងៃទី៣ឧសភានេះថា ការរំលោភសិទ្ធិមនុស្សធ្ងន់ធ្ងរ បង្កឡើងដោយវិស័យយនេះ គឺកើតមានឡើងជាច្រើនឆ្នាំមកហើយ។ លោកបានបន្តថា សាជីវកម្មហិរញ្ញវត្ថុអន្តរជាតិ ត្រូវតែចាត់វិធានការជាបន្ទាន់ ដើម្បីស៊ើបអង្កេតការរំលោភបំពានទាំងនេះដោយឯករាជ្យ និងផ្ដល់សំណងសមរម្យដល់ជនរងគ្រោះ។
គេនៅមិនទាន់ឃើញមានការឆ្លើយតបបែបណាឡើយទេពីសមាគមមីក្រូហិរញ្ញវត្ថុ និងសមាគមធនាគារនៅកម្ពុជា គិតមកដល់ពេលនេះ។ តែកន្លងមកអ្នកនាំពាក្យសមាគមមីក្រូហិរញ្ញវត្ថុនៅកម្ពុជាធ្លាប់បានគូសបញ្ជាក់ថា វិស័យធនាគារនិងហរិញ្ញវត្ថុនៅកម្ពុជា មិនដែលរឹបអូសទ្រព្យធានារបស់អតិថិជនមកដោះស្រាយបញ្ហាបំណុលនោះទេ។
បើតាមអង្គការលីកាដូ បច្ចុប្បន្ន ប្រជាពលរដ្ឋកម្ពុជាជាប់ជំពាក់កម្ចីឥណទានច្រើនជាងគេនៅក្នុងពិភពលោក ។ ប្រជាពលរដ្ឋចំនួន ៩៥% មានប្រាក់ចំណូលប្រចាំឆ្នាំ តិចជាងចំនួនកម្ចីគិតជាមធ្យមនេះទៅទៀត ហើយជាញឹកញាប់ កម្ចីឥណទានខ្នាតតូច ត្រូវតម្រូវឱ្យដាក់ប្លង់កម្មសិទ្ធិដីធ្លីជាទ្រព្យធានា។ ការរំលោភបំពានជាច្រើន ទាក់ទងនឹងបំណុលឥណទានខ្នាតតូច ក្នុងនោះរួមមាន ការអនុវត្តការផ្ដល់ប្រាក់កម្ចីបែបកេងប្រវញ្ច ការលក់ដីដោយបង្ខំ ការគំរាមកំហែង ពលកម្មកុមារ និងការបង្កើនបន្ទុកបំណុលសម្រាប់អ្នកខ្ចីប្រាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ