ប្រទេសបីក្នុងសហគមន៍អាស៊ានទទួលរៀបចំកិច្ចប្រជុំសំខាន់បីផ្សេងគ្នានៅចុងឆ្នាំនេះ
កិច្ចប្រជុំធំៗចំនួនបីគ្រោងរៀបចំនៅក្នុងប្រទេសសមាគមអាស៊ានដែលមានកម្ពុជា ថៃ និង ឥណ្ឌូណេស៊ីនៅពាក់ខែវិច្ឆិកាចុងឆ្នាំនេះ។ កិច្ចប្រជុំទាំងបីនោះរួមមាន៖ កិច្ចប្រជុំកំពូលអាស៊ានរៀបចំនៅកម្ពុជា កិច្ចប្រជុំG20រៀបចំនៅឥណ្ឌូណេស៊ី និងកិច្ចប្រជុំសេដ្ឋកិច្ចAPECរៀបចំនៅថៃ។ តើកិច្ចប្រជុំទាំងបីមានរបៀបវារៈនិងទិសដៅអ្វីខ្លះ?
ចុះផ្សាយនៅថ្ងៃ៖
ស្តាប់ - ០១:៥៦
កិច្ចប្រជុំអាស៊ានរៀចំឡើងក្រោមប្រធានបទ«អាស៊ានរួមគ្នាធ្វើ៖ដោះស្រាយបញ្ហាប្រឈមរួមគ្នា»ផ្ដោតលើការពន្លឿនកិច្ចប្រឹងប្រែងស្ដារឡើងវិញនូវផលប៉ះពាល់ដែលបណ្ដាលមកពីជំងឺកូវីដ១៩ ,ការលើកកម្ពស់សមាហរណកម្មអាស៊ាន និងសមត្ថភាពប្រកួតប្រជែងសម្រាប់កំណើនរយៈពេលវែងក្នុងបរិបទនៃបដិវត្តន៍ឧស្សាហកម្មទី៤,ការលើកកម្ពស់សន្តិសុខផ្នែកសុខភាព និងការគាំពារសង្គមសម្រាប់ប្រជាជន។ ទាំងនេះជាអ្វីដែលអាស៊ានអះអាងថា ជារបៀបវារៈអទិភាពនឹងត្រៀមជជែកក្នុងកិច្ចប្រជុំកំពូលអាស៊ានខាងមុខ។
រីឯវេទិកាក្រុមប្រទេសG20ធ្វើឡើងក្រោមប្រធានបទ«ងើបឡើងវិញទាំងអស់គ្នា ងើបឡើងវិញកាន់តែរឹងមាំ»គឺមានគោលបំណងជួយសម្រួលដល់ការងើបឡើងវិញដ៏រឹងមាំនិងប្រកបដោយបរិយាប័ន្នសម្រាប់ទាំងអស់គ្នា។ ជាមួយគ្នានេះប្រធានាធិបតីឥណ្ឌូណេស៊ីប្ដេជ្ញាធានាថា ក្រុម G20មានសារៈសំខាន់មិនមែនត្រឹមតែសម្រាប់សមាជិកខ្លួនឯងប៉ុណ្ណោះទេ ប៉ុន្តែវាសំខាន់សម្រាប់ពិភពលោកទាំងមូល ជាពិសេសប្រទេសកំពុងអភិវឌ្ឍន៍។ ហើយក្រុម G20ក៏បានកំណត់អាទិភាពលើវិស័យសំខាន់ចំនួនបីរួមមាន៖ការពង្រឹងសុខភាពសកល ការផ្លាស់ប្ដូរបែបឌីជីថល និងការផ្លាស់ប្ដូរថាមពល សម្រាប់ការងើបឡើងវិញជាសកលដ៏រឹងមាំនិងប្រកបដោយបរិយាប័ន្ន។
ចំពោះកិច្ចប្រជុំសេដ្ឋកិច្ចAPECឆ្នាំ២០២២រៀចំឡើងក្នុងប្រធានបទ«បើកចំហ តភ្ជាប់ តុល្យភាព»ដែលមានគោលបំណងជំរុញនូវចក្ខុវិស័យសហគមន៍អាស៊ីប៉ាស៊ីហ្វិកបើកចំហរ ស្វាហាប់ ធន់ និងសន្តិភាព។សមាជិកនៃវេទិកាសេដ្ឋកិច្ចនេះរួមគ្នាដោះស្រាយបញ្ហាប្រឈមដ៏ធំសម្បើមដែលកើតចេញពី ជំងឺរាតត្បាត និងជម្លោះដែលបានជះផលប៉ះពាល់អវិជ្ជមាននៅទូទាំងពិភពលោក។ ក្នុងនាមជាម្ចាស់ផ្ទះរៀបចំកិច្ចប្រជុំនេះប្រទេសថៃអំពាវនាវឲ្យមានការសន្ទនាឡើងវិញអំពីតំបន់ពាណិជ្ជកម្មសេរីអាស៊ីប៉ាស៊ីហ្វិក គាំទ្រការវិលត្រឡប់ទៅកាន់ការធ្វើដំណើរប្រកបដោយសុវត្ថិភាពនិងរលូន ដែលជាធាតុផ្សំដ៏សំខាន់ក្នុងការជួយស្តារតំបន់និងពិភពលោកពីបញ្ហាជំងឺរាតត្បាតកូវីដ១៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ