ក្រសួងការបរទេសកម្ពុជានិងអគ្គលេខាអាស៊ានត្រៀមដឹកនាំវេទិកាកម្រិតខ្ពស់នាំជំនួសមនុស្សធម៌ចូលភូមា
លោក ប្រាក់ សុខុន រដ្ឋមន្រ្តីការបរទេសកម្ពុជានិងជាប្រេសិតពិសេសរបស់ប្រធានអាស៊ាននៅភូមា និងអគ្គលេខាធិការអាស៊ាន លោក លឹម ចុក ហ៊ុយ កំពុងត្រៀមដឹកនាំកិច្ចពិគ្រោះយោបល់ជាមួយតំណាងជាន់ខ្ពស់មកពីប្រទេសជាសមាជិកអាស៊ានទាំងអស់នៅថ្ងៃស្អែកនេះ។ ជាកិច្ចប្រជុំដែលត្រូវបានក្រសួងការបរទេសថា ជា វេទិកាកម្រិតខ្ពស់មួយសម្រាប់ការពិភាក្សាផ្តួចផ្តើមឱ្យមានកិច្ចសន្ទនាពីភាគីពាក់ព័ន្ធ ដើម្បីផ្តល់នូវមគ្គុទេ្ទសក៍ពីរបៀបក្នុងការជំរុញជំនួយមនុស្សធម៌របស់អាស៊ានឱ្យទៅដល់ប្រជាជនភូមា។
ចុះផ្សាយនៅថ្ងៃ៖
ស្តាប់ - ០២:២៦
ក្រសួងការបរទេសនិងសហប្រតិបត្តិការអន្តរជាតិកម្ពុជានៅថ្ងៃទី៥ឧសភា បានចេញសេចក្តីប្រកាសព័ត៌មានថា កិច្ចប្រជុំពិគ្រោះយោបល់ ស្តីពីជំនួយមនុស្សធម៌របស់អាស៊ានសម្រាប់ភូមា ដែលប្រព្រឹត្តទៅបែបកូនកាត់ គឺតាមប្រព័ន្ធអនឡាញផង និងដោយផ្ទាល់នៅរាជធានីភ្នំពេញផង នឹងធ្វើឡើងនៅថ្ងៃទី៦ឧសភា។ ជាកិច្ចពិភាក្សា ដឹកនាំដោយ លោក ប្រាក់ សុខុន រដ្ឋមន្រ្តីការបរទេសកម្ពុជានិងជាប្រេសិតពិសេសរបស់ប្រធានអាស៊ាននៅភូមា និងលោក លឹម ចុក ហ៊ុយ អគ្គលេខាធិការអាស៊ាន និងក៏មានចូលរួមដោយតំណាងជាន់ខ្ពស់មកពីប្រទេសជាសមាជិកអាស៊ានដែរ។
កិច្ចប្រជុំពិគ្រោះយោបល់នោះត្រូវបានក្រសួងការបរទេសកម្ពុជាគូសបញ្ជាក់ថា នឹងផ្តល់ជាវេទិកាកម្រិតខ្ពស់មួយសម្រាប់អាស៊ាន ធ្វើកិច្ចពិភាក្សាផ្តួចផ្តើមឱ្យមានកិច្ចសន្ទនាមួយ ដែលមានការចូលរួមពីភាគីពាក់ព័ន្ធ ដើម្បីផ្តល់នូវមគ្គុទ្ទេសក៍របៀបក្នុងការជម្រុញជំនួយមនុស្សធម៌របស់អាស៊ានឱ្យទៅដល់ប្រជាជនភូមា ដោយឈរលើគោលការណ៍មនុស្សធម៌ និងគ្មានការរើសអើង។
គួរដឹងដែរថា វិបត្តិមនុស្សធម៌នៅភូមានេះបានបន្តអូសបន្លាយអស់ពេលជាង១ឆ្នាំមកហើយ។ កម្ពុជាក្នុងនាមជាប្រធានអាស៊ានប្តូរវេននៅឆ្នាំនេះ បានតាំងចិត្តស្វាហាប់ជួយដោះស្រាយបញ្ហានេះ។ កាលពីថ្ងៃទី៣ឧសភា លោកនាយករដ្ឋមន្ត្រីហ៊ុន សែន បានប្រាប់លោក លោក មីនអ៊ុងឡាំង មេដឹកនាំយោធាភូមា ថាកម្ពុជានៅតែពន្លឿនកុងសង់ស៊ីស ៥ចំណុច ជាពិសេសគឺទាក់ទងការបញ្ចប់អំពើហិង្សា ការសម្រួលឲ្យមានការបញ្ជូនជំនួយមនុស្សធម៌ចូលទៅដល់ពលរដ្ឋភូមា និងការកសាងទំនុកចិត្ត និងជំនឿទុកចិត្តក្នុងកិច្ចពិភាក្សានយោបាយ។ មិនខុសពីរាល់ដង មេដឹកនាំយោធាភូមាតបថា ខ្លួនបានព្យាយាមបញ្ចៀសអំពើហិង្សាតាមរយៈការចរចាឲ្យមានបទឈប់បាញ់ជាមួយក្រុមអង្គការកងកម្លាំងជនជាតិភាគតិចហើយ។
តាមការវាយតម្លៃរបស់អង្គការសហប្រជាជាតិនៅខែកុម្ភៈឆ្នាំនេះ នៅក្នុងចំណោមប្រជាជនភូមាសរុប ៥៤លាននាក់ មានប្រជាជនភូមាពាក់កណ្តាល កំពុងរស់នៅក្នុងភាពក្រីក្រ និងមនុស្សជាង ១៤,៤លាននាក់ ត្រូវការជំនួយមនុស្សធម៌ ដែលនៅក្នុងនោះ ៥លាននាក់ជាកុមារ។ ទន្ទឹមនឹងនេះ អង្គការសហប្រជាជាតិកំពុងអំពាវនាវស្វែងរកប្រាក់ជំនួយមនុស្សធម៌សម្រាប់ប្រជាជនភូមា នៅឆ្នាំ ២០២២ បានកើនឡើងទ្វេដង ដល់ជាង ៨៤៦លានដុល្លារ ដែលជាចំនួនមួយដ៏ខ្ពស់ក្នុងប្រវត្តិផ្តល់ជំនួយសម្រាប់ប្រជាជនភូមា។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ