សភាអឺរ៉ុបស្នើឲ្យដកEBA បន្ថែម បើការបោះឆ្នោតនៅកម្ពុជាមិនដូចអ្វីដែលពួកគេចង់បាន
សភាអឺរ៉ុបជំរុញឲ្យប្រទេសជាសមាជិកចំនួន២៧ តាមដានការបោះឆ្នោតនៅកម្ពុជាឲ្យបានដិតដល់បំផុត ដោយព្រមានថា ប្រសិនបើការបោះឆ្នោតទាំងថ្នាក់ក្រោមជាតិ និងការបោះឆ្នោតថ្នាក់ជាតិនៅពេលខាងមុខ មិនប្រព្រឹត្តិទៅដោយសេរី ត្រឹមត្រូវ និងយុត្តិធម៌ទេ នោះស្នើឲ្យគណៈកម្មការអឺរ៉ុបដកហូតប្រព័ន្ធអនុគ្រោះពន្ធEBA ពីកម្ពុជាបន្ថែមទៀត។ ការស្នើយ៉ាងដូច្នេះបានធ្វើឡើងតាមរយៈញត្តិមួយរបស់សភាអឺរ៉ុបនៅថ្ងៃទី៥ឧសភា ម្សិលមិញ ដែលទទួលការគាំទ្រ ពីតំណាងរាស្ត្រ សភាអឺរ៉ុប ចំនួន ៥២៦ នាក់ លើ ៥៩៤ នាក់។
ចុះផ្សាយនៅថ្ងៃ៖
ស្តាប់ - ០២:២៦
នៅក្នុងញត្តិចេញថ្ងៃទី៥ឧសភា២០២២ សភាអឺរ៉ុប បានជំរុញឲ្យគណៈកម្មការអឺរ៉ុបតាមដានមើលការបោះឆ្នោតថ្នាក់ឃុំសង្កាត់នៅក្នងខែមិថុនា ក៏ដូចជាការបោះឆ្នោតថ្នាក់ជាតិនៅឆ្នាំក្រោយ ឲ្យបានដិតដល់បំផុត។ ការបោះឆ្នោតទាំងពីរនេះត្រូវបានសភាអឺរ៉ុបចាត់ទុកថា សូចនាករមួយសម្រាប់វាស់វែងពីដំណើរការប្រជាធិបតេយ្យ និងសិទ្ធិមនុស្សនៅកម្ពុជា។
បើតាមសភាអឺរ៉ុប ប្រសិនបើការបោះឆ្នោតនេះ មិនសេរី ត្រូវត្រូវ និងយុត្តិធម៌ទេ នោះសភាអឺរ៉ុបស្នើឲ្យគណៈកម្មការអឺរ៉ុប ដាក់ទណ្ឌកម្មបន្ថែមទៀតមកលើរដ្ឋាភិបាលកម្ពុជាតាមរយៈការព្យូរEBA បន្ថែមទៀត ពីលើការព្យូរEBA ២០% កាលពីលើកមុន។
នៅក្នុងញត្តិមួយរបស់សភាអឺរ៉ុបនៅថ្ងៃទី៥ឧសភា ដែលទទួលការគាំទ្រ ពីតំណាងរាស្ត្រ សភាអឺរ៉ុប ចំនួន ៥២៦ នាក់ លើ ៥៩៤ នាក់ បានរំឭកឡើងវិញពីការរំលាយគណបក្សសង្គ្រោះជាតិកាលពីឆ្នាំ២០១៧ និងការចាប់ខ្លួនលោក កឹម សុខា។
ចំណាត់ការនានាតាំងពីពេលនោះ រហូតដល់មានការចាប់ខ្លួនសកម្មជននយោបាយ និងសកម្មសិទ្ធិមនុស្ស នាពេលចុងក្រោយនេះ គឺជាអ្វីដែលសភាអឺរ៉ុបចាត់ទុកថា ជាផ្នែកដ៍សំខាន់ដែលប៉ះពាល់ដល់ដំណើរការបោះឆ្នោតនៅកម្ពុជា។
នៅខណៈពេលដែលកម្ពុជាកំពុងអង្គុយលើកៅអីជាប្រធានអាស៊ាន សភាអឺរ៉ុបបានអំពាវនាវផងដែរ ឲ្យសហភាពអឺរ៉ុប និងសហគមន៍អន្តរជាតិ តាមដានឲ្យដិតដល់ និងវាយតម្លៃពីឥទ្ធិពលនៃការព្យួរ EBA២០% កន្លងមកជាមួយនឹងការដាក់សម្ពាធលើតួនាទីរបស់កម្ពុជាជាប្រធានអាស៊ានដើម្បីការពារ
សកម្មជននយោបាយ និងអ្នកការពារសិទ្ធិមនុស្ស ក្នុងការតស៊ូរបស់ពួកគេ។
បើតាមសភាអឺរ៉ុប ទណ្ឌកម្មប្រឆាំងនឹងមន្ត្រីកម្ពុជាក្នុងការរំលោភសិទ្ធិមនុស្ស និងលទ្ធិប្រជាធិបតេយ្យគ្មានអ្វីក្រៅពីការហាមប្រាមការធ្វើដំណើរទៅក្រៅប្រទេសមួយចំនួន និងការបង្កកទ្រព្យសម្បត្តិរបស់ពួកគេនោះឡើយ។
អ្នកនាំពាក្យរដ្ឋាភិបាលកម្ពុជា លោក ផៃ ស៊ីផាន សំដែងការសោកស្តាយដែលថាសភាអឺរ៉ុបយកបញ្ហានយោបាយមកធ្វើជារបៀបវារៈដាក់ទណ្ឌកម្មលើកម្ពុជាក្នុងរឿងEBA។ ប៉ុន្តែ លោក សម រង្ស៊ី បានអះអាងថា ការចេញញត្តិរបស់សភាអឺរ៉ុបបែបនេះ គឺបន្ទាប់ពីគណៈប្រតិភូគណបក្សសង្គ្រោះជាតិ ដឹកនាំដោយរូបលោកបានទៅធ្វើទស្សនកិច្ច នៅទីក្រុងព្រុចស៊ែល ប្រទេសប៊ែលហ្សិក កាលពីថ្ងៃទី២០ និង ២១ មេសា ២០២២ ដើម្បីទៅជួបអ្នកមុខអ្នការ ក្នុងស្ថាប័នសហភាពអឺរ៉ុបមួយចំនួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ