សមាគមអ្នកចិញ្ចឹមសត្វកម្ពុជាថា ការនាំចូលជ្រូករស់ខុសច្បាប់ពីប្រទេសជិតខាង នៅតែបន្តកើតមានឡើងដដែល
សមាគមអ្នកចិញ្ចឹមសត្វកម្ពុជានាព្រឹកថ្ងៃអាទិត្យនេះបានអះអាងថា ខ្លួនកំពុងបន្តព្រួយបារម្ភខ្លាំងចំពោះបញ្ហានាំចូលសត្វជ្រូករស់ខុសច្បាប់ពីក្រៅប្រទេស ខណៈបញ្ហានេះបានបង្កផលប៉ះពាល់ច្រើនដល់អ្នកចិញ្ចឹមក្នុងស្រុក។ លោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជាបានបញ្ជាក់ថា ការនាំចូលជ្រូករស់ពីប្រទេសជិតខាងបានលេចចេញជាបញ្ហាចោទសម្រាប់អ្នកចិញ្ចឹមក្នុងស្រុក ទោះបីរដ្ឋាភិបាលបានជំរុញលើកចិត្តដល់អ្នកចិញ្ចឹមជ្រូកក្នុងស្រុកឱ្យបង្កើនលទ្ធភាព និងបរិមាណចិញ្ចឹមសម្រាប់ផ្គត់ផ្គង់លើទីផ្សារយ៉ាងណាក្តី។
ចុះផ្សាយនៅថ្ងៃ៖
ស្តាប់ - ០២:២២
ជាង៤ខែហើយ ដែលរដ្ឋបានផ្អាកការនាំចូលជ្រូករស់ពីប្រទេសជិតខាងដូចជា ប្រទេសថៃ និងវៀតណាម។ ការផ្អាកនោះ ក៏ ដោយសារតែមានការកើតឡើងនៃជំងឺប៉េស្តអាហ្វ្រិក តម្លៃជ្រូកនាំចូលឡើងថ្លៃពេក និងដើម្បីទុកឱកាសឱ្យអ្នកចិញ្ចឹមក្នុងស្រុកមានលទ្ធភាពគ្រប់គ្រាន់សម្រាប់ធ្វើការផ្គត់ផ្គង់មកលើទីផ្សារ។
តែយ៉ាងណា ទោះបីផ្អាកអស់រយៈពេលជាច្រើនខែហើយក៏ដោយ ប៉ុន្តែបញ្ហានាំចូលជ្រូករស់ខុសច្បាប់ពីក្រៅប្រទេសចូលមកកម្ពុជាវិញ នៅតែបន្តកើតមានជាហូរហែរដដែល ពិសេសការនាំចូលជ្រូកពីប្រទេសវៀតណាមតាមរយៈច្រករបៀងមួយចំនួនស្ថិតក្នុងខេត្តស្វាយរៀង។
លោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជាបានបញ្ជាក់មកវិទ្យុបារាំងអន្តរជាតិថា ត្បិតរដ្ឋបានបន្ធូរការនាំចូលជ្រូករស់ពីប្រទេសជិតខាងបន្តិចហើយយ៉ាងណាក្តី តែកំណើននៃការនាំចូលជ្រូករស់ខុសច្បាប់ពីប្រទេសវៀតណាមកំពុងក្លាយជាបញ្ហាចោទសម្រាប់អ្នកចិញ្ចឹមជ្រូកក្នុងស្រុក ខណៈអាជ្ញាធរវិញក៏បង្ក្រាបបានជាហូរហែរផងដែរ។
លោក ស្រ៊ុន ពៅ បន្តថា នៅពេលបរិមាណជ្រូកខុសច្បាប់ហូរចូលមកកម្ពុជាកាន់តែច្រើន នោះទីផ្សារផ្គត់ផ្គង់សត្វជ្រូកក្នុងស្រុក នឹងជួបប្រទះនូវផលប៉ះពាល់។ ម្ល៉ោះហើយ អ្នកចិញ្ចឹមជ្រូកក្នុងស្រុកនឹងបាត់បង់សមត្ថភាពផ្គត់ផ្គង់នៅលើទីផ្សារជាក់ជាមិនខាន។
បើតាមប្រធានសមាគមអ្នកចិញ្ចឹមសត្វកម្ពុជារូបនេះ ទីផ្សារចិញ្ចឹមជ្រូកនៅក្នុងប្រទេសកម្ពុជានារយៈពេលប៉ុន្មានឆ្នាំចុងក្រោយនេះ គឺមានភាពល្អប្រសើរច្រើន ពោលគឺកម្ពុជាមានលទ្ធភាពគ្រប់គ្រាន់សម្រាប់ផ្គត់ផ្គង់មកលើទីផ្សារក្នុងស្រុក។ ជាក់ស្ដែង បច្ចុប្បន្ន ជាមធ្យម កម្ពុជា មានតម្រូវការជ្រូករស់លើទីផ្សារ ប្រមាណ ៨ពាន់ក្បាល ក្នុងមួយថ្ងៃ ខណៈកម្ពុជាអាចផ្គត់ផ្គង់ជ្រូករស់ ដោយខ្លួនឯងបាន១០០ភាគរយ។
បន្ថែមពីនេះ លោក ស្រ៊ុន ពៅ បន្តព្រួយបារម្ភថា បើអាជ្ញាធរមិនបង្ក្រាបការនាំចូលជ្រូករស់ខុសច្បាប់ឱ្យទាន់ពេលវេលានោះទេ អ្នកចិញ្ចឹមក្នុងស្រុកនឹងបាត់បង់ផលប្រយោជន៍ ហើយនឹងមិនអាចប្រកួតប្រជែងជាមួយតម្លៃរបស់ជ្រូកពីក្រៅស្រុកថែមទៀត ខណៈទីផ្សារជ្រូករស់នៅបន្តរក្សាតម្លៃ ពី ១ម៉ឺន១ពាន់រៀល ទៅ១ម៉ឺន៣ពាន់រៀល ក្នុងមួយគីឡូក្រាមដដែល។
សូមជម្រាបថា ទីផ្សារនាំចូលជ្រូករស់ពីក្រៅប្រទេស ត្រូវបានរដ្ឋាភិបាលកម្ពុជាសម្រេចបន្ធូរការរឹតបន្តឹងនាំចូលឡើងវិញហើយ ដើម្បីឱ្យទីផ្សារសត្វជ្រូកនេះ អាចប្រកួតប្រជែងតម្លៃជាមួយជ្រូកក្នុងស្រុកបាន។ ក្នុងនោះ ក្រសួងសេដ្ឋកិច្ចក៏បានបង្កើតនីតិវិធីដាក់ ដេញថ្លៃជ្រូករស់ពីក្រៅប្រទេស ដើម្បីអាចធានាបាននូវតម្លៃសមរម្យមួយមុននាំចូលមកកម្ពុជា ក៏ដូចជាដើម្បីរក្សាផលប្រយោជន៍អ្នកចិញ្ចឹមក្នុងស្រុកបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ