អាស៊ាន រួមគ្នាសម្រេចលទ្ធផល ៦ចំនុច ដើម្បីធានាពីការផ្តល់ជំនួយមនុស្សធម៌ដល់ភូមា
មានលទ្ធផលចំនួន ៦ចំនុច ត្រូវបានអាស៊ានសម្រេចព្រមព្រៀងគ្នា ក្នុងកិច្ចប្រជុំស្តីពីការផ្តល់ជំនួយមនុស្សធម៌ និងការចាក់វ៉ាក់សាំងដល់ពលរដ្ឋភូមា។ នេះបើតាមការឱ្យដឹងក្នុងសន្និសីទកាសែតរបស់លោកឧបនាយករដ្ឋមន្ត្រី ប្រាក់ សុខុន រដ្ឋមន្រ្តីការបរទេសកម្ពុជា និងជាប្រេសិតពិសេសរបស់ប្រធានអាស៊ានសម្រាប់បញ្ហាភូមា ក្រោយបញ្ចប់កិច្ចប្រជុំដោយផ្ទាល់ និងតាមអនឡាញផង ស្តីពីការផ្តល់ជំនួយមនុស្សធម៌ដល់ភូមា ដែលបានធ្វើឡើងនៅទីក្រុងភ្នំពេញ នារសៀលថ្ងៃសុក្រ ទី ៦ឧសភានេះ។
ចុះផ្សាយនៅថ្ងៃ៖
ស្តាប់ - ០២:០២
លទ្ធផលចំនួន ៦ដែលសម្រេច បានក្នុងកិច្ចប្រជុំ ដែលមានលោកឧបនាយករដ្ឋមន្ត្រីប្រាក់ សុខុន និងលោក លឹម ចុក ហ៊ុយ អគ្គលេខាធិការអាស៊ាន ជាអ្នកសម្របសម្រួលជំនួយមនុស្សធម៌របស់អាស៊ានធ្វើជាសហប្រធាន ព្រមទាំងមានការចូលរួមពីតំណាងជាន់ខ្ពស់មកពីប្រទេសជាសមាជិកអាស៊ាន និងអង្គការសហប្រជាជាតិផងនោះ បានផ្តោតសំខាន់ទៅលើការធានាធ្វើឱ្យជំនួយរបស់ប្រទេសសមាជិកអាស៊ាន ប្រទេសអ្នកផ្តល់ជំនួយ និងអង្គការដៃគូនានា បានដឹកជញ្ជូនទៅជួយដល់ពលរដ្ឋភូមាដែលកំពុងរងគ្រោះខ្លាំង។
តាមការប្រកាសពីលោកប្រាក់ សុខុន ក្រុមការងារភូមាសម្រាប់ការសម្របសម្រួលមនុស្សធម៌ នឹងធ្វើការ ដើម្បីធានាថា ជំនួយមនុស្សធម៌ នឹងចែកចាយដល់តំបន់ដែលគ្រប់គ្រងដោយអង្គការក្រុមប្រដាប់អាវុធ ដោយសុវត្ថិភាព។ ក្រុមការងារនៅក្នុងប្រទេសភូមា នឹងសហការជាមួយភាគីអាស៊ាន និងអង្គការអន្តរជាតិ ដើម្បីកំណត់ទីតាំង ដឹកជញ្ជួនជំនួយមនុស្សធម៌អាស៊ាន ដែលពេលនេះ គេកំណត់បាន ៥រដ្ឋជាចាំបាច់ គឺ រដ្ឋកាយ៉ា កាយីន ម៉ាហ្ក្វេរ សាហ្គៃ និងបាហ្គូ។ ប៉ុន្តែក្នុងចំណោម ៥រដ្ឋនេះ គេនឹងពិចារណាផ្តល់អាទិភាពមុន ដល់តំបន់ចំនួន ២ ឬ ៣ ដែលមានជនភៀសខ្លួនក្នុងស្រុក និងសហគមន៍រងគ្រោះច្រើនជាងគេ។
ក្រៅពីធានាផ្តល់សុវត្ថិភាពក្នុងការផ្តល់ជំនួយមនុស្សធម៌ដល់ពលរដ្ឋភូមា កិច្ចប្រជុំ ក៏បានពិភាក្សាផងដែរ ចង់ឱ្យមានការផ្សារភ្ជាប់ការចាក់វ៉ាក់សាំងបង្ការកូវីដ១៩ ជាមួយនឹងការចែកចាយជំនួយមនុស្សធម៌ដល់ពលរដ្ឋភូមាដែរ។ លោក ប្រាក់ សុខុន ប្រេសិតពិសេសរបស់ប្រធានអាស៊ានសម្រាប់បញ្ហាភូមា អះអាងថា កិច្ចប្រជុំនេះ មានការវិវត្តន៍ជឿនលឿនទៅមុខច្រើន ក្នុងដំណោះស្រាយភូមា។ ហើយលោកក៏នឹងបន្តទៅបំពេញទស្សនកិច្ចជាលើកទី ២ នៅក្នុងប្រទេសភូមា នាអំឡុងចុងខែឧសភាខាងមុខនេះទៀត។
សូមបញ្ជាក់ថា បញ្ហាជំនួយមនុស្សធម៌ គឺជាចំនុចយ៉ាងសំខាន់មួយ ក្នុងចំណោមកុងសង់ស៊ីស ៥ចំនុចដែលអាស៊ានបានដាក់លក្ខខណ្ឌជាមួយរបបសឹកភូមា ក្រោយរដ្ឋប្រហារ កាលពីខែកុម្ភៈឆ្នាំ ២០២១។ កម្ពុជាក្នុងនាមជាប្រធានអាស៊ានប្តូរវេននៅឆ្នាំ២០២២នេះ បានប្តេជ្ញាដោះស្រាយបញ្ហានេះឱ្យបាន។
យោងតាមការវាយតម្លៃរបស់អង្គការសហប្រជាជាតិ នៅឆ្នាំនេះ បានបង្ហាញថា មានពលរដ្ឋភូមាជាង ១៤លាននាក់ ក្នុងចំណោមពលរដ្ឋសរុបប្រមាណ ៥៤លាននាក់ កំពុងត្រូវការជំនួយមនុស្សធម៌ជាបន្ទាន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ