លោក ហ៊ុន សែន ចេញពីប្រទេសជិត១សប្តាហ៍ដើម្បីធ្វើជាសហប្រធានកិច្ចប្រជុំកំពូលអាស៊ាន-អាមេរិក
លោកនាយករដ្ឋមន្ត្រី ហ៊ុន សែន បានដឹកនាំគណៈប្រតិភូរបស់លោក ចាកចេញពីប្រទេសកម្ពុជាហើយនៅព្រឹកថ្ងៃអង្គារ ទី១០ ខែឧសភានេះ ដើម្បីទៅចូលរួមកិច្ចប្រជុំកំពូលពិសេសអាស៊ាន-អាមេរិក នៅថ្ងៃទី១២ និង១៣ ឧសភានៅទីក្រុងវ៉ាស៊ីនតោនសហរដ្ឋអាមេរិក។ គឺជាកិច្ចប្រជុំដែលផ្តោតទៅលើសារសំខាន់នៃកិច្ចសហប្រតិបត្តិការរវាងអាស៊ាន-អាមេរិក លើវិស័យជាច្រើនដូចជាការប្រយុទ្ធប្រឆាំងជំងឺកូវីដ-១៩ បញ្ហាសេដ្ឋកិច្ច សន្តិសុខ បំរែបំរួលអាកាសធាតុ និងធនធានមនុស្សជាដើម។
ចុះផ្សាយនៅថ្ងៃ៖
ស្តាប់ - ០២:៤៥
សមាជិកគណៈរដ្ឋមន្ត្រីសំខាន់ៗ ដែលត្រូវអមអំណើរលោកនាយករដ្ឋមន្ត្រី ហ៊ុន សែន ទៅចូលរួមកិច្ចប្រជុំកំពូលពិសេសអាស៊ាន-អាមេរិក នៅសហរដ្ឋអាមេរិករួមមាន លោក ប្រាក់ សុខុន រដ្ឋមន្ត្រីការបរទេស លោក ស៊ុន ចាន់ថុល រដ្ឋមន្ត្រីក្រសួងដឹកជញ្ជូន លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម លោក ហង់ជួន ណារ៉ុន រដ្ឋមន្ត្រីក្រសួងអប់រំ និងមន្ត្រីជាន់ខ្ពស់រដ្ឋាភិបាលមួយចំនួនទៀត។
លោកនាយករដ្ឋមន្ត្រី ហ៊ុន សែន បានសរសេរនៅក្នុងហ្វេសប៊ុកផ្លូវការរបស់លោកប៉ុន្មាននាទីក្រោយចាកចេញពីទឹកដីកម្ពុជាថា ក្នុងនាមជាប្រធានអាស៊ាន កម្ពុជាត្រូវធ្វើជាសហប្រធាននៃកិច្ចប្រជុំកំពូលពិសេសអាស៊ាន-អាមេរិក និងដើម្បីរំព្ញកខួបអនុស្សាវរីយ៍លើកទី៤៥ នៃទំនាក់ទំនងដៃគូសន្ទនាអាស៊ាន-សហរដ្ឋអាមេរិកផងដែរ។ ស្ថិតនៅទឹកដីអាមេរិក លោកនឹងជួបជាមួយមេដឹកនាំសំខាន់ៗមួយចំនួនព្រមទាំងពលរដ្ឋខ្មែរអាមេរិកាំងដែលរស់នៅទីនោះកំពុងរងចាំទទួលលោក។ នេះបើតាមលោក ហ៊ុន សែន។
កិច្ចប្រជុំកំពូលអាស៊ាន-អាមេរិក អំឡុងពេលដែលកម្ពុជាធ្វើជាប្រធានអាស៊ាន និងជាសហប្រធាននៃកិច្ចប្រជុំនេះ ត្រូវអ្នកវិភាគនយោបាយ និងទំនាក់ទំនងអន្តរជាតិភាគច្រើនមើលឃើញថាមានផលចំណេញច្រើនជាងការប្រឈម ខណៈដែលអាមេរិក និងកម្ពុជាមានរឿងមិនយល់គ្នាជាច្រើន ដូចជាបញ្ហាភូមិសាស្ត្រនយោបាយ មជ្ឈភាពរបស់កម្ពុជារវាងចិន និងអាមេរិក បញ្ហាសិទ្ធិមនុស្ស និងលទ្ធិប្រជាធិបតេយ្យជាដើម។
ទោះយ៉ាងណា កិច្ចប្រជុំកំពូលនេះ ត្រូវគេជឿជាក់ថានឹងមានការបញ្ជាក់ឡើងវិញផងដែរ នូវការប្តេជ្ញាចិត្តរួមគ្នា ដើម្បីរក្សាមជ្ឈភាព និងឯកភាពអាស៊ាន តាមរយៈយន្តការនានាដែលដឹកនាំដោយអាស៊ាន ក៏ដូចជាការបង្កើនជំនឿ និងទំនុកចិត្តគ្នាទៅវិញទៅមក ក្នុងការថែរក្សាសន្តិភាព ស្ថិរភាព និងវិបុលភាពនៅក្នុងតំបន់។ កិច្ចប្រជុំនេះត្រូវគេរំពឹងថា នឹងមានការពិភាក្សាអំពីមធ្យោបាយ និងវិធីសាស្ត្រនានា ដើម្បីបង្កើនកិច្ចសហប្រតិបត្តិការក្នុងវិស័យជាច្រើនរួមមាន ការឆ្លើយតបនឹងជំងឺកូវីដ-១៩ សន្តិសុខសុខភាពសកល ការផ្លាស់ប្តូរអាកាសធាតុ ការអភិវឌ្ឍប្រកបដោយចីរភាព កិច្ចសហប្រតិបត្តិការលំហសមុទ្រ ការអភិវឌ្ឍធនធានមនុស្ស អប់រំ និងចំណងទាក់ទងរវាងប្រជាជន និងប្រជាជន ក៏ដូចជាការតភ្ជាប់ និងទំនាក់ទំនងសេដ្ឋកិច្ច។ ថ្នាក់ដឹកនាំអាស៊ាន និងសហរដ្ឋអាមេរិក ក៏នឹងធ្វើការផ្លាស់ប្តូយោបល់គ្នាផងដែរ អំពីបញ្ហាតំបន់ និងអន្តរជាតិ ដែលជាផលប្រយោជន៍ និងកង្វល់រួម។
សូមរំលឹកថាកិច្ចប្រជុំកំពូលពិសេសអាស៊ាន-អាមេរិក ដែលគ្រោងធ្វើនៅសហរដ្ឋអាមេរិកកាលពីថ្ងៃទី២៨-២៩ ខែមីនាកន្លងទៅនេះ ត្រូវបានលើកពេលម្តងហើយ ដោយសារតែថ្នាក់ដឹកនាំប្រទេសជាសមាជិកអាស៊ានមួយចំនួនជាប់រវល់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ