សមាជិកព្រឹទ្ធសភា៤រូប ក្រើនរំលឹកពីការអនុវត្តកិច្ចព្រមពៀងទីក្រុងប៉ារីស ស្របពេលលោក ហ៊ុន សែន កំពុងធ្វើជាសហប្រធានកិច្ចប្រជុំកំពូលអាស៊ាន-អាមេរិក
សមាជិកព្រឹទ្ធសភាចំនួន៤រូប មកពីបណ្តារដ្ឋខុសៗគ្នា បានរួមគ្នាចេញនូវសេចក្តីថ្លែងការណ៍មួយ នៅថ្ងៃទី១២ឧសភា ដោយរំលឹកកម្ពុជាឲ្យគោរពនូវកិច្ចព្រមព្រៀងទីក្រុងប៉ារីស ដែលសកម្មភាពរដ្ឋាភិបាលបច្ចុប្បន្នកំពុងតែដើរផ្ទុយ។ ការរំលឹកពីការអនុវត្តកិច្ចព្រមព្រៀងទីក្រុងប៉ារីសនេះ គឺស្របពេលដែល លោកនាយករដ្ឋមន្ត្រី ហ៊ុន សែន កំពុងធ្វើជាសហប្រធានដឹកនាំកិច្ចប្រជុំកំពូលពិសេសអាស៊ាន-អាមេរិក នាទីក្រុងវ៉ាស៊ីនតោន។ អ្នកនាំពាក្យគណបក្សប្រជាជនកម្ពុជា ប្រតិកម្មទៅនឹងសេចក្តីថ្លែងការណ៍របស់សមាជិកព្រឹទ្ធសភាទាំង៤រូបនោះ ថាមិនបានឆ្លុះបញ្ចាំងពីតថភាពជាក់ស្តែងនៅកម្ពុជា។
ចុះផ្សាយនៅថ្ងៃ៖
ស្តាប់ - ០២:២៦
ក្នុងខ្លឹមសាររំលេចអំពីកិច្ចព្រមព្រៀងសន្តិភាពទីក្រុងប៉ារីស លោក Edward J. Markey សមាជិកព្រឹទ្ធសភាតំណាងរដ្ឋ Massachusetts និងជាប្រធានអនុគណៈកម្មាធិការអាស៊ីបូព៌ា នៃគណៈកម្មាធិការទំនាក់ទំនងការបរទេសព្រឹទ្ធសភា បានបញ្ជាក់ថា ព្រឹទ្ធសភាអាមេរិក កាលពីថ្ងៃទី១១ បានផ្ញើសារយ៉ាងច្បាស់មិនអាចប្រកែកបាន ទៅកាន់លោកនាយករដ្ឋមន្ត្រី ហ៊ុន សែន ថា រដ្ឋាភិបាលរបស់លោកដាច់ខាតត្រូវសម្រេចឲ្យបាន តាមការសន្យាលើបញ្ហាប្រជាធិបតេយ្យ ស្របទៅតាមកិច្ចព្រមព្រៀងសន្តិភាពទីក្រុងប៉ារីស។
បើតាមសមាជិកព្រឹទ្ធសភាមកពីរដ្ឋ Massachusetts រូបនេះ លោកនាយករដ្ឋមន្ត្រី ហ៊ុន សែន និងគណបក្សប្រជាជនកម្ពុជា បានបរាជ័យក្នុងការអនុវត្តគោរពកិច្ចព្រមព្រៀងសន្តិភាពទីក្រុងប៉ារីស ក៏ដូចជារដ្ឋធម្មនុញ្ញកម្ពុជា ដែលផ្តល់មូលដ្ឋានសម្រាប់ការបោះឆ្នោតដោយសេរី និងយុត្តិធម៌ បញ្ហាសិទ្ធិមនុស្ស និងការប្តេជ្ញាចិត្តចំពោះអព្យាក្រឹតភាព។
រីឯលោក Jim Risch សមាជិកព្រឹទ្ធសភាមកពីរដ្ឋ Idaho បានលើកឡើងនៅក្នុងសេចក្តីថ្លែងការណ៍ដដែលនោះថា រដ្ឋាភិបាលកម្ពុជានៅតែបន្តរំលោភសិទ្ធិមនុស្សដែលត្រូវបានទទួលស្គាល់ជាអន្តរជាតិ ព្រមទាំងអនុញ្ញាតឱ្យយោធាចិនមានវត្តមាននៅកម្ពុជា ទោះបីជាមានការប្តេជ្ញាចិត្តនៅក្នុងកិច្ចព្រមព្រៀងសន្តិភាពទីក្រុងប៉ារីសកាលពី ៣០ ឆ្នាំមុនក៏ដោយ។
ដោយឡែកលោក Miit Romney សមាជិកព្រឹទ្ធសភាមកពីរដ្ឋ Utah និងលោក Bob Menendez សមាជិកព្រឹទ្ធសភាមកពីរដ្ឋ New Jersey បានសាទរចំពោះការអនុម័តរបស់ព្រឹទ្ធសភា ទៅលើដំណោះស្រាយនិងការប្តេជ្ញាចិត្តរបស់សហរដ្ឋអាមេរិក ចំពោះពលរដ្ឋកម្ពុជា ក្នុងការស្វែងរកសន្តិភាព វិបុលភាព និងអភិបាលកិច្ច តាមលទ្ធិប្រជាធិបតេយ្យ ក្នុងរយៈពេលសាមសិបឆ្នាំចុងក្រោយនេះ។
ជាការឆ្លើយតប លោក សុខ ឥសាន អ្នកនាំពាក្យគណបក្សប្រជាជនកម្ពុជា បញ្ជាក់ថា អ្វីជាការលើកឡើងរបស់សមាជិកព្រឹទ្ធសភាទាំង៤រូប គឺមិនបានផ្សារភ្ជាប់ទៅនឹងការពិតជាក់ស្តែងនៅកម្ពុជានោះទេ។ អ្នកនាំពាក្យគណបក្សប្រជាជនកម្ពុជា បានគូសបញ្ជាក់ថា ចាប់តាំងពីកម្ពុជាបានចុះហត្ថលេខាលើកិច្ចព្រមព្រៀងទីក្រុងប៉ារីស កម្ពុជាបានអនុវត្តរាប់ចាប់តាំងពីការបោះឆ្នោតចំនួន៦អាណត្តិ ទើបកម្ពុជារក្សាបានតម្លៃប្រជាធិបតេយ្យ និងការគោរពសិទ្ធិមនុស្សនៅក្នុងប្រទេស។
រីឯបញ្ហាដាក់ទណ្ឌកម្មបន្ថែម តាមរយៈច្បាប់ស្តីពីប្រជាធិបតេយ្យនិងសិទ្ធិមនុស្សនៅកម្ពុជា លោក សុខ ឥសាន ឆ្លើយតបថា ជាការយល់ឃើញរបស់សមាជិកព្រឹទ្ធសភាទាំង៤រូបនោះ ដែលចង់ប្រើប្រាសអំណាច ធ្វើបាបប្រទេសតូចតាច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ