លទ្ធផលជំនួប អាស៊ាន-អាមេរិក៖ភាគីពាក់ព័ន្ធប្តេជ្ញាជំរុញកំណើនសេដ្ឋកិច្ច តែហាក់បំភ្លេចរឿងប្រជាធិបតេយ្យ
ការប្តេជ្ញាចិត្តជំរុញកំណើនសេដ្ឋកិច្ចរវាងបណ្តាប្រទេសតំបន់អាស៊ាន និងអាមេរិក រួមទាំងបញ្ហាសន្តិសុខតំបន់គឺជាអ្វីដែលប្រទេសមហាអំណាច និងសមាជិកអាស៊ាន ប្តេជ្ញារួមគ្នាធ្វើឲ្យបាននៅពេលខាងមុខ។ នេះបើតាមសេចក្តីថ្លែងការណ៍រួម ស្តីពីកិច្ចប្រជុំកំពូលអាស៊ាន-អាមេរិក ដែលធ្វើឡើងជាលើកដំបូងនៅទីក្រុងវ៉ាស៊ីតោន ដែលបិទបញ្ចប់នៅថ្ងៃសុក្រ។ បើតាមសេចក្តីការណ៍ដដែលនេះ បញ្ហាសិទ្ធិមនុស្ស និងប្រជាធិបតេយ្យ ហាក់ត្រូវបានគេបំភ្លេចចោល ដោយផ្តោតតែទៅលើការពង្រឹងចំណងសេដ្ឋកិច្ច និងការតភ្ជាប់រវាងប្រជាជន និងប្រជាជន ការអភិវឌ្ឍន៍ក្នុងតំបន់ ការប្រើប្រាស់បច្ចេកវិទ្យា ការដោះស្រាយបញ្ហាប្រែប្រួលអាកាសធាតុ និងការរក្សាសន្តិភាពជាដើម។
ចុះផ្សាយនៅថ្ងៃ៖
ស្តាប់ - ០២:០២
ក្នុងសេចក្តីថ្លែងការណ៍ចំនួន៩ទំព័រដែលត្រូវបានគេបកប្រែក្រៅផ្លូវការជាសាភាខ្មែរ ប្រទេសសមាជិកអាស៊ាន និងសហរដ្ឋអាមេរិក បានប្តេជ្ញាចិត្ត ដោយឯកភាពគ្នាចំនួន២៨ចំណុចសំខាន់ៗ។ ចំណុចទាំងនោះគឺប្រទេសមហាអំណាចមួយនេះ និងសមាជិកអាស៊ានផ្តោតសំខាន់តែទៅលើការជំរុញកំណើនសេដ្ឋកិច្ចក្រោយពីវិបត្តិកូវីដ១៩ តាមរយៈការពង្រឹងចំណងសេដ្ឋកិច្ច និងការតភ្ជាប់រវាងប្រជាជន និងប្រជាជន ការគាំទ្រការអភិវឌ្ឍន៍ក្នុងតំបន់ ការប្រើប្រាស់បច្ចេកវិទ្យា ការដោះស្រាយបញ្ហាប្រែប្រួលអាកាសធាតុ និងការរក្សាសន្តិភាពជាដើម។
ចំណែកបញ្ហានយោបាយ និងប្រជាធិបយ្យ គឺមានការលើកឡើងតិចតួចបំផុតនៅក្នុងសេចក្តីថ្លែងការណ៍រួមនេះ។ ករណីជម្លោះនយោបាយអូសបន្លាយនៅភូមា ប្រទេសអាស៊ាន និងសហរដ្ឋអាមេរិកគ្រាន់តែរំឭកឡើងវិញឲ្យរដ្ឋអំណាចយោធាភូមា អនុត្តន៍គោលការណ៍៥ចំណុចដែលដាក់ចេញជាយូរមកហើយនោះឲ្យបានពេញលេញ ខណៈពួកគេកំពុងតែតាមដាន និងសំដែងក្តីបារម្ភ។
ដោយមិនមានចេញជាវិធានការអ្វីថ្មី សេចក្តីថ្លែងការណ៍រួមនេះ គឺគ្រាន់តែអះអាងជាថ្មី នូវការប្តេជ្ញាចិត្តចំពោះសន្តិភាព និងស្ថេរភាពក្នុងតំបន់ ហើយអំពាវនាវឲ្យរបបសឹកភូមាបញ្ឈប់ហិង្សាជាបន្ទាន់ និងដោះលែងអ្នកទោសនយោបាយ។
រីឯបញ្ហាប្រទេសអ៊ុយក្រែនវិញ សមាជិកអាស៊ាន និងអាមេរិក ក៏មិនបានថ្កោលប្រទេសរុស្ស៊ីដែលឈ្លាននោះឡើយ គឺគ្រាន់តែអះអាងថាជាថ្មី នូវការគោរពអធិបតេយ្យ និងបូរណភាពទឹកដី ហើយរំឭកឡើងវិញឲ្យបញ្ឈប់អំពើប្រទូស្តរាយជាបន្ទាន់។
នៅក្នុងសេចក្តីប្រកាសរួមទាំង២៨ចំណុចនេះ ក៏មាននិយាយផងដែរ ពីបញ្ហាសមុទ្រចិនខាងត្បូង និងការរងចាំការមើលការចេញនូវក្រមប្រតិបត្តិ(COC)។
ជាមួយគ្នានេះ ប្រទេសសមាជិក អាស៊ាន និងអាមេរិក អះអាងថាជាថ្មី នូវកិច្ចខិតខំប្រឹងប្រែងរក្សាតំបន់អាស៊ី-អាគ្នេយ៍ មិនឲ្យមានអាវុធនុយក្លេអ៊ែរ និងអាវុធប្រល័យលោកដទៃទៀត ខណៈភាគីពាក់ព័ន្ធបានប្តេជ្ញាចិត្តជាថ្មីនូវការរំសាយទាំងស្រុងអាវុធនុយក្លេអ៊ែរនៅឧបទ្វីបកូរ៉េ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ