ករណីគប់ស្បែកជើង៖ លោក ហ៊ុន សែន ទុកឲ្យអាមេរិកជាអ្នកអនុវត្តន៍ទៅតាមច្បាប់របស់ខ្លួន
ជាថ្មីម្តងទៀតលោកនាយករដ្ឋមន្ត្រី ហ៊ុន សែន នៅថ្ងៃអង្គារនេះ បានបញ្ជាក់ថា ករណីគប់ស្បែកសំដៅទៅរូបលោកនៅឯសហរដ្ឋអាមេរិក គឺលោកមិនស្នើឲ្យអាមេរិកចាត់វិធានការនោះទេ ប៉ុន្តែថាលោកទុកឲ្យសហរដ្ឋអាមេរិកគិតគូរទៅតាមច្បាប់របស់ខ្លួន។ ជាមួយគ្នានោះលោកប្រមុខរដ្ឋាភិបាលកម្ពុជាអះអាងថា មានកម្លាំង៣ក្រុមនៅទីក្រុងភ្នំពេញ ចង់ធ្វើបាតុកម្មនៅមុខស្ថានទូតអាមេរិកទាមទារឲ្យប្រទេសប្រជាធិបតេយ្យមួយនេះ ចេញមុខទទួលខុសត្រូវលើព្រឹត្តិការណ៍គប់ស្បែកជើងនោះ តែលោក ហ៊ុន សែន អះអាងថាលោកបានហាមឃាត់ ព្រោះខ្លាចមានហិង្សាដូចករណីវាយតំណាងរាស្ត្រមុខរដ្ឋសភា។
ចុះផ្សាយនៅថ្ងៃ៖
ស្តាប់ - ០២:០៥
ដោយប្រើពេលច្រើននាទីលើការរំឮកឡើងវិញនៃហេតុការណ៍គប់ស្បែកនោះ នៅក្នុងពិធីសំណេះសំណាលជាមួយក្រុមគ្រូពេទ្យប្រយុទ្ធប្រឆាំងនឹងជំងឺកូវីដ១៩ លោកប្រមុខរដ្ឋាភិបាលបានថ្លែងថាលោកទ្រាំមិននិយាយពីករណីនេះជាច្រើនថ្ងៃមកហើយ ដើម្បីរងចាំមើលសេចក្តីថ្លែងការណ៍ពីមជ្ឈដ្ឋាននានា។ ប៉ុន្តែលោកអះអាងថា លោកមិនស្នើឲ្យអាមេរិកចាត់វិធានការបែបណាទៅលើបុគ្គលដែលគប់ស្បែកសំដៅមកលើរូបលោកដែលកើតឡើងនៅទីក្រុងវ៉ាស៊ីតោននោះឡើយ។ ផ្ទុយមកវិញលោក ហ៊ុន សែន បានចោទសួរទៅកាន់សហរដ្ឋអាមេរិកថា ប្រសិនបើអាមេរិកចាត់ទុកករណីនេះថា ជាសេរីភាពបញ្ចេញមតិ លោកព្រមានថា ករណីដូចគ្នានេះអាចនឹងកើតមានឡើងនៅប្រទេសដទៃទៀត រួមទាំងកម្ពុជា នៅពេលខាងមុខ។
បើតាមលោកនាយករដ្ឋមន្ត្រី គឺអ្នកគាំទ្រគណបក្សកាន់អំណាចកំពុងតែមានកំហឹងលើករណីនេះ ហើយមានកម្លាំង៣ក្រុមស្នើសុំលោកធ្វើបាតុកម្មនៅមុខស្ថានទូតអាមេរិកក្នុងទីក្រុងភ្នំពេញដើម្បីឲ្យប្រទេសប្រជាធិបតេយ្យមួយនេះ ចេញមុខទទួលខុសត្រូវលើករណីគប់ស្បែកជើងនោះ។ ប៉ុន្តែលោក ហ៊ុន សែន ថ្លែងថា លោកបានហាមឃាត់មិនឲ្យមានការធ្វើបាតុកម្មតបតវិញឡើយ ពីព្រោះលោកបារម្ភខ្លាចមានអំពើហិង្សាកើតឡើងដូចករណីបាតុកម្មប្រឆាំង លោក កឹម សុខា នៅមុខរដ្ឋសភា ដែលឈានដល់វាយតំណាងរាស្ត្រ២រូបរបួសធ្ងន់។
សម្រាប់ លោក ហ៊ុន សែន ករណីគប់ស្បែកនេះគឺមិនមែនលើកទី១ឡើយទៅមេដឹកនាំសូម្បីតែលោក ចច ប៊ូស អតីតប្រធាននាធិបតីអាមេរិកក៏ធ្លាប់ត្រូវបានអ្នកកាសែតគប់ដោះស្បែងជើងចំនួន២ដងតែមិនត្រូវ ខណៈលោកថ្លែងសារនៅប្រទេសអ៊ីរ៉ាក់។ កាលពីឆ្នាំមុន លោក ម៉ាក្រុង ប្រធានាធិបតីបារាំងក៏ត្រូវបានគេទះកម្លៀងដែរនៅពេលលោកចុះជួបអ្នកគាំទ្រ។
បើតាមលោក ហ៊ុន សែន ប្រសិនបើសហរដ្ឋអាមេរិកដាក់ទោសអ្នកដែលគប់ស្បែកជើងនោះ នាំឲ្យលោកបារម្ភថា ក្រោយអនុវត្តន៍ទោស អាមេរិកនឹងបញ្ជូនជននោះមកកម្ពុជា ហើយបង្កើតជាក្តីបារម្ភបន្ថែមទៀតដល់សន្តិសុខទៅវិញទេ។ បារម្ភពីសន្តិសុខក៏កើតមានផងដែរ សម្រាប់មេដឹកនាំបក្សប្រឆាំងនៅក្នុងស្រុក ក្រោយករណីគប់ស្បែកជើងនេះកើតឡើង។ នេះបើតាមលោកប្រមុខរដ្ឋាភិបាល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ