រដ្ឋាភិបាលនិងនិងវិស័យឯកជនទម្លាក់លុយ១៥០លានដុល្លារស្ដារវិស័យទេសចរណ៍
ក្រសួងសេដ្ឋកិច្ចនិងគ្រឹះស្ថានហិរញ្ញវត្ថុទម្លាក់លុយ១៥០លានដុល្លារស្ដារវិស័យទេសចរណ៍កម្ពុជាឡើងវិញនៅចំពោះមុខភាពខូចខាតដែលបន្សល់ទុកពីវិបត្តិកូវីដ១៩។ បើតាមភាគីទាំងពីរ នេះជាជំហ៊ានទី៣ដែលបានដាក់ចេញដើម្បីសង្គ្រោះវិស័យទេសចរណ៍បន្ទាប់ពីជំហានទី១ កម្មវិធីសហហិរញ្ញប្បទានបានទម្លាក់លុយ១០០លានដុល្លារ និងជំហានទី២ទម្លាក់លុយ២៤០លានដុល្លារ។ ហេតុដែលនាំឲ្យរដ្ឋនិងវិស័យឯកជនបន្តទម្លាក់លុយដើម្បីសង្គ្រោះវិស័យទេសចរណ៍ ដោយសារប្រជាពលរដ្ឋរាប់សិបម៉ឺននាក់ កំពុងបាត់បង់ការងារ និងគ្មានប្រាក់ចំណូល។
ចុះផ្សាយនៅថ្ងៃ៖
ស្តាប់ - ០២:០៨
ការប្រកាសដាក់ចេញកញ្ចប់ថវិកា១៥០លានដុល្លារស្ដារវិស័យទេសចរណ៍ ធ្វើឡើងក្រោមវត្តមានលោកឧបនាយករដ្ឋមន្ត្រី អូន ព័ន្ធមុន្នីរ័ត្ន រដ្ឋមន្រ្តីក្រសួងសេដ្ឋកិច្ចនិងជាប្រធានគណៈកម្មាធិការជាតិអភិវឌ្ឍន៍ទេសចរណ៍ នៅរសៀលថ្ងៃទី១៧ ខែឧសភា។ លោករដ្ឋមន្ត្រីបានគូសបញ្ជាក់ថា គម្រោងសហហិរញ្ញប្បទាន ស្តារវិស័យទេសចរណ៍ ដែលមានទឹកប្រាក់សរុបចំនួន១៥០លានដុល្លារអាមេរិកនេះ កើតចេញពីថវិកាបដិភាគរបស់រដ្ឋាភិបាលចំនួន៧៥លានដុល្លារ តាមរយៈធនាគារសហគ្រាសធុនតូច និងមធ្យមកម្ពុជា និងថវិកាបដិភាគរបស់គ្រឹះស្ថានហិរញ្ញវត្ថុ ចូលរួម (PFIs) ចំនួន៧៥លានដុល្លារអាមេរិក។
បើតាមរដ្ឋមន្ត្រីក្រសួងសេដ្ឋកិច្ច សហគ្រាសក្នុងវិស័យទេសចរណ៍ដែលរងផលប៉ះពាល់ពីវិបត្តិនៃជំងឺកូវីដ១៩ អាចស្នើសុំឥណទានពីគ្រឹះស្ថានហិរញ្ញវត្ថុដែលជាដៃគូរបស់ SME Bank ក្នុងអត្រាការប្រាក់សម្បទានដោយខ្ចីបានខ្ពស់បំផុតរហូតដល់៤០ម៉ឺនដុល្លារ ក្នុងរយៈ៧ឆ្នាំជាមួយនឹងអត្រាការប្រាក់៦.៥ ក្នុងមួយឆ្នាំ។
ថវិកាទាំង១៥០លានដុល្លារក្នុងគម្រោងសហហិរញ្ញប្បទានស្តារវិស័យទេសចរណ៍ គឺផ្តោតសំខាន់ ចំពោះតែវិស័យទេសចរណ៍ទេ ព្រោះវិស័យនេះជាសសរស្តម្ភមួយយ៉ាងសំខាន់សម្រាប់សេដ្ឋកិច្ចកម្ពុជា។
ថ្លែងនៅក្នុងកម្មវិធីប្រកាសដាក់ដំណើរការជាផ្លូវការ «គម្រោងសហហិរញ្ញប្បទាន ស្ដារវិស័យទេសចរណ៍»កាលពីថ្ងៃទី១៧ឧសភាដែរ លោក ថោង ខុន រដ្ឋមន្រ្ដីក្រសួងទេសចរណ៍ជឿជាក់ថា កញ្ចប់ថវិកា១៥០លានដុល្លារនេះ នឹងចូលរួមស្ដារឡើងវិញអាជីវកម្មខ្នាតតូចនិងមធ្យម ហើយម្ចាស់អាជីវកម្មឬសហគ្រាសអាចប្រើប្រាស់កម្ចីនេះដើម្បីជួសជុលទីតាំងនិងពង្រឹងគុណភាពសេវាកម្ម យ៉ាងមានប្រសិទ្ធភាពផងដែរ។
ថ្លែងប្រាប់វិទ្យុបារាំងអន្តរជាតិនៅថ្ងៃទី១៨ឧសភានេះ លោកស្រី ឆាយ ស៊ាវលីន ប្រធានសមាគមទីភ្នាក់ទេសចរណ៍កម្ពុជាស្វាគមន៍ចំពោះការដាក់ចេញគម្រោងសហហិរញ្ញប្បទានស្តារវិស័យទេសចរណ៍ព្រោះផែនការនេះ ប្រៀបបាននឹងការសង្គ្រោះសហគ្រាសឯកជនឲ្យរស់ឡើងវិញបន្ទាប់ដេកដួលនៅមួយកន្លែងដោយសារកូវីដ។ តែយ៉ាងណាមិញអ្នកជំនាញរូបនេះ ចង់ឃើញការអនុគ្រោះបន្ថែមទៀត ពីវិស័យមីក្រូហិរញ្ញវត្ថុលុបចោលលក្ខខណ្ឌស្មុគស្មាញមួយចំនួនដូចជាៈការស្នើសុំរបាយការណ៍ហិរញ្ញវត្ថុពីម្ចាស់អាជីវកម្មមុននឹងផ្ដល់កម្ចីជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ