ទិវាជាតិចងចាំ៖ លោកហ៊ុន សែន អំពាវនាវឱ្យរួមគ្នាការពារសន្តិភាព
នៅថ្ងៃទី ២០ខែឧសភានេះ គឺជាទិវាជាតិនៃការចងចាំពីរបបប្រល័យពូជសាសន៍ប៉ុល ពត! ក្នុងឱកាសទិវានេះ លោកនាយករដ្ឋមន្ត្រីហ៊ុន សែន បានផ្ញើសារចូលរួមរម្លឹកភាពឈឺចាប់នៃសង្គ្រាម និងបាន អំពាវនាវឱ្យប្រជាជនខ្មែរ ត្រូវចូលរួមថែរក្សាការពារសន្តិភាព ដើម្បីកុំឱ្យរបបខ្មៅងងឹតត្រលប់មកវិញ។ ចំណែកសាលារាជធានីភ្នំពេញ បានរៀបចំពិធីសាសនាឧទ្ទិសដល់វិញាណក្ខន្ធជនរងគ្រោះពីរបបប្រល័យពូជសាសន៍ នៅសារមន្ទីរបឹងជើងឯក។
ចុះផ្សាយនៅថ្ងៃ៖
ស្តាប់ - ០២:០១
តាមរយៈសារលើបណ្តាញសង្គម នៅថ្ងៃសុក្រនេះ លោកនាយករដ្ឋមន្ត្រីហ៊ុន សែន បានយកឱកាសនេះ រម្លឹកដល់ការបាត់បង់ប្រជាជនខ្មែរប្រមាណជិត ៣លាននាក់ ក្នុងរបបប្រល័យពូជសាសន៍ប៉ុល ពត និងបានបញ្ជាក់ថាភ្នក់ភ្លើងសង្គ្រាម ដែលពលរដ្ឋខ្មែរឆ្លងកាត់ជិត ៣ទស្សវត្ស បន្សល់ទុកត្រឹមតែការឈឺចាប់។
តាមលោកហ៊ុន សែន សង្គ្រាមបានធ្វើឱ្យមានទឹកភ្នែក ការកាប់សម្លាប់ ការបំផ្លិចបំផ្លាញ ការជម្លៀសចេញពីទីលំនៅ និងការបង្ខំឱ្យធ្វើការដូចសត្វធាតុជាដើម។ មិនតែប៉ុណ្ណោះ ប្រជាពលរដ្ឋកម្ពុជា ក៏ត្រូវស្លាប់ដោយគ្មានថ្នាំសង្កូវព្យាបាល គ្មានអាហារបរិភោគគ្រប់គ្រាន់ គ្មានសិទ្ធិសេរីភាព គ្មានលទ្ធិប្រជាធិបតេយ្យ ហើយសូម្បីតែសិទ្ធិរស់រានមានជីវិត ដែលជាសិទ្ធិមូលដ្ឋាន មានពីកំណើតរបស់មនុស្ស ក៏គ្មានដែរ។
ដូច្នេះ លោកប្រមុខដឹកនាំរដ្ឋាភិបាល បានយកឱកាសនេះ អំពាវនាវឱ្យប្រជាពលរដ្ឋខ្មែរចងចាំ រួមគ្នាថែរក្សាការពារសន្តិភាពឱ្យបានគង់វង្ស ដើម្បីកុំអោយរបបនេះវិលត្រឡប់មកវិញ។ តាមលោកហ៊ុន សែន សន្តិភាព បានផ្តល់ឱកាសគ្រប់យ៉ាង ក្នុងការកសាងសង្គមគ្រួសារ សហគមន៍ និងប្រទេសជាតិ ឱ្យកាន់តែរីកចម្រើនទៅមុខទៀត។
ចំណែកសាលារាជធានីភ្នំពេញ នៅថ្ងៃនេះ បានរៀបចំពិធីសាសនា ដើម្បីឧទ្ទិសដល់វិញាណក្ខន្ធប្រជាជនដែលបានបាត់បង់ជីវិតពីរបបខ្មែរក្រហម នៅសារមន្ទីរបឹងជើងឯក។
សូមរម្លឹកជូនថា ការកំណត់យកថ្ងៃ ២០ឧសភា ជាទិវាចងចាំ ព្រោះថ្ងៃ ២០ឧសភា ឆ្នាំ ១៩៧៣ គឺជាថ្ងៃកំណើត របស់សហករនៃរបបកម្ពុជាប្រជាធិបតេយ្យខ្មែរក្រហម ដែលបានបន្តសង្គ្រាមរហូតឈានដល់ការគ្រប់គ្រងរាជធានីភ្នំពេញ នៅថ្ងៃទី១៧ ខែមេសា ឆ្នាំ១៩៧៥។ ពីដំបូងឡើយ ទិវាជាតិនៃការចងចាំ ២០ឧសភា មានឈ្មោះថា «ទិវាចងកំហឹង» ដើម្បីបញ្ជាក់ពីការចងកំហឹងទៅនឹងរបបខ្មែរក្រហម ដែលបានកាប់សម្លាប់ ប្រជាពលរដ្ឋខ្មែរ។ ប៉ុន្តែចាប់ពីឆ្នាំ ២០១៨ នៅពេលរដ្ឋាភិបាល កំណត់យកថ្ងៃនេះជាថ្ងៃបុណ្យជាតិ ក៏មានការប្តូរឈ្មោះជា «ទិវាជាតិនៃការចងចាំ»ដើម្បីជាការរំឭកដល់ជនរងគ្រោះ និងការឈឺចាប់ពីឧក្រិដ្ឋកម្ម ដែលកើតមានក្នុងរបបកម្ពុជាប្រជាធិបតេយ្យ ពីថ្ងៃទី១៧ ខែមេសា ឆ្នាំ១៩៧៥ ដល់ថ្ងៃទី៦ ខែមករា ឆ្នាំ១៩៧៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ