លោក ហ៊ុន សែន ត្រៀមជួបអ្នកគាំទ្រនៅអឺរ៉ុប ខណៈលោកទៅចូលរួមវេទិកាសេដ្ឋកិច្ចពិភពលោក
លោកនាយករដ្ឋមន្ត្រី លោក ហ៊ុន សែន បានចាកចេញពីប្រទេសកម្ពុជាហើយ កាលពីម៉ោងសូន្យនឹង៣០នាទីយប់ថ្ងៃសៅរ៍នេះ ដើម្បីទៅចូលរួមវេទិកាសេដ្ឋកិច្ចពិភពលោក នៅទីក្រុងដាវ៉ូស ប្រទេសស្វីស។ នៅមុនពេលឡើងថ្លែងសុន្ទរកថា ក្នុងពិធីបិទកិច្ចពិភាក្សាក្រោមប្រធានបទ “ទស្សនវិស័យយុទ្ធសាស្ត្រលើអាស៊ាន” និងការថ្លែងសុន្ទរកថា «រាត្រីកម្ពុជា» ដែលរៀបចំដោយក្រុមហ៊ុនឯកជន លោកប្រមុខរដ្ឋាភិបាលកម្ពុជាក៏គ្រោងជួបអ្នកគាំទ្រលោកដូចនៅសហរដ្ឋអាមេរិកដែរ។
ចុះផ្សាយនៅថ្ងៃ៖
ស្តាប់ - ០១:៣៥
តាមការគ្រោងទុកលោកនាយករដ្ឋមន្ត្រី ហ៊ុន សែន នឹងជួបពលរដ្ឋខ្មែរនៅសូរិកប្រទេសស្វីសនៅល្ងាចថ្ងៃទី២១ឧសភា២០២២ ខណៈលោកអះអាងថា មានអ្នកគាំទ្រលោកដែលកំពុងរស់នៅបណ្តាប្រទេសនៅទ្វីបអឺរ៉ុបដែលបានចេញវីដេអូអបអរសាទរដំណើររបស់លោកទៅកាន់តំបន់អឺរ៉ុបនាពេលនេះ។
ក្នុងដំណើទស្សនកិច្ចរយៈពេល៥ថ្ងៃ នៅប្រទេសស្វីស លោក ហ៊ុន សែន នឹងឡើងថ្លែងសុន្ទរកថានៅក្នុងពិធីបិទបញ្ចប់នៃកិច្ចពិភាក្សាជាមួយភាគីពាក់ព័ន្ធ ក្រោមប្រធានបទ «ទស្សនវិស័យយុទ្ធសាស្ត្រលើអាស៊ាន» និងនៅក្នុងកម្មវិធីអាហារការងារថ្ងៃត្រង់ក្រៅផ្លូវការជាមួយថ្នាក់ដឹកនាំសេដ្ឋកិច្ចពិភពលោក ក្រោមប្រធានបទ«ការស្តារសន្តិភាព និងសណ្តាប់ធ្នាប់ឡើងវិញ»។ នេះបើតាមសេចក្តីប្រកាសព័ត៌មានរបស់ក្រសួងការបរទេសកម្ពុជា។
ក្នុងឱកាសស្នាក់នៅប្រទេសស្វីស លោកនាយករដ្ឋមន្ត្រីហ៊ុន សែន ក៏នឹងថ្លែងសុន្ទរកថាក្នុងព្រឹត្តិការណ៍ «រាត្រីកម្ពុជា» ដែលរៀបចំដោយក្រុមហ៊ុន វើលដ៏ ប្រ៊ីជ គ្រុប ក្នុងគោលបំណងទាក់ទាញអ្នកវិនិយោគមកប្រទេសកម្ពុជា ខណៈវេទិកាសេដ្ឋកិច្ចពិភពលោក ចាប់ពីថ្ងៃទី២២ ដល់ថ្ងៃ២៦ ខែឧសភា ឆ្នាំ២០២២ នេះ មានមេដឹកនាំប្រទេស និងអ្នកជំនាញជាង២០០០នាក់ចូលរួម។
តាមគម្រោង លោក ហ៊ុន សែន រំពឹងថា នឹងមានជំនួបពិភាក្សាការងារជាមួយថ្នាក់ដឹកនាំនៃប្រទេសមួយចំនួន ក៏ដូចជាទទួលការចូលជួបសម្តែងការគួរសមពីសំណាក់ឥស្សរជននយោបាយ និងធុរជនពិភពលោកផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ