ទៅដល់អឺរ៉ុប៖ លោក ហ៊ុន សែន ថាEBA លែងជាបញ្ហា តែកូវីដ១៩ទើបជារឿងសម្រាប់កម្ពុជា
ប្រមុខរដ្ឋាភិបាលកម្ពុជា លោក ហ៊ុន សែន នាអំឡុងពេលសំណេះសំណាលជាមួយពលរដ្ឋនៅឯប្រទេសស្វីស បានថ្លែងជាសាធារណៈថា បញ្ហាប្រព័ន្ធអនុគ្រោះពន្ធ EBA លែងជាខ្យល់ខ្មោចស្អីសម្រាប់កម្ពុជាតទៅទៀតហើយ។ ក៏ប៉ុន្តែសម្រាប់លោកនាយករដ្ឋមន្ត្រី ហ៊ុន សែន បញ្ហាកូវីដ១៩ ទើបជារឿងដែលជះឥទ្ធិពលដល់កម្ពុជា ដ្បិតរដ្ឋាភិបាលត្រូវចំណាយថវិការាប់លានដុល្លារ ដើម្បីប្រយុទ្ធប្រឆាំង។
ចុះផ្សាយនៅថ្ងៃ៖
ស្តាប់ - ០២:០៦
«អារឿង EBA វាអត់មានខ្យល់ខ្មោចស្អីទេ រឿងកូវីដ ទើបវាបញ្ហា»។ នេះគឺជាអះអាងរបស់លោកនាយករដ្ឋមន្ត្រី ហ៊ុន សែន នាអំឡុងពេលលោកជួបសំណេះសំណាលជាមួយពលរដ្ឋដែលរស់នៅក្នុងបណ្តាប្រទេសទ្វីបអឺរ៉ុប មុនពេលដែលលោកត្រូវចូលរួមវេទិកាសេដ្ឋកិច្ចពិភពលោក នៅប្រទេសស្វីស។
លោក ហ៊ុន សែន បញ្ជាក់ថា ការនាំចេញរបស់កម្ពុជាទៅកាន់អឺរ៉ុបមានចំនួន៣២៩៩លានដុល្លារ ខណៈការនាំចូលពីអឺរ៉ុបទៅកម្ពុជាវិញ មានចំនួន ៩០៦លានដុល្លារ ហើយបើគិតពីទំហំពាណិជ្ជកម្មមានប្រមាណរហូតដល់ជាង៤ពាន់លានដុល្លារអាមេរិក។ ដូច្នេះសម្រាប់លោកនាយករដ្ឋមន្ត្រី ហ៊ុន សែន បញ្ហាប្រព័ន្ធអនុគ្រោះពន្ធ EBA លែងជាបញ្ហាទៀតហើយ។
បើតាមលោកនាយករដ្ឋមន្ត្រី ហ៊ុន សែន ប្រព័ន្ធអនុគ្រោះពន្ធ EBA គង់តែនឹងត្រូវបាត់បង់ នៅពេលណាដែលសេដ្ឋកិច្ចកម្ពុជាឈានដល់កម្រិតណាមួយ។ លោកថា ទោះបីជាសហភាពអឺរ៉ុប សាកល្បងដកប្រព័ន្ធអនុគ្រោះ EBA ២០% ពីកម្ពុជា ក៏ប៉ុន្តែការនាំចេញនៅតែមានកំណើន។
គួរកត់សម្គាល់ថា ការថ្លែងរបស់លោកនាយករដ្ឋមន្ត្រី ហ៊ុន សែន នៅទ្វីបអឺរ៉ុប ទាក់ទងទៅនឹងបញ្ហាប្រព័ន្ធអនុគ្រោះពន្ធ EBA នាពេលនេះ គឺធ្វើឡើងបន្ទាប់ពីសភាអឺរ៉ុប កាលពីដើមខែឧសភា បានចេញញត្តិចង្អុលទុកមុនថា កម្ពុជានឹងប្រឈមបាត់បង់ប្រព័ន្ធអនុគ្រោះពន្ធ EBA សេសសល់ទាំង ៨០%ទៀត ប្រសិនបើការបោះឆ្នោតទាំងថ្នាក់ក្រោមជាតិនិងថ្នាក់ជាតិ នាពេលដ៏ឆាប់ខាងមុខនេះ មិនបានប្រព្រឹត្តិទៅដោយយុត្តិធម៌និងតម្លាភាព។
សូមរំលឹកថា ក្រោមហេតុផលនៃការរំលោភសិទ្ធិមនុស្សធ្ងន់ធ្ងរជាប្រព័ន្ធនិងការធ្លាក់ចុះលទ្ធិប្រជាធិបតេយ្យ សហភាពអឺរ៉ុបបានសម្រេចកាត់ផ្តាច់ EBA ពីកម្ពុជា ចំនួន២០% កាលពីឆ្នាំ២០២០ ម្តងរួចហើយ។
ក៏ប៉ុន្តែ សម្រាប់លោកនាយករដ្ឋមន្ត្រី ហ៊ុន សែន បញ្ហាកូវីដ១៩ទើបជាអ្វីដែលស្មុគស្មាញសម្រាប់កម្ពុជា បាននិងកំពុងប្រយុទ្ធប្រឆាំង។ ដោយអះអាងប្រាប់ពលរដ្ឋខ្មែរនៅទ្វីបអឺរ៉ុប លោកថា រដ្ឋាភិបាលត្រូវបញ្ចេញថវិកា ប្រមាណ ៤០លានដុល្លារក្នុងមួយខែ ដើម្បីជួយពលរដ្ឋ។ លើសពីនេះ បញ្ហាកូវីដ១៩ បានចាយថវិកាសន្សំរបស់រដ្ឋអស់ជាង ២ពាន់លានដុល្លារអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ