ភូមាមិនទទួលយកសំណើកម្ពុជា ដែលចង់ឲ្យដកចេញការកាត់ទោសប្រហារជីវិត
កាលពីថ្ងៃសៅរ៍ ទី១១ ខែមិថុនា ក្រសួងការបរទេសរបបយោធាភូមា បានឆ្លើយតបចំពោះសំណើកម្ពុជា ដោយពន្យល់ពីនិតិវិធីផ្លូវច្បាប់ ជុំវិញមូលហេតុនៃការកាត់ទោសប្រហារជីវិត ដែលត្រូវតែអនុវត្ត។ បើតាមការចុះផ្សាយរបស់កាសែត BBCភូមា ក្រសួងការបរទេសភូមាក៏បានរៀបរាប់លម្អិតអំពីឧក្រិដ្ឋកម្ម ដែលត្រូវបានចោទប្រកាន់លើសកម្មជនពីរនាក់។
ចុះផ្សាយនៅថ្ងៃ៖
ស្តាប់ - ០៣:៣៥
លោកនាយករដ្ឋមន្ត្រី ហ៊ុន សែន នៅថ្ងៃទី១០មិថុនា បានផ្ញើលិខិតទៅកាន់ លោក មីន អ៊ុងឡាំង ប្រធានក្រុមប្រឹក្សារដ្ឋភូមាឲ្យពិចារណាឡើងវិញ ចំពោះការអនុវត្តទោសប្រហារជីវិតលើក្រុមសកម្មជនប្រឆាំង។
កាលពីថ្ងៃសុក្រ ទី ៣មិថុនា អ្នកនាំពាក្យរបស់របបសឹកភូមាបានប្រកាសថា គេនឹងកាត់ទោសប្រហារជីវិតមនុស្ស៤នាក់ ដែលនៅក្នុងនោះម្នាក់ ជាអតីតសមាជិកសភាមកពីគណបក្ស លោកស្រី អ៊ុងសាន ស៊ូជី គឺ Ko Phyo Zeya Thaw និងម្នាក់ទៀត គឺលោក Ko Jimmy ជាអតីតមេដឹកនាំចលនានិស្សិតដ៏ល្បីឈ្មោះ ដែលធ្លាប់ចេញមុខប្រឆាំងរបបសឹកភូមា កាលពីឆ្នាំ១៩៨៨។ ចំណែកមនុស្សពីរនាក់ផ្សេងទៀត នឹងត្រូវកាត់ទោសប្រហារជីវិត ករណីសម្លាប់ស្ត្រីម្នាក់ ដែលជាចារកិច្ចរបស់យោធាភូមា។
ទោះជាយ៉ាងណាក៏ដោយ ក្រសួងការបរទេសនៃរបបយោធាភូមាបានឆ្លើយតបមកកម្ពុជា កាលពីថ្ងៃសៅរ៍ ទី១១ ខែមិថុនា ជាមួយនឹងការពន្យល់ផ្លូវច្បាប់អំពីមូលហេតុ ដែលការកាត់ទោសប្រហារជីវិតត្រូវតែអនុវត្ត ក៏ដូចជាការរៀបរាប់លម្អិតអំពីឧក្រិដ្ឋកម្ម ដែលត្រូវបានចោទប្រកាន់។ នេះបើយោងតាម BBC ជាភាសាភូមា និងត្រូវបានចុះផ្សាយបន្ត ដោយសារព័ត៌មានភូមា THE IRRAWADDY នៅថ្ងៃទី១៣ ខែមិថុនា។
បច្ចុប្បន្នកម្ពុជាជាប្រធានអាស៊ាន ហើយភូមាគឺជាសមាជិកអាស៊ានមួយ ដែលត្រូវបានគេផាត់ចេញពីកិច្ចប្រជុំរបស់អាស៊ាន ព្រោះតែការមិនគោរពតាមគោលការណ៍របស់អាស៊ាន ក្នុងការដោះស្រាយវិបត្តិក្នុងប្រទេសនេះ។ លោក ហ៊ុន សែន ជានាយករដ្ឋមន្ត្រីបរទេសតែមួយគត់ ដែលបានជួបប្រមុខរបបយោធាដោយផ្ទាល់ ខណៈអ្នកផ្សេងទៀត សូម្បីតែសមាជិកអាស៊ានមួយចំនួនបានគេចចេញពីមេដឹកនាំនៃរបប ដែលបានមកពីការធ្វើរដ្ឋប្រហារ។
លោក ហ៊ុន សែន បានគូសបញ្ជាក់ នៅក្នុងលិខិតផ្ញើជូនលោក មីន អ៊ុងឡាំងថា ការផ្តន្ទាទោសនិងផែនការប្រហារជីវិតលើបុគ្គលដែលប្រឆាំងនឹងក្រុមប្រឹក្សារដ្ឋបាលរដ្ឋ បានបង្កឱ្យមានការព្រួយបារម្ភយ៉ាងខ្លាំងក្នុងចំណោមរដ្ឋសមាជិកអាស៊ាន ក៏ដូចជាដៃគូខាងក្រៅរបស់អាស៊ាន។ កម្ពុជាជឿជាក់ថា ផែនការប្រហារជីវិតនេះ ប្រសិនបើត្រូវបានអនុវត្ត ប្រាកដជានឹងបង្កឱ្យមានប្រតិកម្មអវិជ្ជមានរីករាលដាលពេញសហគមន៍អន្តរជាតិ។
ប្រសិនបើការអនុវត្តទោសប្រហារជីវិតអ្នកទាំង៤ ត្រូវបានគេធ្វើឡើង នោះវានឹងក្លាយជាការប្រហារជីវិតលើកដំបូងក្នុងប្រទេសភូមាចាប់តាំងពីឆ្នាំ១៩៧៦មក។
លោក ប្រាក់ សុខុន រដ្ឋមន្ត្រីការបរទេសកម្ពុជា និងជាប្រេសិតពិសេសនៃប្រធានអាស៊ាន គ្រោងនឹងធ្វើដំណើរទស្សនៈកិច្ចជាលើកទី២ទៅកាន់ភូមា នៅចុងខែមិថុនា ខាងមុខនេះ ដោយសង្កត់ធ្ងន់ថា ការជួបពិភាក្សាជាមួយគ្រប់ភាគីពាក់ព័ន្ធ គឺស្ថិតក្នុងចំណោមការផ្តោតការយកចិត្តទុកដាក់របស់លោកនាពេលនោះ ស្របតាមអាណត្តិរបស់ប្រេសិតពិសេស។ នេះបើតាមសេចក្តីប្រកាសព័ត៌មានរបស់ក្រសួងការបរទេសកម្ពុជា នៅក្រោយជំនួបរវាងលោក ប្រាក់ សុខុន និងរដ្ឋលេខាធិការក្រសួងការបរទេសអូស្ត្រាលី កាលពីថ្ងៃទី១៣ ខែមិថុនា។
លោក ឯម សុវណ្ណារ៉ា អ្នកវិភាគ និងជាសាស្ត្រាចារ្យផ្នែកវិទ្យាសាស្ត្រនយោបាយបានបញ្ជាក់ប្រាប់វិទ្យុបារាំងអន្តរជាតិថា ដំណើរទស្សនៈកិច្ចទៅភូមា នាពេលខាងមុខនេះ មិនមានអ្វីខុសប្លែកពីលើកទី១ទេ ព្រោះភាគីកម្ពុជានឹងជួបតែក្រុមមេដឹកនាំយោធា ដូច្នេះគោលការណ៍នេះ មិនអាចរកដំណោះស្រាយឲ្យភូមាបានទេ។ បើតាមលោក ឯម សុវណ្ណារ៉ា លុះត្រាតែកម្ពុជាមានជំនួបជាមួយភាគីរដ្ឋាភិបាលស្រមោលភូមាមួយទៀត ទើបអាចដោះស្រាយវិបត្តិភូមាបាន។
សូមជម្រាបថាប្រេសិតពិសេសនៃប្រធានអាស៊ាន បានធ្វើដំណើរទស្សនកិច្ចដំបូងនៅភូមា កាលពីថ្ងៃទី២១ ដល់ថ្ងៃទី២៣ ខែមីនា ឆ្នាំ២០២២កន្លងទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ