អង្គការសង្គមស៊ីវិលស្នើឱ្យរដ្ឋាភិបាលព្យាយាមសងបំណុលបរទេសឱ្យត្រឹមត្រូវ ខណៈបំណុលបរទេសកើនជិត១០ពាន់លានដុល្លារ
អង្គការសង្គមស៊ីវិលស្នើឱ្យរដ្ឋាភិបាលគួរបន្តប្រុងប្រយ័ត្នឱ្យបានខ្ពស់ចំពោះទំហំកើនឡើងនៃបំណុលសាធារណៈដែលកម្ពុជាកំពុងជំពាក់បរទេសសព្វថ្ងៃ បើទោះបីទំហំបំណុលបច្ចុប្បន្ននៅមានសុខភាពល្អយ៉ាងណាក្តី។ បើតាមលោក ប៉ិច ពិសី ប្រធានអង្គការតម្លាភាពកម្ពុជា កម្ពុជាគួរតែប្រុងប្រយ័ត្ន និងពិនិត្យអំពីលទ្ធភាពក្នុងការសងបំណុលទៅម្ចាស់បំណុលឱ្យបានត្រឹមត្រូវ ដើម្បីជៀសវាងការធ្លាក់ចូលទៅក្នុងរណ្តៅនៃបំណុលបរទេស។ ក៏ប៉ុន្តែ អ្នកនាំពាក្យរដ្ឋាភិបាលកម្ពុជា លោក ផៃ ស៊ីផាន អះអាងថា កម្ពុជាបានគិតគូរល្អិតល្អន់អំពីសមត្ថភាពនៃការសងត្រឡប់ទៅម្ចាស់កម្ចីវិញ ដោយមិនឱ្យមានបញ្ហាអ្វីកើតឡើងទេ។
ចុះផ្សាយនៅថ្ងៃ៖
ស្តាប់ - ០៣:០១
គិតត្រឹមរយៈពេល៥ខែឆ្នាំ២០២២នេះ ទំហំបំណុលសាធារណៈដែលកម្ពុជាកំពុងជំពាក់បរទេសបានកើនឡើងដល់៩,៨ពាន់លានដុល្លារ រឺស្មើប្រមាណជាង២៣%នៃផលិតផលក្នុងស្រុកសរុបរបស់កម្ពុជា។ ក្នុងនោះបំណុលជាង ៤០% កម្ពុជាជំពាក់ប្រទេសចិន ហើយបំណុលជាង៣០%ផ្សេងទៀត កម្ពុជាជំពាក់ជាមួយដៃគូរអភិវឌ្ឍន៍នានា។ ក្រៅពីនោះ កម្ពុជាជំពាក់បណ្តាប្រទេសមួយចំនួន ក៏ដូចជាធនាគារពិភពលោក និងធនាគារអភិវឌ្ឍន៍អាស៊ី។
លោក ប៉ិច ពិសី ប្រធានអង្គការតម្លាភាពកម្ពុជាយល់ឃើញថា កម្ពុជាពិតជាមិនអាចគេចផុតពីការខ្ចីបំណុលបរទេសដើម្បីយកមកបំពេញតម្រូវការដែលខ្លួនខ្វះខាត ជាពិសេសការយកមកវិនិយោគសាធារណៈនោះទេ ក៏ព្រោះថាកម្ពុជាស្ថិតក្នុងប្រទេសដែលកំពុងអភិវឌ្ឍន៍។ ហើយថវិកាដែលកម្ពុជាត្រូវពឹងផ្អែកចម្បងគឺ ការស្នើហិរញ្ញប្បទានឥតសំណង និងកម្ចីដែលត្រូវសង់ត្រឡប់។
លោក ប៉ិច ពិសី បន្តថា ទោះបីទំហំនៃបំណុលសាធារណៈរបស់កម្ពុជា ធៀបនឹងផលិតផលក្នុងស្រុកសរុបនៅមានអត្រាទាប ដែលអាចធានាបាននូវផាសុខភាពយ៉ាងណាក្តី ក៏ប៉ុន្តែកម្ពុជាត្រូវគ្រប់គ្រងបំណុល និងរៀបចំនីតិវិធីសងបំណុលទាំងដើម ទាំងការទៅកាន់ម្ចាស់បំណុលឱ្យបានត្រឹមត្រូវ និងស្របតាមលក្ខខណ្ឌ។ ការធ្វើបែបនេះ ក៏ដើម្បីឱ្យប្រាកដថា បំណុលដែលកម្ពុជាជំពាក់ជិត១០ពាន់លានដុល្លារនេះ មិនទាញកម្ពុជាឱ្យធ្លាក់ចូលទៅក្នុងរណ្តៅនៃបំណុលបរទេស។
ប្រធានអង្គការតម្លាភាពកម្ពុជារូបនេះ ឱ្យដឹងទៀតថា កម្ពុជាត្រូវប្រុងប្រយ័ត្នឱ្យបានខ្ពស់ចំពោះការខ្ចីបំណុលពីបរទេស ជាពិសេសការសងបំណុលត្រឡប់ទៅវិញ ហើយក៏មិនគួរឱ្យកើតមាននូវរូបភាពពុករលួយជុំវិញកម្ចីថវិកាពីបរទេសនេះដែរ។
ជាការឆ្លើយតប លោក ផៃ ស៊ីផាន អ្នកនាំពាក្យរាជរដ្ឋាភិបាលបានបញ្ជាក់មកវិទ្យុបារាំងអន្តរជាតិRFIថា កម្ពុជាមានឥរិយាបថក្នុងការសងបំណុលទៅកាន់ម្ចាស់បំណុលដោយត្រឹមត្រូវ ខណៈការខ្ចីរបស់កម្ពុជា គឺស្ថិតក្នុងរង្វង់ដែលអាចធានាអំពីសុវត្ថិភាព និងលទ្ធភាពនៃសងត្រឡប់ទៅវិញ។
លោក ផៃ ស៊ីផាន បន្តថា ការខ្ចីបំណុលពីបរទេសរបស់កម្ពុជា គឺមិនយកទៅចាយផ្តេសផ្តាសឥតប្រយោជន៍ឡើយ ដោយកម្ចីទាំងអស់គឺយកមកដើម្បីអភិវឌ្ឍន៍សង្គមជាតិឱ្យរីកចម្រើន និងដើម្បីឆ្លើយតបទៅនឹងផែនការយុទ្ធសាស្ត្ររបស់រដ្ឋាភិបាល ដោយធ្វើយ៉ាងណាឱ្យប្រទេសកម្ពុជាក្លាយជាប្រទេសមានប្រាក់ចំណូលមធ្យមកម្រិតខ្ពស់ក្នុងឆ្នាំ២០៣០ និងប្រាក់ចំណូលកម្រិតខ្ពស់ក្នុងឆ្នាំ២០៥០។
អ្នកនាំពាក្យរាជរដ្ឋាភិបាលរូបនេះបានឱ្យដឹងទៀតថា កម្ពុជាតែងតែប្រុងប្រយ័ត្ននៅរាល់គ្រប់កាលៈទេសៈទាំងអស់ ដោយបច្ចុប្បន្នរដ្ឋាភិបាលបានបែងចែកកញ្ចប់ថវិកាជា៣ ដោយទី១ គឺកញ្ចប់ថវិកាសម្រាប់បើកជូនមន្ត្រីរាជការ ទី២ គឺកញ្ចប់ថវិកាសម្រាប់ទុកសងបំណុលបរទេស និងទី៣ គឺកញ្ចប់សម្រាប់ដាក់ថវិកាសន្សំ។
តែយ៉ាងណា លោក យ៉ង គឹមអេង ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាពព្រួយបារម្ភថា បំណុលសាធារណៈរបស់កម្ពុជានឹងបន្តកើនឡើងនៅថ្ងៃខាងមុខ ប្រសិនបើរដ្ឋាភិបាលយកលុយកម្ចីទាំងនោះមកអភិវឌ្ឍន៍ខុសគោលដៅ។ លោកថា បើកម្ពុជាមិនទាញផលប្រយោជន៍អំពីកម្ចីតាមរយៈការវិនិយោគសាធារណៈទេ កម្ពុជានឹងវ័ណ្ឌករដោយសារបំណុលបរទេសជាមិនខាន។
សូមជម្រាបថា កាលពីឆ្នាំ២០២០ រដ្ឋាភិបាលបានសងកម្ចីទៅកាន់ដៃគូអភិវឌ្ឍន៍ សរុបចំនួន ៣៦០,៣០លានដុល្លារ។ ហើយចាប់ពីឆ្នាំ១៩៩៣ រហូតដល់ចុងឆ្នាំ២០២០ រដ្ឋាភិបាលបានសងបំណុលសរុបចំនួន ២,១១ពាន់លានដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ