ផ្ទៃបឹងទន្លេបាទីជាង២០០ហិកតាត្រូវបានកាត់ទៅឲ្យបុគ្គលឯកជន
ផ្ទៃបឹងទន្លេបាទី ក្នុងខេត្តតាកែវ និងជាប់ស្រុកកណ្តាលស្ទឹង ខេត្តកណ្តាល ចំនួន២២២ហិកតា ត្រូវបានប្រមុខរដ្ឋាភិបាល លោក ហ៊ុន សែន កាត់ទៅឲ្យបុគ្គលឯកជនជាអ្នកកាន់កាប់ក្រោមរូបភាពអភិវឌ្ឍ។ ដូច្នេះផ្ទៃបឹងធម្មជាតិមួយនេះនៅសល់តែជាង៩៧ហិកតាប៉ុណ្ណោះដែលនៅជាសម្បត្តិរបស់រដ្ឋ។ ការប្រគល់បឹងធម្មជាតិទៅឲ្យឯកជននេះធ្វើឲ្យមានប្រតិកម្មចម្រុះពីអ្នកការពារធនធានធម្មជាតិ។
ចុះផ្សាយនៅថ្ងៃ៖
ស្តាប់ - ០២:០១
«សូម្បីតែទន្លេបាទីដែលជាតំបន់ប្រវត្តិសាស្រ្តក៏ត្រូវស្នើលុបដែរហើយជាការលុបដើម្បីផលប្រយោជន៍ឯកជន។យើងស្នើឲ្យមានការអភិរក្ស និងអភិវឌ្ឍទន្លេនេះឲ្យក្លាយជាតំបន់ទេសចរណ៍ធម្មជាតិ វប្បធម៌និងប្រវត្តិសាស្រ្តដែលជួយដល់ប្រាក់ចំណូលសហគមន៍មូលដ្ឋាននិងសុខមាលភាពប្រជាពលរដ្ឋទីក្រុង»។ នេះគឺជាប្រតិកម្មរបស់គណបក្សប្រជាធិបតេយ្យមូលដ្ឋាន បន្ទាប់ពីឃើញអនុក្រឹត្យចុះហត្ថលេខាដោយលោក ហ៊ុន សែន កាលពីថ្ងៃទី២ ខែមីនា ឆ្នាំ២០២២ ស្ដីពីការកំណត់និយាមកាផ្ទៃបឹងទន្លេបាទី ទុកជាសម្បត្តិសាធារណៈរបស់រដ្ឋ និងការធ្វើអនុបយោគពីសម្បត្តិសាធារណៈរបស់រដ្ឋ មកជាសម្បត្តិឯកជនរបស់រដ្ឋនូវផ្ទៃដីស្ថិតក្នុងភូមិសាស្ត្រស្រុកបាទី ខេត្តតាកែវ និងស្រុកកណ្ដាលស្ទឹង ខេត្តកណ្ដាល។
តាមខ្លឹមសារនៃអនុក្រឹត្យនេះ គឺផ្ទៃបឹងទន្លេបាទី ក្នុងខេត្តតាកែវ និងជាប់ស្រុកកណ្តាលស្ទឹង ខេត្តកណ្តាល ចំនួន២២២ហិកតា ត្រូវបានកាត់ទៅឲ្យបុគ្គលឯកជនជាអ្នកកាន់កាប់ក្រោមរូបភាពអភិវឌ្ឍ។ ដូច្នេះផ្ទៃបឹងធម្មជាតិមួយនេះនៅសល់តែជាង៩៧ហិកតាប៉ុណ្ណោះដែលនៅជាសម្បត្តិរបស់រដ្ឋ។
លោក យង់ គឹមអេង ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍ និងសន្តិភាព មិនគាំទ្រការអភិវឌ្ឍន៍ដោយលុបបឹងធម្មជាតិនេះឡើយ ខណៈលោកបារម្ភថា ការធ្វើបែបនឹងធ្វើឲ្យប៉ះពាល់ដល់តំបន់ទេសចរណ៍ដែលមានទាំងប្រាសាទ និងបឹងធម្មជាតិ។ លោកទទួចឲ្យរដ្ឋាភិបាលពិចារណាឡើងវិញចំពោះការសម្រេចចិត្តនេះ។
ដូចគ្នានេះដែរ ប្រធានសមាគមបណ្ដាញយុវជនកម្ពុជា (CYN) លោក អ៊ុល វ៉ាន់ យល់ថា ការអភិវឌ្ឍបែបនេះ គឺធ្វើឲ្យបាត់បង់ធនធានធម្មជាតិ ខណៈលោកមិនដឹងទេថា តើរដ្ឋបានសិក្សាពីផលប៉ះពាល់បរិស្ថាន និងផលប្រយោជន៍ប្រជាពលរដ្ឋនៅមូលដ្ឋានដែរឬយ៉ាងណា។
បើតាមសកម្មជនបរិស្ថានរូបនេះ រដ្ឋគួរតែអនុញ្ញាតឲ្យមានការអភិវឌ្ឍនៅតំបន់ផ្សេងដែលមិនប៉ះពាល់ដល់បឹងធម្មជាតិដែលនៅសេសសល់តិចតួចនេះ ខណៈដីទំនេរជាច្រើនទៀតនៅមិនទាន់អភិវឌ្ឍនៅឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ