ក្រសួងទេសចរណ៍ ប្រកាសឱ្យអាជីវកម្មទេសចរណ៍នៅទូទាំងប្រទេសផ្អាកសកម្មភាព១ថ្ងៃ ដើម្បីកាន់ទុក្ខលោក អាបេ
ក្រសួងទេសចរណ៍កាលពីម្សិលមិញ បានប្រកាសឱ្យបណ្តាអាជីវកម្ម ក្លឹបកម្សាន្ត និងកន្លែងលក់គ្រឿងស្រវឹងទាំងអស់នៅទូទាំងប្រទេស ត្រូវផ្អាកដំណើរការអាជីវកម្មរបស់ខ្លួនរយៈពេល១ថ្ងៃ ដើម្បីចូលរួមកាន់មរណទុក្ខចំពោះមរណភាពរបស់លោក អាបេ ស៊ីនហ្សូ អតីតនាយករដ្ឋមន្ត្រីជប៉ុនដែលត្រូវបានធ្វើឃាតនាពេលកន្លងមក។ ខណៈកាន់កាន់ទុកនៅទូទាំងប្រទេសនេះ ត្រូវបានធ្វើឡើងថ្ងៃអាទិត្យនេះ ហើយចំណែកបណ្តាស្ថាប័នរដ្ឋ-ឯកជន ក៏ត្រូវបង្ហូតទង់ជាតិត្រឹមពាក់កណ្តាលដងផងដែរ។
ចុះផ្សាយនៅថ្ងៃ៖
ស្តាប់ - ០២:១២
ការផ្អាកសកម្មភាពអាជីវកម្មនៅទូទាំងប្រទេស បើតាមសារាចរណែនាំរបស់ក្រសួងទេសចរណ៍កាលពីថ្ងៃទី០៩ កក្ដដា បានសម្រេចឱ្យម្ចាស់ រឺអ្នកគ្រប់គ្រងអាជីវកម្មខារ៉ាអូខេ ក្លឹបកម្សាន្តរង្គសាល-ឌីស្កូ និងបៀរហ្គាឌិន ភោជនីយដ្ឋាន អាហារដ្ឋានទេសចរណ៍ និងកន្លែងលក់គ្រឿងស្រវឹងទាំងអស់នៅទូទាំងប្រទេស ត្រូវផ្អាកសកម្មភាពអាជីវកម្មរបស់ខ្លួនរយៈពេល១ថ្ងៃ គឺនៅថ្ងៃទី១០ កក្តដា ឆ្នាំ២០២២នេះ។
ដោយឡែក បណ្តាស្ថាប័នរដ្ឋ-ឯកជនវិញ ក៏ត្រូវបង្ហូតទង់ជាតិនៅត្រឹមពាក់កណ្តាលដងផងដែរ ដើម្បីចូលរួមកាន់ទុក្ខនៃមរណភាពរបស់លោក ស៊ីនហ្សូ អាបេ អតីតនាយករដ្ឋមន្ត្រីជប៉ុន។ នេះបើយោងតាមសារសម្លេងរបស់លោកនាយករដ្ឋមន្ត្រីកាលពីថ្ងៃទី០៩ កក្តដា។
ក្នុងសារដដែល លោកនាយករដ្ឋមន្ត្រី ហ៊ុន សែន បានលើកឡើងថា ហេតុផលដែលកម្ពុជាចូលរួមកាន់ទុក្ខនៅទូទាំប្រទេស ដោយសារ ជប៉ុនបានជួយកម្ពុជាយ៉ាងច្រើនទៅលើបញ្ហាហេដ្ឋារចនាសម្ព័ន្ធ ការកសាងធនធានមនុស្ស ក៏ដូចជាកម្មវិធីអភិវឌ្ឍន៍ផ្សេងទៀត។ ជប៉ុនក៏បានចូលរួមយ៉ាងសកម្ម នៅក្នុងការផ្សារភ្ជាប់រវាងជប៉ុន និងអាស៊ាន ដែលអាស៊ានចាត់ទុកជប៉ុនគឺជាដៃគូដ៏ល្អមិនអាចខ្វះបាន។
លោកនាយករដ្ឋមន្ត្រីបន្តថា ជប៉ុនក៏បានដើរតួនៅក្នុងក្របខ័ណ្ឌនៃមេគង្គ-ជប៉ុន ដែលមានការប្រជុំជាទៀងទាត់រៀងរាល់ឆ្នាំអមជាមួយនឹងការប្រជុំអាស៊ាន ឬការប្រជុំនៅក្នុងប្រទេសជប៉ុនតែម្តង។
ម្លេ៉ោះហើយ គុណបំណាច់ដ៏ធំរបស់លោក អាបេ ជាមួយនឹងប្រជាជនកម្ពុជា ក៏ដូចជាប្រជាជនក្នុងតំបន់មេគង្គ និងតំបន់អាស៊ាន បានធ្វើឱ្យរាជរដ្ឋាភិបាលកម្ពុជានឹកឃើញទៅដល់សកម្មភាពដ៏សប្បុរស និងស្មោះត្រង់ ដែលនេះពិតជាចាំបាច់មែនទែនដែលកម្ពុជាត្រូវធ្វើកាយវិការ ដើម្បីបង្ហាញនូវសាមគ្គីភាព និងការសោកស្តាយសម្រាប់មរណភាពរបស់លោក។
សូមជម្រាបថា លោក ស៊ីនហ្សូ អាបេ បានទទួលមរណភាពនៅវេលាម៉ោងប្រមាណ៦ល្ងាចក្នុងប្រទេសជប៉ុន រឺម៉ោងប្រមាណ៤ល្ងាចក្នុងប្រទេសកម្ពុជា។ ការស្លាប់របស់លោកអាបេ គឺកើតឡើងដោយសារ លោករងការបាញ់ប្រហារដោយខ្នាន់កាំភ្លើងចំនួន២គ្រាប់ ក្នុងអំឡុងពេលដែលលោកកំពុងឃោសនាស្វែងរកសន្លឹកឆ្នោតជូនបេក្ខជនមកពីគណបក្សប្រជាធិបតេយ្យសេរី ដើម្បីត្រៀមការបោះឆ្នោតជ្រើសរើសតំណាងសភាជាន់ខ្ពស់ក្នុងប្រទេសជប៉ុននៅថ្ងៃអាទិត្យនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ