កម្ពុជារំពឹងទទួលបានភ្ញៀវទេសចរបរទេស១លានបន្ទាប់ពីទទួលបានជាង៥០ម៉ឺននាក់
កម្ពុជារំពឹងទទួលបានភ្ញៀវទេសចរបរទេស១លាននាក់ក្នុងឆ្នាំនេះ និង២លាននាក់នៅឆ្នាំ២០២៣ ព្រោះឆ្នាំ២០២៣កម្ពុជាធ្វើជាម្ចាស់ផ្ទះរៀបចំព្រឹត្តការណ៍កីឡាស៊ីហ្គេមនិងអាស៊ានប៉ារ៉ាហ្គេមលើកទី៣២។ ក្ដីរំពឹងនេះ ត្រូវបានលើកបង្ហាញដោយរដ្ឋមន្ត្រីក្រសួងទេសចរណ៍ នៅថ្ងៃទី១២កក្កដានេះ ក្នុងពិធីបើកសន្និបាតបូកសរុបការងារទេសចរណ៍ក្រោយវិបត្តិជំងឺកូវីដ-១៩ដំណាក់កាលទី១នៃឆមាសទី១ឆ្នាំ២០២២។
ចុះផ្សាយនៅថ្ងៃ៖
ស្តាប់ - ០២:១៨
ក្ដីរំពឹងរបស់រដ្ឋមន្ត្រីក្រសួងទេសចរណ៍លោក ថោង ខុន បែបនេះដោយសំអាងលើរយៈពេល៦ខែក្នុងឆ្នាំ២០២២នេះ កម្ពុជាទទួលបានភ្ញៀវទេសចរអន្តរជាតិជាង៥០ម៉ឺននាក់កើនឡើង៣៩៤ភាគរយ បើធៀបនឹងពេលដូចគ្នាក្នុងឆ្នាំ២០២១។ តែចំនួននេះបានថយចុះបើធៀបនឹងរយៈពេលដូចគ្នាក្នុងឆ្នាំ២០១៩មុខផ្ទុះកូវីដ១៩។ ចំពោះភ្ញៀវទេសចរជាង៥០ម៉ឺននាក់នេះ ភាគច្រើនមកប្រភពមកពីប្រទេសវៀតណាម ថៃ ចិន សហរដ្ឋអាមេរិក ឥណ្ឌូណេស៊ី បារាំង កូរ៉េ ម៉ាឡេស៊ី អង់គ្លេស អូស្រ្តាលី និងឥណ្ឌា។ ចំណែកភ្ញៀវទេចរជាតិមានចំនួន៦៨ម៉ឺននាក់។
បើតាមលោក ថោង ខុន មានហេតុផលមួយចំនួនទៀតដែលរំពឹងនឹងទទួលបានទេសចរបរទេស១លាននាក់នៅក្នុងឆ្នាំ២០២២ និង២លាននាក់នៅក្នុងឆ្នាំ២០២៣ ដោយសាររដ្ឋាភិបាលបានសម្រួលលក្ខខណ្ឌសម្រាប់ភ្ញៀវទេសចរបរទេសនិងអ្នកដំណើរអន្តរជាតិចូលមកប្រទេសកម្ពុជា ជាបន្តបន្ទាប់ ពិសេសការសម្រេចបើកការធ្វើដំណើរតាមច្រកទ្វារអន្តរជាតិឡើងវិញ និងផ្ដល់ទិដ្ឋាការពេលមកដល់ដោយលុបចោលលក្ខខណ្ឌតម្រូវឲ្យបង្ហាញលទ្ធផលPCR។
ហើយចុងក្រោយនេះ កម្ពុជាបានសម្រេចអនុញ្ញាត្តលើកលែងការធ្វើចត្តាឡីស័កចំពោះទេសចរជាតិនិងអន្តរជាតិ ដែលមិនទាន់បានចាក់វ៉ាក់សាំងឬមិនទាន់បានចាក់គ្រប់ដូសដោយគ្រាន់តែតម្រូវឲ្យធ្វើតេស្តរហ័សតែប៉ុណ្ណោះ។ ដូច្នេះការកាត់បន្ថយនូវរបាំងនៃការធ្វើដំណើរទាំងនេះ បានធ្វើឲ្យមានកំណើនភ្ញៀវទេសចរផ្ទៃក្នុងរួមនឹងការមកដល់របស់ភ្ញៀវអន្តរជាតិក៏មានការកើនឡើងដែរ ហើយជើងហោះហើរចូលមកកម្ពុជាក៏មានការកើនឡើងជាបន្តបន្ទាប់គួរឲ្យកត់សម្គាល់។
ប៉ុន្តែយ៉ាងមិញ តាមការព្យាករណ៍របស់អង្គការទេសចរណ៍ពិភពលោកចំនួនទេសចរអន្តរជាតិក្នុងឆ្នាំ២០២២ អាចចុះចន្លោះពី៣០ទៅ៤០ភាគរយ បើធៀបនឹងចំនួនទេចរណ៍អន្តរជាតិក្នុងឆ្នាំ២០១៩មុនមានវិបត្តិកូវីដ១៩ដោយសារទេសចរណ៍ពិភពលោកកំពុងរងការគំរាមកំហែងនិងរងផលប៉ះពាល់ជាអវិជ្ជមានពីវិបត្តិនិងបញ្ហាប្រឈ មនានាដូចជាៈការវិវត្តជាបន្តបន្ទាប់នៃមេរោគកូវីដ១៩បំប្លែងថ្មី វិបត្តិនៅអ៊ុយក្រែនដែលជះឥទ្ធិពលធ្វើឲ្យមានការកើនឡើងជាអតិផរណាជារួម ការកើនឡើងថ្លៃប្រេង ការថមថយអំណាចទិញរបស់ភ្ញៀវ រួមនឹងល្បឿនខុសៗគ្នានៃការបន្ធូរបន្ថយការរឹតត្បិតលើការធ្វើដំណើរនិងរបាំងនានារបស់ប្រទេសនីមួយៗជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ