លោកហ៊ុន សែន៖ ទេសចរណ៍កម្ពុជា ដែលកំពុងរើបឡើង អាចត្រូវបំផ្លាញដោយបញ្ហាថ្មីបន្ថែម
បន្ទាប់ពីបានធូរស្រាលបន្តិចពីវិបត្តិកូវីដ១៩ វិស័យទេសចរណ៍ក្នុងប្រទេសកម្ពុជា បានជួបភាពល្អប្រសើរ ដោយអាចទាក់ទាញបានទេសចរទាំងអន្តរជាតិ និងផ្ទៃក្នុងឡើងវិញជាបណ្តើរៗ។ ប៉ុន្តែដោយសារវិបត្តិថ្មីចេះតែកើតមាន ដូចជាការឡើងថ្លៃតម្លៃប្រេងសាំងទូទាំងពិភពលោក បូករួមនឹងការអនុវត្តនយោបាយ សូន្យកូវីដរបស់ចិនផង បាននិងកំពុងតែធ្វើឱ្យវិស័យទេសចរណ៍កម្ពុជា ប្រឈមនឹងហានិភ័យទៅវិញ ស្របពេលដែលកម្ពុជាព្យាយមផ្សព្វផ្សាយទេសចរណ៍កីឡា ពេលធ្វើជាម្ចាស់ផ្ទះរៀបចំការប្រកួតកីឡាស៊ីហ្គេមនៅឆ្នាំ ២០២៣ខាងមុខ។ នេះគឺជាការលើកឡើងរបស់លោកនាយករដ្ឋមន្ត្រីហ៊ុន សែន ក្នុងពិធីបិទសន្និបាតបូកសរុបការងារទេសចរណ៍កម្ពុជា នៅព្រឹកថ្ងៃព្រហស្បតិ៍នេះ ។
ចុះផ្សាយនៅថ្ងៃ៖
ស្តាប់ - ០២:១៥
ក្នុងពិធីបិទសន្និបាតបូកសរុបការងារទេសចរណ៍ ការបូកសរុបផែនការស្តារ និងលើកស្ទួយវិស័យទេសចរណ៍កម្ពុជា ក្នុងនិងក្រោយវិបត្តិជំងឺកូវីដ១៩ ដំណាក់កាលទី១ (២០២០-២០២១) និងឆមាសទី១ ឆ្នាំ២០២២ និងលើកទិសដៅផែនការស្តារឡើងវិញនូវវិស័យទេសចរណ៍ក្នុងដំណាក់កាលទី២ (ឆមាសទី២ ឆ្នាំ២០២២-២០២៣) ដែលធ្វើឡើងក្នុងសណ្ឋាគារ នៅទីក្រុងភ្នំពេញ នាថ្ងៃព្រឹកថ្ងៃទី ១៤ខែកក្កដានេះ លោកនាយករដ្ឋមន្ត្រីហ៊ុន សែន បានសម្តែងក្តីបារម្ភពីការបំផ្លាញវិស័យទេសចរណ៍កម្ពុជា ដោយសារតែវិបត្តិសកលដែលផុតពីមួយចូលមួយមិនចប់នេះ។
សង្គ្រាមរុស្ស៊ីឈ្លានពានអ៊ុយក្រែន និងការដាក់ទណ្ឌកម្ម ធ្វើឱ្យមានភាពមិនច្បាស់លាស់នៃសេដ្ឋកិច្ចពិភពលោក។ ហើយបើតម្លៃប្រេងឥន្ធនៈនៅតែខ្ពស់ បូករួមនឹងវិធានាការសូន្យកូវីដរបស់ចិនផងនោះ វានឹងធ្វើឱ្យតម្លៃសំបុត្រយន្តហោះកាន់តែឡើងថ្លៃគុណនឹង២ ដែលជាក់ច្បាស់ ធ្វើឱ្យរំខានជាខ្លាំងដល់វិស័យទេសចរណ៍កម្ពុជា ស្របពេលដែលកម្ពុជា មានគម្រោងទាញយកប្រយោជន៍ច្រើនពីការធ្វើជាម្ចាស់ផ្ទះរៀបចំការប្រកួតកីឡាប្រចាំតំបន់អាស៊ីអាគ្នេយ៍ ស៊ីហ្គេម ឆ្នាំ ២០២៣ខាងមុខ។
តាមលោកនាយករដ្ឋមន្ត្រីហ៊ុន សែន បញ្ហារបស់ចិន គឺពិតជាធ្វើឱ្យប៉ះពាល់មិនត្រឹមតែកម្ពុជាទេ តែក៏ប៉ះពាល់ដល់ប្រទេសជាច្រើនដូចគ្នា ព្រោះថាទេសចរមកពីចិន គឺមានច្រើនជាងគេ។ ប៉ុន្តែលោកនាយករដ្ឋមន្ត្រី ក៏ឯកភាពជាមួយនឹងវិធានការការពារសុខុមាលភាពរបស់ប្រជាជនចិន។
ប្រឈមនឹងបញ្ហាទាំងនេះ លោកនាយករដ្ឋមន្ត្រីហ៊ុន សែន បានដាក់ចេញជាអនុសាសន៍ ៧ចំនុច ដើម្បីពង្រឹងវិស័យទេសចរណ៍កម្ពុជា ដូចជាការបន្តតាមដាន និងវិភាគស្ថានភាពវិស័យទេសចរណ៍កម្ពុជា តំបន់ និងសកលលោក។ បន្តអនុវត្តកម្មវិធីគាំពារអាជីវកម្មទេសចរណ៍ តាមរយៈការផ្តល់ការអនុគ្រោះផ្នែកសារពើពន្ធ កម្មវិធីសហហិរញ្ញប្បទាន និងកម្មវិធីផ្តល់ការធានាឥណទាន។ បង្កើនភាពទាក់ទាញគោលដៅកម្ពុជា សម្រាប់ទីផ្សារ ទេសចរណ៍ជាតិ និងអន្តរជាតិ។ ពង្រឹងការអនុវត្តយន្តការអភិបាលកិច្ចទេសចរណ៍ថ្មី។ បន្តជំរុញចលនាទេសចរណ៍ផ្ទៃក្នុងឱ្យបានកាន់តែខ្លាំង ក្រោមស្មារតីនៃយុទ្ធនាការ «ទស្សនាស្រុកយើង៖ទេសចរណ៍ ផ្សារភ្ជាប់ទឹកដី ឬ ស្រឡាញ់ជាតិ ត្រូវស្គាល់ទឹកដី»។ ពង្រឹង និងបង្កើនលទ្ធភាពនៃការតភ្ជាប់មកកាន់កម្ពុជា ទាំងតាមផ្លូវអាកាស ផ្លូវគោក និងផ្លូវទឹក។
ហើយក្នុងនោះ ស្របពេលដែលកម្ពុជាត្រូវធ្វើជាម្ចាស់ផ្ទះរៀបចំការប្រកួត កីឡាស៊ីហ្គេម-អាស៊ានប៉ារ៉ាហ្គេមឆ្នាំ ២០២៣ លោកហ៊ុន សែន បាន ដាក់ចេញជាយុទ្ធនាការ «ទស្សនាកម្ពុជាឆ្នាំ ២០២៣» ដើម្បីបង្កើនការផ្សព្វផ្សាយទេសចរណ៍កម្ពុជា។
គួរជម្រាបជូនថា កម្ពុជា ជាប្រទេសដំបូង ក្នុងតំបន់ ដែលបានបើកចំហ ដោយកាត់បន្ថយរបាំងទទួលទេសចរអន្តរជាតិ ក្នុងការចូលមកកាន់ប្រទេសកម្ពុជា។ កាលពីខែមីនា ឆ្នាំ២០២២ កម្ពុជា ក៏សម្រេចបើកការធ្វើដំណើរតាមច្រកទ្វារអន្តរជាតិឡើងវិញ និងផ្តល់ទិដ្ឋាការនៅពេលមកដល់ ព្រមទាំងលុបចោលលក្ខខណ្ឌតម្រូវឱ្យបង្ហាញលទ្ធផល PCR តេស្តអវិជ្ជមាន និងមិនតម្រូវឱ្យធ្វើតេស្តរហ័ស នៅពេលមកដល់ ដោយគ្រាន់តែបង្ហាញបណ្ណ ឬ ព័ត៌មាននៃការចាក់វ៉ាក់សាំងគ្រប់ដូស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ