អង្គការសង្គមស៊ីវិលថា អាជ្ញាធរនៅខ្វះឆន្ទះដើម្បីបង្ក្រាបបទល្មើសព្រៃឈើក្នុងដែនជម្រកសត្វព្រៃព្រះរការ
សហគមន៍ជនជាតិដើមភាគតិចកួយបានអះអាងថា បទល្មើសព្រៃឈើនៅក្នុងដែនជម្រកសត្វព្រៃព្រះរការកំពុងបន្តកើនឡើងជារៀងថ្ងៃនេះ ខណៈក្នុងរយៈពេល៣ថ្ងៃ សហគមន៍បានរកឃើញបទល្មើសព្រៃឈើចំនួន២៦០ករណី និងបន្ទះក្តារចំនួន៣៦៧សន្លឹក។ បើតាម សហគមន៍ជនជាតិដើមភាគតិចកួយ ការកើនឡើងនៃបទល្មើសព្រៃឈើនេះ សរបញ្ជាក់អំពីកម្សោយនៃសមត្ថភាពរបស់មន្ត្រីអាជ្ញាធរពាក់ព័ន្ធ ជាពិសេសក្រសួងបរិស្ថាន។ ក៏ប៉ុន្តែលោក នេត ភក្ត្រា អ្នកនាំពាក្យក្រសួងបរិស្ថានឆ្លើយតបថា បទល្មើសធនធានធម្មជាតិទ្រង់ទ្រាយធំលែងកើតមានទៀតហើយ នៅមានបទល្មើសខ្នាតតូចនៅក្នុងតំបន់ការពារធម្មជាតិ។
ចុះផ្សាយនៅថ្ងៃ៖
ស្តាប់ - ០២:៣៦
នៅមានភស្តុតាងមួយចំនួនទៀតដែល សហគមន៍ជនជាតិដើមភាគតិចកួយបានរកឃើញនៅពេលដែលពួកគេចុះល្បាត ក្នុងដែនជម្រកសត្វព្រៃព្រះរការ។ ភស្តុតាងទាំងអស់នោះមានដូចជា ដែកឆាប ចំនួន១២ដើម ប្រេងម៉ាស៊ូត និងសាំង។ ចំណែកឈើដែលសហគមន៍បានរកឃើញថា បានរងការកាប់បំផ្លាញមានមុខកាត់ចាប់ពី៣០សង់ទីម៉ែត្រ ដល់១៥០សង់ទីម៉ែត្រ ហើយភាគច្រើនជាប្រភេទឈើគគីរ ពពេល ផ្តៀក កកោះ និងឈើទាល ជាឈើដែលសហគមន៍ទាញអនុផលជ័រច្បោះ។
ប្រធានសមាគមបណ្តាញយុវជនកម្ពុជា លោក អ៊ុល វ៉ាន់ បានបញ្ជាក់ថា បទល្មើសព្រៃឈើនៅក្នុងដែនជម្រកសត្វព្រៃព្រះរការពិតជាកំពុងកើនឡើងមែន បើទោះបីមានការចូលរួមពីប្រជាសហគមន៍ និងអង្គការសង្គមស៊ីវិលក៏ដោយ។ លោក អ៊ុល វ៉ាន់យល់ថា នេះជាធ្វេសការសប្រហែសរបស់អាជ្ញាធរដែលបណ្តែតបណ្តោយឱ្យជនល្មើសបន្តមានសកម្មភាពនៅក្នុងដែនជម្រកសត្វព្រៃបែបនេះ។ លោកថា ប្រសិនបើអាជ្ញាធរមានភាពម៉ឺងម៉ាត់ក្នុងការចាប់ជនល្មើស នោះបទល្មើសព្រៃឈើនឹងមិនកើតមានទៀតនោះទេ។
ជាការកត់សម្គាល់ នៅព្រឹកថ្ងៃទី១៩ កក្តដា លោក សាន ម៉ាឡា សកម្មជនការពារបរិស្ថានមួយរូបបានសរសេរនៅលើបណ្តាញសង្គមផ្ទាល់ខ្លួនដែរថា ការកើនឡើងនូវបទល្មើសព្រៃឈើជារៀងរាល់ថ្ងៃ បានឆ្លុះបញ្ចាំងឲ្យឃើញពីកម្សោយនូវសមត្ថភាព និងឆន្ទៈរបស់ក្រសួងបរិស្ថាន អាជ្ញាធរពាក់ព័ន្ធ ក្នុងការការពារព្រៃឈើ និងធនធានធម្មជាតិ។
ក្រោយការលើកឡើងពីអង្គការសង្គមស៊ីវិល និងសកម្មជនការពារបរិស្ថាន អ្នកនាំពាក្យក្រសួងបរិស្ថាន លោក នេត ភក្ត្រាបានឆ្លើយតបវិញ បទល្មើសធនធានធម្មជាតិទ្រង់ទ្រាយធំលែងកើតមានទៀតហើយ នៅមានបទល្មើសខ្នាតតូចនៅក្នុងតំបន់ការពារធម្មជាតិដែលក្រសួងបរិស្ថាន និងអាជ្ញាធរពាក់ព័ន្ធបាននិងកំពុងបន្តទប់ស្កាត់ និងបង្ក្រាបដោយអនុវត្តទាំងវិធានការច្បាប់ និងអនុវត្តវិធានការសេដ្ឋកិច្ចផង។
លោក នេត ភក្ត្រាបានបញ្ជាក់ទៀតថា ក្រសួងកំពុងអនុវត្តនូវវិធានការអភិវឌ្ឍសេដ្ឋកិច្ចនៅមូលដ្ឋានដើម្បីផ្តល់ជម្រើសថ្មី មុខរបរ និងផ្តល់ចំណូលជូន ប្រជាពលរដ្ឋនៅសហគមន៍ ដើម្បីកាត់បន្ថយសម្ពាធ លើធនធានធម្មជាតិ។
សម្រាប់ លោក នេត ភក្ត្រា ក្រសួងមិនមែនដើរនិយាយឱ្យពិរោះ ដើររាប់គល់ឈើចងក្រងរបាយការណ៍តាមរបៀបវារៈដែលបានកំណត់ដើម្បីប្តូរយកលុយជំនួយបន្តអាយុជីវិតអង្គការខ្លួនឱ្យបានរស់នៅឡើយ។
តែយ៉ាងណា សហគមន៍ជនជាតិដើមភាគតិចកួយ និងសមាគមបណ្តាញយុវជនកម្ពុជា ស្នើឱ្យអាជ្ញាធរបញ្ឈប់សកម្មរារាំងសិទ្ធិសេរីភាពរបស់ពួកគេក្នុងការចូលរួមការពារព្រៃឈើ និងធនធានធម្មជាតិរបស់កម្ពុជា។
សូមជម្រាបថា ដែនជម្រកសត្វព្រៃព្រះរការមានទំហំ ៩០៣៦១ហិកតា មានព្រំប្រទល់ជាប់ស្រុកចំនួនបីនៃខេត្តព្រះវិហារ ដែលរួមមានស្រុកត្បែងមានជ័យ ស្រុកឆែប និងស្រុកជាំក្សាន្ត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ