លោក សុខ ឥសាន ចំអកឲ្យអាមេរិកដែលធ្វើច្បាប់ដាក់ទណ្ឌកម្មកម្ពុជាតែមិនដាក់ទណ្ឌកម្មវៀតណាម
ការដែលសហរដ្ឋអាមេរិកធ្វើច្បាប់ដើម្បីដាក់ទណ្ឌតែទៅលើមន្ត្រីជាន់ខ្ពស់មួយចំនួនរបស់កម្ពុជាគឺជានិន្នាការនយោបាយដែលមិនផ្សាភ្ជាប់ទៅនឹងការពិត។ លោក សុខ ឥសាន ថែមទាំងបានចំអកឲ្យសហរដ្ឋអាមេរិកដែលធ្វើច្បាប់ដាក់ទណ្ឌកម្មកម្ពុជាមួយករណីទៀតនេះ គឺមានស្តង់ដារពីរ ខណៈអាមេរិកមិនដាក់ទណ្ឌកម្មលើវៀតណាមដែលមិនមានការគោរពសិទ្ធិមនុស្ស។ នេះគឺជាប្រតិកម្មរបស់អ្នកនាំពាក្យគណបក្សកាន់អំណាច ខណៈដែលសេចក្តីព្រាងច្បាប់ស្តីពីសិទ្ធិមនុស្ស និងប្រជាធិបតេយ្យសម្រាប់កម្ពុជា បានឆ្លងផុតដៃគណៈកម្មការជំនាញព្រឹទ្ធសភាអាមេរិកហើយ។
ចុះផ្សាយនៅថ្ងៃ៖
ស្តាប់ - ០២:១៦
ដោយមិនទាន់អាចសន្និដ្ឋានថា សេចក្តីព្រាងច្បាប់ ស្តីពីសិទ្ធិមនុស្ស និងប្រជាធិបតេយ្យសម្រាប់កម្ពុជា ដែលហៅកាត់ថា S.3052 នេះអាចចេញរួច ឬអត់នោះ លោក សុខ ឥសាន យល់ថាច្បាប់នេះត្រូវបានតាក់តែងឡើងនៅក្រោមហេតុផលនយោបាយដែលមិនផ្សារភ្ជាប់ទៅនឹងការពិតនៅកម្ពុជា។
អ្នកនាំពាក្យគណបក្សកាន់អំណាច ចាត់ទុក ការធ្វើច្បាប់ដើម្បីដាក់ទណ្ឌកម្មលើមន្ត្រីជាន់ខ្ពស់កម្ពុជាបន្ថែមទៀតនេះ គឺមិនមានស្តង់ដាពីរ ខណៈដែលប្រទេសវៀតណាមដែលគ្មានការគោរពសិទ្ធិមនុស្សទាល់តែសោះ អាមេរិកមិនខ្វល់ខ្វាយដាក់ទណ្ឌកម្ម បែរជាទៅចាប់ដៃរកស៊ីជាមួយគ្នា ហើយដាក់ទណ្ឌកម្មតែលើកម្ពុជា។
បើតាម លោក សុខ ឥសានត នេះមិនមែនជារឿងចម្លែកទេ ការដែលអាមេរិកធ្វើច្បាប់ដាក់ទណ្ឌកម្មប្រទេសណាមួយនោះ គឺដោយសារតែប្រទេសមហាអំណាចមួយនេះ គ្មានទទួលបានប្រយោជន៍ពីប្រទេសនោះ ហើយថា ហេតុផលសិទ្ធិមនុស្ស និងប្រជាធិបតេយ្យគឺគ្រាន់តែលេសប៉ុណ្ណោះ។
ប្រតិកម្មបែបនេះរបស់អ្នកនាំពាក្យគណបក្សប្រជាជនកម្ពុជា គឺដោយសារតែ គណៈកម្មការកិច្ចការបរទេសនៃព្រឹទ្ធសភាអាមេរិក បានអនុម័ត កាលពីថ្ងៃទី១៩កក្កដា២០២២ ទៅលើសេចក្តីព្រាងច្បាប់ស្តីពីសិទ្ធិមនុស្ស និងប្រជាធិបតេយ្យសម្រាប់កម្ពុជា ដែលហៅកាត់ថា S.3052 ដែលគេរំពឹងថា នឹងត្រូវបានព្រឹទ្ធសភាអនុម័តនៅពេលខាងមុខនេះ។ ច្បាប់នេះមានខ្លឹមសារដាក់ទណ្ឌកម្ម និងបង្កកទ្រព្យសម្បត្តិមន្រ្តីជាន់ខ្ពស់រដ្ឋាភិបាលកម្ពុជាមួយចំនួន ព្រមទាំងអ្នកដែលរួមចំណែករំលោភសិទ្ធិមនុស្សនៅកម្ពុជាក្រោយពីកាចាប់ខ្លួនលោក កឹម សុខា និងរំលាយគណបក្សសង្គ្រោះជាតិ។
ប៉ុន្តែសេចក្តីព្រាងច្បាប់នេះ ត្រូវបានជាប់គាំងនៅក្នុងអាណត្តិរដ្ឋបាល ដូណាល់ ត្រាំ ហើយទើបមានការវិវត្តនិ៍ឡើងវិញនៅក្នុងរដ្ឋបាល លោក ចូបៃ ឌិន កាលពីអំឡុងខែតុលា ឆ្នាំ២០២១។
ទោះជាយ៉ាងណា សហរដ្ឋអាមេរិក ក៏បានធ្វើច្បាប់ចំនួន ២រួចមកហើយ គឺច្បាប់ Global Magnitsky Act) និងច្បាប់ ស្តីពីប្រជាធិបតេយ្យកម្ពុជាឆ្នាំ២០២១ ឬដែលហៅថា HR.4686 ហើយក៏មានមន្ត្រីយោធាកម្ពុជាយ៉ាងតិច៤រូបរងទណ្ឌកម្ម ដូចជា លោក ហ៊ីង ប៊ុនហៀង លោក គន់ គីម លោក ចៅ ភិរុណ និងលោក ទៀ វិញ ខណៈអ្នកជំនួញ គឺលោក ទ្រី ភាព និងក្រុមហ៊ុនរបស់លោក ព្រមទាំងក្រុមហ៊ុនរដ្ឋចិន យូឌីជី (UDG) ដែលកំពុងវិនិយោគនៅខេត្តកោះកុងក៏ត្រូវបានដាក់ទណ្ឌកម្ម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ