លោក សៀម ភ្លុក សុំកិច្ចអន្តរាគមន៍ពីលោក ស ខេង ដើម្បីទម្លាក់បទចោទ ករណីក្លែងបន្លំស្នាមមេដៃបង្កើតបក្ស
ស្ថាបនិកនៃអតីតគណបក្សបេះដូងជាតិ បានស្នើសុំក្រសួងមហាផ្ទៃឱ្យជួយទម្លាក់ចោលការចោទប្រកាន់ជុំវិញករណីក្លែងបន្លំឯកសារ ឫស្នាមមេដៃប្រជាពលរដ្ឋដើម្បីបង្កើតគណបក្សនយោបាយនៅក្រសួងមហាផ្ទៃ។ លោក សៀម ភ្លុក ស្ថាបនិកអតីតគណបក្សបេះដូងជាតិបានអះអាងក្នុងលិខិតស្នើសុំថា លោកមិនបានបោកប្រាស ឫបន្លំឯកសារ ស្នាមមេដៃប្រជាពលរដ្ឋណាមួយ ដើម្បីបង្កើតគណបក្សនយោបាយទេ ហើយការចាប់ឃុំខ្លួនក្រោមពាក្យបណ្តឹងរបស់ក្រសួងមហាផ្ទៃ គឺជារឿងអយុត្តិធម៌។
ចុះផ្សាយនៅថ្ងៃ៖
ក្នុងលិខិតស្នើសុំពីតំណាងស្ថាបនិកគណបក្សបេះដូងជាតិ លោក ស្លៀម ភ្លុក ដែលកំពុងជាប់ពន្ធនាគារបាននិយាយថា លោកមិនបានក្លែងបន្លំឯកសារ ស្នាមដៃប្រជាពលរដ្ឋ ហើយក៏មិនមានចេតនាក្លែងបន្លំឯកសារដើម្បីកុហកបោកប្រកាសក្រសួងមហាផ្ទៃដើម្បីបង្កើតគណបក្សបេះដូងជាតិនោះដែរ។ ចំពោះករណីមានការក្លែងបន្លំមែននោះ លោក ស្លៀម ភ្លុកចាត់ទុកថា ជាកំហុសអចេតនា ខ្ជីខ្ជាប៉ុណ្ណោះ ដោយមិនមែនជាចេតនាក្នុងការប្រព្រឹត្តិបទល្មើសនោះទេ ខណៈរឿងនេះក៏មិនបានបង្កផលប៉ះពាល់ដល់ស្ថាប័នណាមួយឡើយ។
លោក សៀម ភ្លុកបន្តនិយាយនៅក្នុងលិខិតស្នើសុំកិច្ចអន្តរាគមន៍ពី លោក ស ខេង រដ្ឋមន្ត្រីក្រសួងមហាផ្ទៃទៀតថា ការបដិសេធមិនចុះបញ្ជីគណបក្សបេះដូងជាតិរបស់ខ្លួន គឺជាទណ្ឌកម្មសមល្មមសម្រាប់គណបក្សបេះដូងជាតិ។ ក៏ប៉ុន្តែក្រសួងថែមទាំងចោទប្រកាន់ និងចាប់ឃុំខ្លួនលោកទៀត។ ម្ល៉ោះហើយ លោក សៀម ភ្លុកយល់ថា នេះជាទណ្ឌកម្មធ្ងន់ធ្ងរ និងអយុត្តិធម៌។
វិទ្យុបារាំងអន្តរជាតិRFIមិនទាន់អាចសុំការអត្ថាធិប្បាយពីលោក ជូង ជូងី មេធាវីការពារក្តីឱ្យលោក សៀម ភ្លុកបាននៅឡើយនៅថ្ងៃទី២៤ កក្តដា។
តែយ៉ាងណា មេធាវីរូបនេះ ធ្លាប់បានបញ្ជាក់ថា ពាក្យស្នើសុំទៅកាន់លោក ស ខេង ខាងក្រសួងមហាផ្ទៃបានទទួលរួចរាល់ហើយកាលពីថ្ងៃទី២២ ខែកក្តដា។ ក៏ប៉ុន្តែការឆ្លើយតបយ៉ាងនោះ លោកនៅមិនទាន់ទទួលបាននៅឡើយ។
ចំណែក លោក ខៀវ សុភ័ក្ត្រ អ្នកនាំពាក្យក្រសួងមហាផ្ទៃបានថ្លែងមកវិទ្យុបារាំងអន្តរជាតិRFIថា ក្រសួងកំពុងពិនិត្យសំណើរបស់លោក សៀម ភ្លុក។ ប៉ុន្តែ ជាគោលការណ៍ និងនីតិវិធីច្បាប់ គឺតុលាការជាអ្នកដោះស្រាយ និងសម្រេចលើរឿងក្តីនេះ។ លោក ខៀវ សុភ័ក្ត្របន្តថា ការលើកលែងទោស ដរាបណាបុគ្គលដែលរងការចោទប្រកាន់ព្រមទទួលស្គាល់នូវកំហុស និងទោសរបស់ខ្លួន។
ជាក់ស្តែង កាលពីថ្ងៃទី១៨ ខែ ឧសភា ឆ្នាំ២០២២ សភាស៊ើបសួរសាលាឧទ្ធរណ៍រាជធានីភ្នំពេញ លោក ឃុន លាងម៉េង បានប្រកាសសាលដីកាដោយមិនអនុញ្ញាតឱ្យលោក សៀម ភ្លុក អាចរស់នៅក្រៅឃុំឡើយ ដោយហេតុផលថា ដើម្បីទុកជនត្រូវចោទរូបនេះ បន្តនីតិវិធីនៅតុលាការទៀត។
សម្រាប់ មន្រ្តីស៊ើបអង្កេតជាន់ខ្ពស់ និងជាអ្នកនាំពាក្យរបស់សមាគមសិទ្ធិមនុស្សអាដហុក លោក ស៊ឹង សែនករុណាបានគូសបញ្ជាក់ថា បើតាមផ្អែកតាមផ្លូវច្បាប់ ហើយក្រសួងមហាផ្ទៃពិនិត្យឃើញថា គណបក្សបេះដូងជាតិពិតជាប្រព្រឹត្តិអំពើខុសមែននោះជារឿងដែលគួរឱ្យសង្ស័យនោះទេ ប៉ុន្តែប្រសិនបើជាប់ពាក់ព័ន្ធនឹងរឿងនយោបាយ ទើបជារឿងដែលអង្គការសង្គមស៊ីវិលត្រូវតាមដានបន្ថែមទៀត។
លោក ស៊ឹង សែនករុណា បន្ថែមទៀតថា ប្រសិនបើក្រសួងមហាផ្ទៃពិតជាចង់ឃើញគណបក្សនយោបាយប្រកួតប្រជែងគ្នាមែន ករណីនេះគួរតែសម្របសម្រួលនិងស្វែងរកការជជែកពិភាក្សាដើម្បីរកដោះស្រាយ។
សូមជម្រាបថា លោក សៀម ភ្លុកត្រូវបាន សមត្ថកិច្ចឃាត់ខ្លួនកាលពីថ្ងៃទី២៧ មេសា ឆ្នាំ២០២២ ក្រោមបទចោទ«ក្លែងបន្លំ និងប្រើប្រាស់លិខិតក្លែង»។ ការចោទប្រកាន់របស់តុលាការនេះ ធ្វើឡើងបន្ទាប់ពីក្រសួងមហាផ្ទៃពិនិត្យឃើញថា លោកបានក្លែងបន្លំស្នាមមេដៃ និងឯកសារ ដើម្បីបង្កើតគណបក្សបេះដូងជាតិ នៅក្រសួងមហាផ្ទៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ