របបសឹកភូមាប្រហារជីវិតសកម្មជនជួនគ្នានឹងអាស៊ានមិនឲ្យចូលរួមកិច្ចប្រជុំរដ្ឋមន្ត្រីការបរទេស
អាជ្ញាធរនៃរបបសឹកភូមាបានប្រហារជីវិតសកម្មជនប្រជាធិបតេយ្យ៤នាក់ ដែលត្រូវបានចោទប្រកាន់ថា ជាអ្នកអនុវត្ត"អំពើភេរវកម្ម"។ នេះបើតាមប្រព័ន្ធផ្សព្វផ្សាយរដ្ឋ ដែលបានចុះផ្សាយនៅថ្ងៃទី២៥ ខែកក្កដានេះ។ ជាការប្រហារជីវិតលើកដំបូងរបស់ប្រទេសអាស៊ីអាគ្នេយ៍មួយនេះ ក្នុងរយៈពេលប៉ុន្មានទសវត្សរ៍ចុងក្រោយ។ ការប្រហារជីវិតសកម្មជនភូមាពេលនេះ ត្រូវគេមើលឃើញថាជាការផ្គើនមួយទៅនឹង សហគមន៍អាស៊ាន ដែលបានផាត់ភូមាចេញនៅក្នុងកិច្ចប្រជុំរដ្ឋមន្ត្រីការបរទេសអាស៊ានលើកទី៥៥ នៅដើមខែសីហាខាងមុខ។
ចុះផ្សាយនៅថ្ងៃ៖
ស្តាប់ - ០២:១៤
សកម្មជនប្រជាធិបតេយ្យភូមា៤នាក់ ត្រូវអាជ្ញាធរប្រហារជីវិត បន្ទាប់ពីពួកគេត្រូវបានចោទប្រកាន់ពីបទអនុវត្តអំពើភេរវកម្ម។ នេះបើតាមប្រព័ន្ធផ្សព្វផ្សាយរដ្ឋភូមា The Irrawaddy។ តាមរយៈសាលក្រមកាត់ទោសប្រហារជីវិតកាលពីខែមករា ឆ្នាំ២០២២បុរសសកម្មជនទាំងបួននាក់នេះ ត្រូវបានចោទប្រកាន់ថាបានជួយកងជីវពលក្នុងការប្រយុទ្ធប្រឆាំងតទល់នឹងកងទ័ពភូមា ដែលបានដណ្តើមអំណាចនៅក្នុងរដ្ឋប្រហារកាលពីឆ្នាំទៅ និងបានធ្វើការបង្ក្រាបយ៉ាងបង្ហូរឈាមលើគូប្រជែងរបស់ខ្លួន។
ជាការកត់សម្គាល់ ការប្រហារជីវិតសកម្មជនភូមាជាលើកដំបូងនៅអាស៊ីអាគ្នេយ៍ បន្ទាប់ពីមិនដែលមានអស់ជាច្រើនទសវត្សរ៍នោះ ត្រូវគេមើលឃើញថាទំនងជាការផ្គើនមួយពាក់ព័ន្ធនឹងចំណាត់ការផាត់ភូមាចេញពីកិច្ចប្រជុំថ្នាក់តំបន់នៃរដ្ឋមន្ត្រីការបរទេសលើកទី៥៥ ដែលនឹងធ្វើឡើងនៅកម្ពុជានាដើមខែសីហាខាងមុខ។ របបសិកភូមា នៅមិនទាន់មានការជឿនលឿននៅក្នុងការគោរព និងអនុវត្តន៍តាមកិច្ចព្រមព្រៀងជាឯកច្ឆន៥ចំណុចរបស់អាស៊ាននៅឡើយ។
លោក ឯម សុវណ្ណារ៉ា សាស្ត្រាចារ្យផ្នែកវិទ្យាសាស្ត្រនយោបាយបានកត់សម្គាល់ថា ការប្រហារជីវិតសកម្មជនភូមាពេលនេះ គឺជាការបង្ហាញថាអាស៊ាន និងយន្តការអន្តរជាតិ នឹងមិនមានឥទ្ធិពលអ្វីទៅលើរបបសឹកភូមាទេ ហើយការអនុវត្តន៍កុងសង់ស៊ីសរបស់អាស៊ានក៏នឹងមិនមានជោគជ័យដែរ។
សូមរំលឹកថា លោកនាយករដ្ឋមន្ត្រី ហ៊ុន សែន កាលពីខែមិថុនាកន្លងទៅ បានផ្ញើលិខិត១ច្បាប់ទៅកាន់ លោក មីន អ៊ុងឡាំង ប្រធានក្រុមប្រឹក្សារដ្ឋភូមាឲ្យពិចារណាឡើងវិញ ចំពោះការអនុវត្តទោសប្រហារជីវិតលើក្រុមសកម្មជនប្រឆាំង។ ក៏ប៉ុន្តែរបបសឹកភូមាបានប្រកាសថា គេនឹងកាត់ទោសប្រហារជីវិតមនុស្ស៤នាក់ ដែលនៅក្នុងនោះម្នាក់ ជាអតីតសមាជិកសភាមកពីគណបក្ស លោកស្រី អ៊ុងសាន ស៊ូជី គឺ Ko Phyo Zeya Thaw និងម្នាក់ទៀត គឺលោក Ko Jimmy ជាអតីតមេដឹកនាំចលនានិស្សិតដ៏ល្បីឈ្មោះ ដែលធ្លាប់ចេញមុខប្រឆាំងរបបសឹកភូមាកាលពីឆ្នាំ១៩៨៨។ ចំណែកមនុស្សពីរនាក់ផ្សេងទៀត ត្រូវបានកាត់ទោសប្រហារជីវិត ករណីសម្លាប់ស្ត្រីម្នាក់ ដែលជាចារកិច្ចរបស់យោធាភូមា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ