ខេត្តព្រះសីហនុចាប់ដៃជាមួយក្រសួងសេដ្ឋកិច្ចរកឯកជនមកវិនិយោគលើការសាងសងអគារដែលទុកចោល
រដ្ឋបាលខេត្តព្រះសីហនុកំពុងធ្វើការជាមួយក្រសួងសេដ្ឋកិច្ចនិងហិរញ្ញវត្ថុ លៃលកធ្វើយ៉ាងណាឲ្យអគារចំនួន១១៥០ទីតាំងដំណើរការសាងសង់ឡើងវិញ ក្រោយសកម្មភាពសាងសង់ត្រូវបានផ្អឹបទុកចោលដោយសារកូវីដ១៩ និងការចាកចេញរបស់ក្រុមអ្នកវិនិយោគចិនបន្ទាប់ពីរដ្ឋាបាលបិទហ្គេមអនឡាញ។
ចុះផ្សាយនៅថ្ងៃ៖
ស្តាប់ - ០២:០៧
ថ្លែងប្រាប់វិទ្យុបារាំងអន្តរជាតិRFI នៅថ្ងៃទី២៦កក្កដានេះ លោក ឡុង ឌីម៉ង អភិរងខេត្តព្រះសីហនុលើកឡើងថា ដើម្បីឲ្យអគារចំនួន១.១៥០ទីតាំងដំណើរការសាងសង់ឡើងវិញ ចាំបាច់ត្រូវការចូលរួមពីគ្រប់ភាគីពាក់ព័ន្ធទាំងអស់ដូចជាៈ ក្រសួងពាក់ព័ន្ធដែលជាជើងដៃរបស់រដ្ឋាភិបាល អាជ្ញាធរខេត្ត វិស័យឯកជន អ្នកជំនាញផ្នែកអចលនទ្រព្យ និងវិស័យធនាគារ។
ក្នុងនាមជាអាជ្ញាធរខេត្ត លោក ឡុង ឌីម៉ង មើលឃើញថា បញ្ហានេះត្រូវការជាចាំបាច់ការចូលរួមពីវិស័យឯកជនដើម្បីគៀងគររកអ្នកវិនិយោគថ្មីរួមផ្សំនឹងការលើកទឹកចិត្តយ៉ាងសំខាន់ពីរដ្ឋាភិបាល។ លោកបន្ថែមថា ភាពចាំបាច់មួយទៀតនោះអាចនឹងមានការដេញចេញជាយន្តការមួយច្បាស់លាក់នៅពេលខាងមុខដើម្បីប្រមូលធាតុចូលស្វែងដំណោះស្រាយព្រោះករណីអគារខ្លះវិវាទឡើងដល់តុលាការ។
បើតាមលោក ឡុង ឌីម៉ង ប្រសិនបើអគារជាង១ពាន់កន្លែងនេះត្រូវបានសាងសង់ឡើងវិញក្នុងពេលឆាប់វាបានក្លាយជាផ្នែកមួយយ៉ាងសំខាន់ក្នុងការស្ដារសេដ្ឋកិច្ចកម្ពុជាឲ្យមានកំណើនខ្ពស់។ បើពុំដូច្នោះទេ ភាពនៅទ្រឹងរបស់អគារជាង១ពាន់កន្លែង នឹងប៉ះពាល់ដល់ផែនការមេក្នុងកំណត់យកខេត្តព្រះសីហនុជាប៉ូលសេដ្ឋកិច្ចពហុបំណង។
នៅសំណុំរឿងអគារជាប់គាំងគ្មានអ្នកសាងសង់នេះដែរ កាលពីឆ្នាំទៅអភិបាលលោក គួច ចំរើន ធ្លាប់ប្រាប់ថា ក្រុមហ៊ុនអចលនទ្រព្យនៅក្នុងស្រុកចំនួន ៣ បានចុះកិច្ចព្រមព្រៀងសហការជាមួយក្រុមហ៊ុនអចលនទ្រព្យនៅប្រទេសសិង្ហបុរី ដើម្បីរួមគ្នាសម្របសម្រួលដោះស្រាយវិវាទផ្សេងៗ ដោយធ្វើយ៉ាងណា ដើម្បីឱ្យអគារដែលបានផ្អាកការសាងសង់នៅខេត្ដព្រះសីហនុ បានដំណើរការឡើងវិញ ដែលការចុះកិច្ចព្រមព្រៀងនេះ ធ្វើឡើងតាមរយៈកិច្ចសម្របសម្រួលពីក្រសួងសេដ្ឋកិច្ច និងហិរញ្ញវត្ថុ។
វិស័យសំណង់ក្នុងខេត្ដព្រះសីហនុ គិតចាប់តាំងពីឆ្នាំ ២០១៧ រហូតដល់ខែវិច្ឆិកា ឆ្នាំ ២០២១ មានសំណង់សរុប ១ ៦៦១ គម្រោង ជាមួយទុនវិនិយោគ មានប្រមាណជាង ៨ ៤០០ លានដុល្លារអាមេរិក។ ក្នុងនោះសំណង់អគារខ្ពស់ចាប់ពី ៥ ជាន់ រហូតដល់ ៥៣ ជាន់ គឺមានចំនួន ៦២០ គម្រោង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ