ប្រធានអាស៊ាន៖ ការប្រហារជីវិតសកម្មជនបក្សប្រឆាំង៤រូប ជាទង្វើដែលមិនអាចអត់ឱនឲ្យបាន
កម្ពុជាក្នុងនាមជាប្រធានអាស៊ានបានសម្តែងការតក់ស្លុត និងសោកសៅក្រៃលែងដោយសារមេដឹកនាំយោធាភូមាបានប្រហារជីវិតសកម្មជនបក្សប្រឆាំងចំនួន៤រូប បើទោះបីជាលោកនាយករដ្ឋមន្ត្រី ហ៊ុន សែន និងសមាជិកអាស៊ានឯទៀត បានស្នើសុំឲ្យរបបសឹកភូមាពិចារណាឡើងវិញលើសេចក្តីសម្រេចផ្តន្ទាទោសសកម្មជនទាំងនោះក៏ដោយ។ សេចក្តីថ្លែងការណ៍របស់ប្រធានអាស៊ានដូច្នេះ ធ្វើឡើងនៅថ្ងៃតែមួយ ក្រោយរបបសឹកភូមាប្រហាជីវិតសកម្មជនបក្សប្រឆាំងនៅថ្ងៃចន្ទម្សិលមិញ និង២សប្តាហ៍ក្រោយទស្សនកិច្ចរបស់ប្រេសិតពិសេសប្រធានអាស៊ានលើកទី២ ទៅកាន់ភូមា។
ចុះផ្សាយនៅថ្ងៃ៖
ស្តាប់ - ០២:៥៧
ប្រទេសកម្ពុជា ដែលជាប្រធានអាស៊ានប្តូរវេននៅឆ្នាំ២០២២នេះ បានចាត់ទុកការប្រហារជីវិតសកម្មជនបក្សប្រឆាំងទាំង ៤រូប ពីសំណាក់មេដឹកនាំយោធាភូមាថាជាបញ្ហាដែលអាស៊ានត្រូវយកចិត្តទុកដាក់យ៉ាងខ្លាំង។
នៅក្នុងសេចក្តីថ្លែងការណ៍របស់ខ្លួនកាលពីថ្ងៃចន្ទ ប្រធានអាស៊ាន បានកត់សម្គាល់ថាការអនុវត្តទោសប្រហារជីវិត គឺធ្វើឡើងតែ១សប្តាហ៍មុនកិច្ចប្រជុំរដ្ឋមន្ត្រីការបរទេសអាស៊ានលើកទី៥៥ គឺជាទង្វើរដែលមិនអាចអត់ឱនឲ្យបានធ្ងន់ធ្ងរណាស់ ព្រោះវាបានទាញថយក្រោយនូវវឌ្ឍនភាព និងថែមទាំងសបញ្ជាក់ច្បាស់ពីកង្វះឆន្ទៈគាំទ្រកិច្ចខិតខំប្រឹងប្រែងជាពិសេសរបស់ប្រធានអាស៊ាន ក្នុងការជួយពន្លឿនវឌ្ឍភាពនៃការអនុវត្តន៍កិច្ចព្រមព្រៀងជាឯកច្ឆន្ទ៥ចំណុច។
សេចក្តីថ្លែងការណ៍បន្តថាអាស៊ាននៅតែប្រកាន់ខ្ជាប់គោលការណ៍ដែលមានចែងក្នុងធម្មនុញ្ញអាស៊ាន និងកិច្ចព្រមព្រៀងជាឯកច្ឆន្ទ៥ចំណុច ហើយក្នុងនាមជាប្រធានអាស៊ាន កម្ពុជាសូមលើកបន្ទរនូវសម្លេងដ៏លើសលុបក្នុងមជ្ឈដ្ឋានអាស៊ាន ក៏ដូចជាសហគមន៍អន្តរជាតិ ដែលជំរុញឲ្យអាជ្ញាធរទីក្រុងណៃពិដោ ចាត់វិធានការជាក់ស្តែង ដើម្បីអនុវត្តកិច្ចព្រមព្រៀងឯកច្ឆន្ទ៥ចំណុចឲ្យបានពេញលេញ ប្រកបដោយប្រសិទ្ធភាព។
ជាមួយគ្នានេះ ក្រុមសមាជិកសភាអាស៊ានដើម្បីសិទ្ធិមនុស្ស (APHR) កាលពីម្សិលមិញក៏បានជំរុញផងដែរឲ្យប្រេសិតពិសេស និងរដ្ឋសមាជិកអាស៊ាន ថ្កោលទោសការប្រហារជីវិតលើសកម្មជនដែលជាអ្នកទោសនយោបាយចំនួន ៤រូប ពីសំណាក់របបសឹកភូមា។
លោក កាសិត ភិរម្យ សមាជិកគណៈកម្មាធិការនាយករបស់ ក្រុមសមាជិកសភាអាស៊ានដើម្បីសិទ្ធិមនុស្ស និងជាអតីតរដ្ឋមន្ត្រីការបរទេសថៃនោះ ស្នើឲ្យមានការពិចារណាឡើងវិញ ពីវិធីសាស្ត្រក្នុងការដោះស្រាយវិបត្តិនៅភូមា ដោយការចាប់ផ្តើមដាក់សម្ពាធជាទណ្ឌកម្មជាក់លាក់ទៅលើរបបសឹកភូមា និងហាមប្រាម មិនឲ្យក្រុមមេដឹកនាំរបបសឹកភូមាធ្វើដំណើរទៅជាន់ដីតំបន់អាស៊ានជាដើម។ លោកថាការប្រហារជីវិត សកម្មជននយោបាយបក្សប្រឆាំង ៤រូប គឺជាអំពើយង់ឃ្នងនៃប្រព័ន្ធយុត្តិធម៌ របស់របបសឹកភូមា។
សូមរំលឹកថាសកម្មជនប្រជាធិបតេយ្យភូមា៤នាក់ក្នុងនោះមានអតីតតំណាងរាស្ត្រម្នាក់ផង រួមមានលោក ភ្យូ ហ្សេយ៉ា ថរ លោក ក្យរ មីនយូ លោក ឡា មីយូ អោង និងលោក អោង ធូរ៉ា ហ្ស ត្រូវបានអាជ្ញាធរប្រហារជីវិត បន្ទាប់ពីពួកគេរងនូវការចោទប្រកាន់ពីបទអនុវត្តអំពើភេរវកម្ម។ តាមរយៈសាលក្រមកាត់ទោសប្រហារជីវិតកាលពីខែមករា ឆ្នាំ២០២២ បុរសសកម្មជនទាំងបួននាក់នេះ ត្រូវបានចោទប្រកាន់ថាបានជួយកងជីវពលក្នុងការប្រយុទ្ធប្រឆាំងតទល់នឹងកងទ័ពភូមា ដែលបានដណ្តើមអំណាចនៅក្នុងរដ្ឋប្រហារកាលពីឆ្នាំ២០២១កន្លងទៅ និងបានធ្វើការបង្ក្រាបយ៉ាងបង្ហូរឈាមលើគូប្រជែងរបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ