កម្ចីប្រាក់អនឡាញធ្វើឲ្យស្ត្រីខ្លះរងគ្រោះដោយការជំរិតទារប្រាក់ក្រោមរូបភាពអាក្រាត
បណ្ដាញកម្ចីប្រាក់អនឡាញ កំពុងដាក់គោលដៅលើស្រ្តីខ្មែរ នៅលើបណ្ដាញសង្គមហ្វេសប៊ុក និងតេឡេក្រាម ដោយទាញអ្នកទាំងនោះឱ្យធ្លាក់ក្នុងបំណុលវ័ណ្ឌក និងការជំរិតទារប្រាក់ តាមរយៈការប្រើប្រាស់រូបភាព និងវីដេអូអាក្រាតរបស់ជនរងគ្រោះ។ នេះជាការរកឃើញរបស់អង្គការលីកាដូនៅក្នុងយុទ្ធនាការនៅថ្ងៃនេះក្រោមឈ្មោះថា«ត្រូវក្លាហាននិយាយពី ប្រាក់កម្ចីអនឡាញ និងការជំរិតទារប្រាក់ខុសច្បាប់»។ បើតាមអង្គការសិទ្ធិមនុស្សដដែលនេះ ក្រុមហ៊ុនប្រព័ន្ធផ្សព្វផ្សាយសង្គម និងអាជ្ញាធរ មិនទាន់បានចាត់វិធានការលើរឿងនេះទេ ដោយទុកឱកាសឱ្យក្រុមជំរិតទារប្រាក់ទាំងនេះ កេងប្រវ័ញ្ចលើស្រ្តីមួយចំនួនដោយនិទណ្ឌភាព ។
ចុះផ្សាយនៅថ្ងៃ៖
ស្តាប់ - ០២:២៦
ជាករណីជាក់ស្តែង កាលពីឆ្នាំមុន អង្គការលីកាដូ បានផ្ដល់សេវាមួយចំនួនដល់ស្ត្រីបីនាក់ ដែលរងការបៀតបៀនដោយអ្នកផ្ដល់កម្ចីមិនផ្លូវការ។ ស្ត្រីម្នាក់ៗជួបប្រទះរឿងរ៉ាវស្រដៀងគ្នា ដោយដំបូងពួកគេ បានខ្ចីប្រាក់ប្រមាណ ៥០ដុល្លារពីក្រុមហ៊ុនដែលផ្សព្វផ្សាយនៅលើហ្វេសប៊ុក ដើម្បីផ្គត់ផ្គង់ការចំណាយប្រចាំថ្ងៃ ឬព្យាបាលជំងឺ ប៉ុន្តែចុងក្រោយត្រូវបានក្រុមហ៊ុនគំរាមហែកកេរ្ដិ៍ និងជំរិតទារប្រាក់ បន្ទាប់ពីបានផ្ញើរូបភាព និងវីដេអូអាក្រាត នៅពេលពួកគេព្យាយាមគេចចេញពីបំណុលវ័ណ្ឌក ។
បំណុលវ័ណ្ឌករ គឺដោយសារតែកម្ចីតូចៗតាមអនឡាញនេះ មានអត្រាការប្រាក់ដ៏ខ្ពស់ និងភាពមិនច្បាស់លាស់នៃលក្ខខណ្ឌកម្ចី។ បន្ទាប់មក អ្នកផ្ដល់ប្រាក់កម្ចីថ្មី បានចាប់ផ្ដើមទាក់ទងទៅកាន់ជនរងគ្រោះតាមរយៈកម្មវិធីតេឡេក្រាម ដើម្បីស្នើផ្ដល់កម្ចីថ្មីទៀត ។ ក្រោយមក ក្រុមទាំងនេះ ក៏បានចាប់ផ្ដើមទាក់ទងឥតឈប់ឈរទៅមិត្តភក្ដិ និងក្រុមគ្រួសាររបស់ជនរងគ្រោះ ដើម្បីដាក់សម្ពាធឱ្យមានការបង់សង ។ទាំងនេះគឺជាការរៀបរាប់នៅក្នុងរបាយការណ៏របស់លីកាដូនៅថ្ងៃទី១សីហា២០២២។
បើតាមរបាយការណ៍នេះ នៅពេលសម្ពាធឈានដល់ចំណុចធ្ងន់ធ្ងរ ក្រុមថ្មីមួយដែលបានដាក់ឈ្មោះថា Loanly បានស្នើផ្ដល់កម្ចីក្នុងទំហំធំមួយ ឬគ្រប់គ្រាន់សម្រាប់ស្ត្រីម្នាក់ៗយកទៅសងបំណុលតូចៗទាំងនោះ ប៉ុន្តែជាដំបូង ទាមទារឱ្យស្ត្រីទាំងនេះផ្ញើឱ្យពួកគេនូវរូបភាព ឬវីដេអូអាក្រាតរបស់ខ្លួន តាមរយៈកម្មវិធីតេឡេក្រាម ដោយភ្ជាប់ជាមួយទីតាំង និងឯកសារសម្គាល់ខ្លួន ។
ដោយសារមានអារម្មណ៍ថា ជាប់ក្នុងអន្ទាក់ និងរងការបៀតបៀនពីអ្នកផ្ដល់ប្រាក់កម្ចីតូចៗ ស្ត្រីទាំងនេះ បានយល់ព្រមស្នើសុំកម្ចី និងទាញយកកម្មវិធី Loanly ដែលអាចឱ្យក្រុមហ៊ុនចូលមើលបញ្ជីទំនាក់ទំនងនៅក្នុងទូរសព្ទរបស់ជនរងគ្រោះបាន។ ស្ត្រីម្នាក់ៗ បានទទួលប្រាក់តែប៉ុន្មានរយដុល្លារប៉ុណ្ណោះតាមរយៈសេវាផ្ទេរប្រាក់អ៊ីម៉ាន់នី (eMoney) គឺតិចជាងចំនួនដែលបានសន្យា ដោយក្រុមហ៊ុនLoanly អះអាងថា ចំណែកផ្សេងទៀតនៃប្រាក់កម្ចី ត្រូវបានកាត់ជាថ្លៃសេវា ។
លោក អំ សំអាត នាយកប្រតិបត្តិអង្គការលីកាដូ បញ្ជាក់ប្រាប់វិទ្យុបារាំងអន្តរជាតិRFI បន្ថែមថា អង្គការនេះទទួលបានការសុំជំនួយពីស្ត្រីខ្មែរចំនួន៣នាក់លើករណីកម្ចីប្រាក់តាមអនឡាញនេះ ហើយទីបំផុតពួកគេ ធ្លាក់ក្នុងបំណុលវ័ណ្ឌក និងការជំរិតទារប្រាក់ តាមរយៈការប្រើប្រាស់រូបភាព និងវីដេអូអាក្រាត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ