ក្រសួងរ៉ែថា ក្រុមហ៊ុនមកពីប្រទេសកាណាដា កំពុងសិក្សាលទ្ធភាពបូមប្រេងនៅកម្ពុជា ខណៈប្រទេស៤ផ្សេងទៀតក៏មានបំណងដូចគ្នា
អគ្គនាយកដ្ឋានប្រេងកាត នៃក្រសួងរ៉ែ និងថាមពលបានឱ្យដឹងថា គិតមកទល់ពេលនេះមានក្រុមហ៊ុនមកពីបណ្តាប្រទេសចំនួន៥ហើយដែលមានបំណង និងកំពុងសិក្សាអំពីលទ្ធភាពវិនិយោគការបូមប្រេងនៅប្លុកអេរបស់កម្ពុជា។ បើតាម អគ្គនាយកដ្ឋានប្រេងកាត ក្នុងចំណោមក្រុមហ៊ុនទាំង៥ គឺក្រុមហ៊ុនមកពីប្រទេសកាណាដា កំពុងសិក្សាវាយតម្លៃនូវលទ្ធភាព និងវិនិយោគលើវិស័យបូមប្រេងនៅប្លុកអេ(អប្សរា)របស់កម្ពុជា។
ចុះផ្សាយនៅថ្ងៃ៖
ស្តាប់ - ០២:២៨
លោក ចៀប សួរ អគ្គនាយកនៃអគ្គនាយកដ្ឋានប្រេងកាត បានថ្លែងថា រដ្ឋកំពុងឱ្យក្រុមហ៊ុនឈ្មោះ Enercam Resource Co. ltdដែលមានប្រភពមកពីប្រទេសកាណាដា សិក្សានូវលទ្ធភាព និងវិភាគទិន្នន័យនានា មុននឹងឈានដល់ការសម្រេចប្រូមប្រេងនៅប្លុកអេរបស់កម្ពុជា ជំនួសកន្លែងរបស់ក្រុមហ៊ុនKris Energy ដែលបានក្ស័យធន់កាលពីឆ្នាំ២០២១កន្លងទៅ។
បើតាម លោក ចៀប សួរ ក្រុមហ៊ុនមកពីប្រទេសកាណាដានេះ នៅមិនទាន់បានបញ្ចប់ការសិក្សានៅឡើយ ខណៈរដ្ឋនៅមិនទាន់ច្បាស់ថា ក្រុមហ៊ុនEnercamនេះ អាចធ្វើការបូមប្រេងនៅប្លុកអេរបស់កម្ពុជានោះដែរ។ តែយ៉ាងណា ការចូលខ្លួនមកសិក្សានូវលទ្ធភាពវិនិយោគលើវិស័យប្រូមប្រេងនៅកម្ពុជាដែលបានផ្អាកជិត១ឆ្នាំនេះ គឺជាក្តីសង្ឃឹមថ្មី របស់កម្ពុជា។ ក្តីសង្ឃឹមថ្មី ពីព្រោះថា ប្រទេសកម្ពុជា គឺជាទីតាំងសក្តានុពលសម្រាប់អ្នកវិនិយោគិនបរទេសសម្លឹងមើលឱកាសក្នុងការបូមប្រេងរបស់កម្ពុជា។
ដោយស្ថិតក្នុងស្ថានភាពតម្លៃប្រេងនៅលើពិភពលោកកំពុងឡើងថ្លៃផង អគ្គនាយកនៃអគ្គនាយកដ្ឋានប្រេងកាតរូបនេះបានលើកឡើងថា អ្នកវិនិយោគិនបរទេសតែងតែចាប់អារម្មណ៍ទៅលើប្រទេសដែលមានប្រភពប្រេងល្អដូចកម្ពុជានេះឯង។
ចំណែក ជុំវិញសំណុំរឿងប្រេងឆៅជាង៣០ម៉ឺនបារ៉ែល រឺស្មើប្រមាណជិត៤៧លានលីត្រ ដែលត្រូវបាននាវាMT Strovolos លួចដឹកចេញពីដែនទឹកកម្ពុជា លោក ចៀប សួរ ក៏បានបញ្ជាក់ដែរថា ដំណឹងប្រេងនេះកំពុងវិវត្តន៍ទៅរកភាពវិជ្ជមានច្រើន ដោយអាចនឹងនាំត្រឡប់មកកម្ពុជាវិញនាពេលឆាប់ៗខាងមុខនេះ។
គួរជម្រាបថា ក្រុមហ៊ុន៤ផ្សេងទៀតដែលមានបំណងចង់មកវិនិយោគការបូមប្រេងនៅកម្ពុជា ខាងអគ្គនាយកដ្ឋានប្រេងកាតមិនទាន់បញ្ជាក់ឈ្មោះក្រុមហ៊ុននីមួយៗបាននោះទេក្រៅពីក្រុមហ៊ុនមកពីប្រទេសកាណាដា។ ក៏ប៉ុន្តែក្រុមហ៊ុនទាំងអស់នោះគឺមានមកពីបណ្តាប្រទេសមួយចំនួនដូចជា៖ ប្រទេសថៃ ចិន ម៉ាឡេស៊ី និងកាហ្សាក់ស្តង់។
សូមរំឭកបន្តិចថា ប្រេងឆៅរបស់កម្ពុជាជាង៣០ម៉ឺនបារ៉ែល ត្រូវបានក្រុមហ៊ុនMT Strolovos លួចដឹកចេញពីដែនទឹកកម្ពុជា កាលពីអំឡុងថ្ងៃទី០៤ មិថុនា ឆ្នាំ២០២១។ ការលួចដឹកចេញនេះ ភាគីក្រុមហ៊ុននាវាដឹកប្រេងបានអះអាងថា ដោយសារតែក្រុមហ៊ុន KrisEnergy ដែលជាក្រុមហ៊ុនទទួលបានសិទ្ធិបូមប្រេងក្នុងប្លុកអេ រឺហៅថាប្លុកអប្សរារបស់កម្ពុជា មិនបានបង់ប្រាក់មកឱ្យខ្លួន ក្រោយក្រុមហ៊ុននេះប្រកាសក្ស័យធន់។ ក្រោយមក នាវាដឹកប្រេងនោះ ក៏ត្រូវបានអាជ្ញាធរឥណ្ឌូនេស៊ីចាប់បាន និងរក្សាទុកប្រេងរបស់កម្ពុជា ខណៈភាគីកម្ពុជាកំពុងរៀបចំនិតិវិធីបញ្ចូនប្រេងមកកម្ពុជាវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ