កិច្ចប្រជុំរដ្ឋមន្ដ្រីការបរទេសអាស៊ាន៖ សិង្ហបុរីចង់បន្ថយសម្ព័ន្ធភាពជាមួយភូមា បើស្ថានការណ៍គ្មានការវិវត្តជាវិជ្ជមាន
កិច្ចប្រជុំរដ្ឋមន្ដ្រីការបរទេសអាស៊ាន កាលពីរសៀលម្សិលមិញ ដ្បិតតែមានរបៀបវារៈជាច្រើនក៏ពិតមែន ប៉ុន្តែវិបត្តិនៅភូមា គឺជាបញ្ហាក្ដៅគគុកដែលរដ្ឋមន្ដ្រីការបរទេសនៃបណ្ដាប្រទេសជាសមាជិកអាស៊ាន ផ្ដោតការយកចិត្តទុកដាក់ខ្លាំងបំផុត។ កម្ពុជាក្នុងនាមជាប្រធានដឹកនាំកិច្ចប្រជុំ បញ្ជាក់ថា អាស៊ានអាចនឹងពិនិត្យឡើងវិញ លើកិច្ចព្រមព្រៀងជាឯកច្ឆន្ទ៥ចំណុច ដែលបានឯកភាពជាមួយភូមា បន្ទាប់ពីស្ថានការណ៍នៅភូមាវិវត្តកាន់តែធ្ងន់ធ្ងរជាងមុន។ ចំណែកសិង្ហបុរីវិញ ក្រោយកិច្្ចប្រជុំកាលពីម្សិលមិញ បានបង្ហាញជំហរដាច់ណាត់ ចង់កាត់បន្ថយសម្ព័ន្ធភាពជាមួយភូមាតែម្ដង បើវិបត្តិនៅភូមា គ្មានការវិវត្តជាវិជ្ជមានទេនោះ។
ចុះផ្សាយនៅថ្ងៃ៖
ស្តាប់ - ០២:៥១
វាមិនមែនជារឿងចម្លែកទេដែលវិបត្តិនយោបាយនៅភូមា ក្លាយជាប្រធានបទធំ គ្របដណ្ដប់កិច្ចប្រជុំរដ្ឋមន្ដ្រីការបរទេសអាស៊ាន ដែលកម្ពុជាធ្វើជាម្ចាស់ផ្ទះនាសប្ដាហ៍នេះ។ ដ្បិតតែអាស៊ានមានគោលការណ៍មិនជ្រៀតជ្រែកកិច្ចការផ្ទៃក្នុងរវាងគ្នាក៏ពិតមែន ប៉ុន្តែនៅក្នុងកិច្ចប្រជុំនាថ្ងៃទី០៣សីហាម្សិលមិញ ប្រមុខការទូតអាស៊ានបានបង្ខំចិត្តលើកយកវិបត្តិនៅភូមាមកជជែកពិភាក្សា ហើយកិច្ចពិភាក្សានោះទៀតសោត ក៏មានទម្ងន់ធ្ងន់ដូចប្រឹថពី។
នៅក្រោយកិច្ចប្រជុំ សិង្ហបុរីបានលើកឡើងថា ការទាក់ទងចរចាជាមួយភូមា គ្មានតម្លៃអ្វីណាស់ណាទេ ប្រសិនបើភូមានៅតែមិនគោរពកិច្ចខិតខំប្រឹងប្រែងរបស់អាស៊ាន សម្រាប់សន្តិភាពនៅភូមា។ រដ្ឋមន្ដ្រីការទូតឥណ្ឌូនេស៊ី លោកស្រី Retno Marsudi នៅក្នុងសន្និសីទកាសែតនាយប់ថ្ងៃពុធទី០៣សីហា បានលើកឡើងពីការរំលោភកិច្ចសន្យាជាច្រើនរបស់របបសឹកភូមា។ និងថា ឥណ្ឌូនេស៊ីមិនឃើញពីការប្ដេជ្ញាចិត្ត ឬ សុច្ឆន្ទៈណាមួយពីរបបយោធាភូមា ក្នុងការអនុវត្តផែនការសន្តិភាពដែលភូមាបានយល់ព្រមជាមួយអាស៊ានកាលពីខែមេសាឆ្នាំ២០២១នោះឡើយ។
ចំណែកប្រមុខការទូតម៉ាឡេស៊ី លោក Saifuddin Abdullah លើកឡើងថា ទង្វើរបស់របបសឹកភូមា មិនត្រឹមតែធ្វើឲ្យប្រទេសសមាជិកអាស៊ានទាំងអស់ខកចិត្តប៉ុណ្ណោះទេ ប៉ុន្តែវាផ្គើនទៅនឹងកិច្ចព្រមព្រៀងសន្តិភាពដែលរបបសឹកភូមាខ្លួនឯងបានឯកភាពជាមួយអាស៊ានថែមទៀត។ សម្រាប់ម៉ាឡេស៊ី ការណ៍ដែលភូមាមិនគោរពកិច្ចព្រមព្រៀងជាឯកច្ឆន្ទ៥ចំណុច បង្ហាញពីការមិនគោរព មិនឲ្យតម្លៃអាស៊ាន និយាយជារួម និងកម្ពុជាដែលជាប្រធានអាស៊ានប្ដូរវេន និយាយដោយឡែក។
លោកទូតម៉ាឡេស៊ីថ្លែងប្រាប់អ្នកកាសែតថា ស្ថានការណ៍នៅភូមាត្រូវតែមានការវិវត្តជាវិជ្ជមានជាងនេះ មុនកិច្ចប្រជុំកំពូលអាស៊ាននាខែវិច្ឆិកា ព្រោះបើពុំដូច្នោះទេ ប្រមុខដឹកនាំនៃប្រទេសសមាជិកអាស៊ានទំនងជាត្រូវពិភាក្សាថា តើគួរផាត់ភូមាចេញពីអាស៊ានឬយ៉ាងណា។
ចំណែកកម្ពុជាក្នុងនាមជាប្រធានដឹកនាំកិច្ចប្រជុំរដ្ឋមន្ដ្រីការបរទេសអាស៊ាន ទទួលស្គាល់ថា វិបត្តិនៅភូមា មានភាពស្មុគស្មាញយ៉ាងខ្លាំង ដែលត្រូវការពេលវេលានិងកិច្ចខិតខំប្រឹងប្រែងច្រើនទៀតពីសំណាក់ភាគីពាក់ព័ន្ធទាំងអស់ ទើបអាចជួយរកដំណោះស្រាយនយោបាយឲ្យភូមាបាន។ សម្រាប់កម្ពុជា ដ្បិតតែការអនុវត្តកុងសង់ស៊ីសទាំង៥ចំណុច មិនទាន់មានភាពជឿនលឿនតាមបំណងដែលអាស៊ានប៉ងក៏ពិតមែន ក៏ប៉ុន្តែហោចណាស់ ការខិតខំក៏សម្រេចបានផ្នែកខ្លះដែរ ជាពិសេសការផ្តល់ជំនួយមនុស្សធម៌ដល់ប្រជាពលរដ្ឋភូមាដែលកំពុងត្រូវការជំនួយជាចាំបាច់ និងជាបន្ទាន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ