ប្រមុខការទូតអាមេរិក៖ «អាមេរិកចង់ឃើញកម្ពុជាមានលទ្ធិប្រជាធិបតេយ្យពហុបក្ស មិនមែនប្រជាធិបតេយ្យឯកបក្ស»
ប្រមុខការទូតអាមេរិក លោក Antony Blinken បានធ្វើសន្និសីទកាសែតមួយ នៅរសៀលថ្ងៃសុក្រនេះ ក្រោយពេលលោកបានចូលរួមកិច្ចប្រជុំរដ្ឋមន្ត្រីការបរទេសអាស៊ានលើកទី៥៥ នៅទីក្រុងភ្នំពេញ។ ឆ្លើយនឹងសំណួររបស់អ្នកកាសែត លោក Antony Blinken បញ្ជាក់ថា ក្នុងជំនួបដោយផ្ទាល់ជាមួយលោកនាយករដ្ឋមន្ត្រី ហ៊ុន សែន លោកបានបញ្ជាក់ជំហររបស់សហរដ្ឋអាមេរិក អំពីទំនាក់ទំនងរវាងអាមេរិកនិងកម្ពុជា។ សម្រាប់លោក Blinken ទំនាក់ទំនងរវាងប្រទេសទាំងពីរ នៅតែបន្តមានរនាំង។ ប៉ុន្តែអាមេរិកនឹងបន្តគាំទ្រកម្ពុជា ឲ្យមានប្រជាធិបតេយ្យពហុបក្សពេញលេញ មិនមែនប្រជាធិបតេយ្យឯកបក្សឡើយ។
ចុះផ្សាយនៅថ្ងៃ៖
ស្តាប់ - ០២:២៧
ជាដំបូង យើងបានប្រើពេលយ៉ាងយូរមួយ ដើម្បីផ្លាស់ប្តូរបញ្ហាមួយចំនួន នៅក្នុងជំនួបជាមួយលោកនាយករដ្ឋមន្ត្រី ហ៊ុន សែន កាលពីម្សិលមិញនេះ។ យើងបានបញ្ជាក់យ៉ាងច្បាស់ ពីបំណងប្រាថ្នាដ៏មោះមុតរបស់អាមេរិក នោះគឺភាពវិជ្ជមាននៃទំនាក់ទំនងរវាងអាមេរិកនិងកម្ពុជា។ ខ្ញុំពិតជាចង់ឲ្យមានច្រើន! ក៏ប៉ុន្តែរនាំងនៅចំពោះមុខនៃការពង្រឹងទំនាក់ទំនងរបស់ពួកយើង គឺ បញ្ហាគោរពសិទ្ធិមនុស្ស និងបញ្ហាប្រជាធិបតេយ្យ។
ក្នុងនាមជាមិត្តរបស់កម្ពុជា យើងទទូចឲ្យកម្ពុជា គោរពរាល់កាតព្វកិច្ចអន្តរជាតិទាំងអស់ ក៏ដូចជាប្តេជ្ញាចិត្តក្នុងការការពារសិទ្ធិមនុស្ស សេរីភាព រួមទាំងពិចារណាទៅលើការរិះគន់ទាំងឡាយ ចំពោះការកែប្រែរដ្ឋធម្មនុញ្ញរបស់កម្ពុជា ពេលថ្មីៗនេះ។
អាមេរិកក៏បានបង្ហាញពីក្តីបារម្ភ ហើយក៏នឹងបន្តបញ្ជាក់ពីការគាំទ្ររបស់ពួកយើង ចំពោះដំណើរការលទ្ធិប្រជាធិបតេយ្យបែបពហុបក្ស។ សហរដ្ឋអាមេរិក មិនដែលយកចិត្តទុកដាក់ចំពោះលក្ខណៈបុគ្គល ឬគណបក្សណាមួយឡើយ។ យើងបន្តឲ្យតម្លៃ និងធ្វើឲ្យប្រាកដថា ដំណើរការនេះ មានលក្ខណៈបើកចំហរ តម្លាភាព និងអនុញ្ញាតឲ្យមានការចូលរួមយ៉ាងពេញលេញពីតំណាងប្រជាជនកម្ពុជាទាំងអស់។
ខ្ញុំក៏បានលើកឡើងពីករណីព្រួយបារម្ភមួយចំនួន នៅពេលនិយាយដល់បញ្ហាសិទ្ធិមនុស្ស។ ហើយបញ្ហានេះ យើងបានផ្តោតទាំងលើបញ្ហាជាប្រព័ន្ធ និងបញ្ហាជាក់លាក់។ ដូច្នេះទើបខ្ញុំបានបញ្ជាក់ពីចំនួនមនុស្ស ដែលអាមេរិកមានក្តីបារម្ភ រួមមាន ពលរដ្ឋខ្មែរអាមេរិកាំ កញ្ញា សេង ធារី ដែលកំពុងជាប់ឃុំក្នុងពន្ធនាគារ។ ហើយកាលពីព្រឹកមិញនេះ ខ្ញុំក៏បានជួប លោក កឹម សុខា ដែលជាតួអង្គមេដឹកនាំអតីតបក្សប្រឆាំង។ ជាថ្មីម្តងទៀត គោលបំណងរបស់អាមេរិក មិនមែនសំដៅដល់បុគ្គលណាមួយឡើយ តែសំដៅដល់គោលការណ៍នៃតម្រូវការលទ្ធិប្រជាធិបតេយ្យ ការគោរពសិទ្ធិមនុស្ស និងតម្លាភាព ដែលនឹងជួយពង្រឹងដល់ភាពរឹងមាំរបស់កម្ពុជា ទាំងនៅទាំងក្នុងស្រុក និងនៅលើពិភពលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ