លោក ហ៊ុន សែន អះអាងជាថ្មីមិនយកអធិបតេយ្យជាតិទៅដូរនឹង EBA
ប្រមុខរដ្ឋាភិបាលកម្ពុជាលោក ហ៊ុន សែន បានរំលឹកសារជាថ្មី អំពីអ្វីដែលបានលើកឡើងកន្លងមកនោះ គឺកម្ពុជា មិនយកអធិបតេយ្យភាពខ្លួនទៅដូរយកជំនួយ ឬភាពអនុគ្រោះអ្វីនោះទេ។ ការបញ្ជាក់របស់លោក ហ៊ុន សែន ដូច្នេះ គឺធ្វើឡើងបន្ទាប់ពីមានជំនួបមួយរវាងលោក និងលោក Josep Borrell Fontelles តំណាងជាន់ខ្ពស់នៃសហភាពអឺរ៉ុបទទួលបន្ទុកកិច្ចការបរទេស និងសន្តិសុខគោលនយោបាយ និងជាអនុប្រធានគណៈកម្មការអឺរ៉ុប កាលពីថ្ងៃទី០៤ ខែសីហាម្សិលមិញនៅទីក្រុងភ្នំពេញ។
ចុះផ្សាយនៅថ្ងៃ៖
ស្តាប់ - ០៣:០១
ក្រៅពីលើកឡើងពីបញ្ហាកិច្ចសហប្រតិបត្តិការរបស់សហភាពអឺរ៉ុបនៅកម្ពុជា កិច្ចប្រជុំកំពូលរំលឹកខួបអាស៊ាន-អឺរ៉ុប បញ្ហាសង្គ្រាមរស្ស៊ី-អ៊ុយក្រែន បញ្ហាភូមា បញ្ហាភាពអនុគ្រោះពន្ធគ្រប់មុខទំនិញលើកលែងតែសព្វាវុធ(EBA) ក៏ត្រូវបានលើកឡើងជាពិសេសដែរ ដោយលោកនាយករដ្ឋមន្ត្រី ហ៊ុន សែន នៅតែបញ្ជាក់ថាលោកមិនយកអធិបតេយ្យភាពជាតិទៅដូរយកជំនួយ និងភាពអនុគ្រោះអ្វីនោះទេ។
ការបញ្ជាក់របស់លោក ហ៊ុន សែន ដូច្នេះគឺធ្វើឡើងនៅក្នុងជំនួបដាច់ដោយឡែក ជាមួយលោក Josep Borrell Fontelles តំណាងជាន់ខ្ពស់នៃសហភាពអឺរ៉ុបទទួលបន្ទុកកិច្ចការបរទេស និងសន្តិសុខគោលនយោបាយ និងជាអនុប្រធានគណៈកម្មការអឺរ៉ុប ខណៈដែលលោក បានចូលរួមកិច្ចប្រជុំរដ្ឋមន្ត្រីការបរទេសអាស៊ាន និងកិច្ចប្រជុំអាស៊ាន-អឺរ៉ុប នៅប្រទេសកម្ពុជាចាប់ពីថ្ងៃទី៣ដល់ថ្ងៃទី៦ ខែសីហានេះ។
លោក Josep Borrell Fontelles មិនបានបញ្ចេញព័ត៌មានលម្អិតផ្សេងទៀតជុំវិញជំនួបជាមួយលោកនាយករដ្ឋមន្ត្រីទេ ក៏ប៉ុន្តែកាលពីដើមសប្តាហ៍នេះ អនុប្រធានគណៈកម្មការអឺរ៉ុបរូបនេះ បានផ្តល់បទសម្ភាសន៍ឲ្យភ្នំពេញប៉ុស្តិ៍ថា អឺរ៉ុបមានរចនាសម្ព័ន្ធការសន្ទនាទ្វេភាគីរួមទាំងទំនាក់ទំនងនយោបាយ សិទ្ធិមនុស្ស និងលទ្ធិប្រជាធិបតេយ្យដោយច្បាស់លាស់ និងជាសាធារណៈ។ លោកថា អឺរ៉ុបនឹងអាចដោះស្រាយបញ្ហា EBA នេះរួមគ្នា ក្នុងក្របខ័ណ្ឌនៃទំនាក់ទំនងគ្នា និងបន្តគាំទ្ររាល់កិច្ចខិតខំប្រឹងប្រែងរបស់កម្ពុជាឆ្ពោះទៅរកការកសាងសង្គមប្រជាធិបតេយ្យប្រកបដោយបរិយាប័ន្ន។
សូមរំលឹកថា គណៈកម្មការអឺរ៉ុបកាលពីខែសីហា ឆ្នាំ២០២០ បានសម្រេចព្យួរជាបណ្តោះអាសន្នភាពអនុគ្រោះពន្ធ EBA ២០% នៃទំនិញនាំចូលពីកម្ពុជាទៅកាន់ទីផ្សារអឺរ៉ុប ដែលការព្យួរផ្នែកខ្លះនៃEBAនេះ បានប៉ះពាល់ដល់មុខទំនិញកម្ពុជាចំនួន៤០មុខ មានតម្លៃប្រមាណ១ពាន់លានដុល្លារ។
គណៈកម្មការអឺរ៉ុបក៏បានបញ្ជាក់ថា កម្ពុជាគួរតែចាត់វិធានការ ដើម្បីស្តារសេរីភាពនយោបាយ ហើយបង្កើតលក្ខខណ្ឌចាំបាច់ឡើងវិញសម្រាប់គណបក្សប្រឆាំងដែលអាចជឿទុកចិត្តបាន និងផ្តួចផ្តើមដំណើរការផ្សះផ្សារជាតិតាមរយៈការសន្ទនាដ៏ពិតប្រាកដមួយ។ គណៈកម្មការអឺរ៉ុបក៏បានបញ្ជាក់ច្បាស់ៗថា ប្រសិនបើរដ្ឋាភិបាលកម្ពុជាបង្ហាញពីវឌ្ឍនភាពគួរឱ្យកត់សម្គាល់នៃការគោរពសិទ្ធិមនុស្ស នោះគណៈកម្មការអឺរ៉ុបអាចនឹងពិនិត្យសេចក្តីសម្រេចរបស់ខ្លួន ហើយឈានទៅផ្តល់ការលើកលែងពន្ធក្រោមប្រព័ន្ធអនុគ្រោះពន្ធEBA ដល់កម្ពុជាឡើងវិញ។
សូមបញ្ជាក់ដែរថា កាលពីខែឧសភា ឆ្នាំ២០២២នេះដែរ សមាជិកសភាអឺរ៉ុបមួយចំនួន បានស្នើទៅកាន់ប្រទេសជាសមាជិកអឺរ៉ុបទាំង២៧ ឲ្យត្រៀមខ្លួនដកប្រព័ន្ធអនុគ្រោះពន្ធ EBAទាំងស្រុងពីកម្ពុជា ប្រសិនបើការបោះឆ្នោតជ្រើសរើសក្រុមប្រឹក្សាឃុំ-សង្កាត់ កាលពីថ្ងៃទី៥ ខែមិថុនា កន្លងទៅ និងការបោះឆ្នោតសកលឆ្នាំ២០២៣ ត្រូវគេរកឃើញថាមិនមានភាពសេរី ត្រឹមត្រូវ និងយុត្តិធ៌ម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ