អនុប្រធានសហភាពអឺរ៉ុបចង់ឃើញរឿងក្តីលោក កឹម សុខា ត្រូវបានដោះស្រាយបញ្ចប់
តំណាងជាន់ខ្ពស់សហភាពអឺរ៉ុបលោក Josep Borrell Fontelles បានឲ្យដឹងថា លោក កឹម សុខា ប្រធានអតីតគណបក្សសង្គ្រោះជាតិ អាចចូលរួមបោះឆ្នោតនៅឆ្នាំ ២០២៣បាន នៅពេលរឿងក្តីដែលអូសបន្លាយរបស់គាត់នៅតុលាការត្រូវបានដោះស្រាយបញ្ចប់។ ការលើកឡើងរបស់លោក Josep Borrell តាមរយៈ Twitter របស់លោកនៅថ្ងៃនេះ ធ្វើឡើងបន្ទាប់ពីលោកជួបពិភាក្សាជាមួយលោក កឹម សុខា អំឡុងពេលនៃការចូលរួមកិច្ចប្រជុំរដ្ឋមន្ត្រីការបរទេសអាស៊ានលើកទី៥៥ នៅកម្ពុជាកាលពីសប្តាហ៍មុន។
ចុះផ្សាយនៅថ្ងៃ៖
ស្តាប់ - ០១:៥៨
តាមរយៈដំណើរទស្សនកិច្ច និងចូលរួមកិច្ចប្រជុំរដ្ឋមន្ត្រីការបរទេសអាស៊ានលើកទី៥៥ កាលពីសប្តាហ៍មុន នៅកម្ពុជា លោក Josep Borrell Fontelles តំណាងជាន់ខ្ពស់សហភាពអឺរ៉ុបសម្រាប់កិច្ចការបរទេស និងគោលនយោបាយសន្តិសុខ និងជាអនុប្រធានសហភាពអឺរ៉ុប បានសរសេរនៅលើ Twitter ផ្ទាល់របស់លោកនៅថ្ងៃនេះថា ដើម្បីឲ្យលោក កឹម សុខា អាចចូលរួមក្នុងការបោះឆ្នោតឆ្នាំ ២០២៣បាន លុះត្រាតែរឿងក្តីរបស់លោក កឹម សុខា ដែលអូសបន្លាយនៅតុលាការត្រូវតែមានការដោះស្រាយបញ្ចប់។ ជាការបញ្ជាក់ដែលធ្វើឡើង ខណៈលោក Fonttelles ឆ្លៀតជួបពិភាក្សាក្រៅផ្លូវការជាមួយលោក កឹម សុខា កាលពីថ្ងៃទី០៦ ខែសីហាកន្លងទៅ នៅគេហដ្ឋានលោក កឹម សុខា។
លោក Josep Borrell Fontelles បញ្ជាក់ថាការស្តារឡើងវិញនូវសិទ្ធិនយោបាយរបស់លោក កឹម សុខា នឹងរួមចំណែកដល់ដំណើរការបោះឆ្នោតបែបប្រជាធិបតេយ្យ និងប្រកបដោយបរិយាប័ន្ន។
នៅថ្ងៃនេះដែរ លោក កឹម សុខា ប្រធានអតីតគណបក្សសង្រ្គោះជាតិ ក៏បានសរសេរនៅលើហ្វេសប៊ុករបស់លោកដែរថាសហភាពអឺរ៉ុបបានផ្តល់តម្លៃចំពោះការតស៊ូដោយអហិង្សា ការអត់ធ្មត់ និងជាពិសេសផ្តោតលើសិទ្ធិសេរីភាពរបស់លោកក្នុងការចូលរួមបម្រើសង្គម។ លោក កឹម សុខា កំពុងស្ថិតនៅដំណាក់កាលសវនាការនៃសាលាដំបូងរាជធានីភ្នំពេញ ដោយបច្ចុប្បន្នបានឈានចូលដល់លើកទី៥០ ពីបទសន្ទិដ្ឋិភាពជាមួយរដ្ឋបរទេស ដែលនាំទៅរកការរំលាយគណបក្សសង្គ្រោះជាតិកាលពីចុងឆ្នាំ ២០១៧។
សូមរំលឹកថា អំឡុងពេលនៃកិច្ចប្រជុំរដ្ឋមន្ត្រីការបរទេសអាស៊ានលើកទី៥៥ និងកិច្ចប្រជុំពាក់ព័ន្ធកាលពីសប្តាហ៍មុន មេដឹកនាំអតីតគណបក្សប្រឆាំងរូបនេះ បានជួបជាមួយប្រមុខការទូតនៃប្រទេសលោកសេរីមួយចំនួន ក្នុងនោះក៏មានរដ្ឋមន្ត្រីការបរទេសអាមេរិក Antony Blinken ផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ