កម្ពុជាអះអាងពីកិច្ចខិតខំប្រឹងប្រែង ខណៈការជួញដូរមនុស្សធ្លាក់ក្នុងបញ្ជីខ្មៅ
អ្នកជំនាញខាងប្រឆាំងការជួញមនុស្សរបស់ក្រសួងមហាផ្ទៃ អះអាងថា កម្ពុជាមិនព្រងើយកន្តើយចំពោះបញ្ហានេះទេ ហើយថាកម្ពុជាកំពុងខិតខំជំរុញគោលនយោបាយ ទេសន្តប្រវេសន៍ទៅតាមសហគមន៍ និងសាលារៀន ទាក់ទងនឹងបញ្ហាជួញដូរមនុស្សនេះ។ នេះជាការឆ្លើយតបទៅនឹងរបាយការណ៍របស់សហរដ្ឋអាមេរិកដែលទម្លាក់កម្ពុជាទៅក្នុងចំណាត់ថ្នាក់ទី៣ ឬបញ្ជីខ្មៅនៃការជួញដូរមនុស្សឆ្នាំ២០២២។
ចុះផ្សាយនៅថ្ងៃ៖
ស្តាប់ - ០២:១៥
នៅក្នុងសន្និសិទនៅថ្ងៃសុក្រនេះ ដែលរៀបចំដោយអង្គភាពអ្នកនាំពាក្យរដ្ឋាភិបាលកម្ពុជាលោកស្រី ជូ ប៊ុនអេង គូសបញ្ជាក់ថា ក្នុងរបាយការណ៏ថ្មីចុងក្រោយនេះ គឺមានជនរងគ្រោះ១៥៧៧នាក់ ត្រូវបានជួយសង្គ្រោះ ខណៈសមត្ថកិច្ចបានកសាងពាក្យបណ្តឹងទៅតុលាការបាន៥៣៨ករណី។ តែលោកស្រីទទួលស្គាល់ថា បទល្មើសថ្មីៗទាក់ទងនឹងការជួញដូរមនុស្ស នៅតែកើតមាន តាមរយៈការប្រើប្រាស់ទឹកដីកម្ពុជា។ កម្ពុជាដែលធ្លាក់ទៅក្នុងចំណាត់ថ្នាក់ទី៣ ឬបញ្ជីខ្មៅក្នុងរបាយការណ៍ជួញដូរមនុស្សប្រចាំឆ្នាំ២០២២ របស់សហរដ្ឋអាមេរិក ដោយសារតែការទប់ស្កាត់បទល្មើសជួញដូរមនុស្ស មិនទាន់មានប្រសិទ្ធិភាព។
បើតាមអនុប្រធានអចិន្ត្រៃយ៍នៃគណៈកម្មាធិការប្រជាតិប្រយុទ្ធប្រឆាំងការជួញដូរមនុស្ស គឺកម្ពុជាមិនបដិសេធនឹងរបាយការណ៍របស់សហរដ្ឋអាមេរិកបែបនេះទេ តែថាលោកស្រីស្លុតចិត្តនៅពេលឃើញការផ្សព្វផ្សាយបែបនេះពាសពេញពិភពលោក ទោះបីជាប៉ុន្មានឆ្នាំចុងក្រោយនេះ កម្ពុជាបានព្យាយាមធ្វើការងារ និងបង្កើនកិច្ចសហប្រតិបត្តិការ ដើម្បីទប់ស្កាត់ការជួញដូរមនុស្សក៏ដោយ។
ទោះជាយ៉ាងណា លោកស្រី ជូ ប៊ុនអេង អះអាងថា កម្ពុជាមិនព្រងើយកន្តើយចំពោះបញ្ហានេះទេ ហើយថាកម្ពុជាកំពុងខិតខំប្រឹងប្រែងជំរុញគោលនយោបាយទេសន្តប្រវេសន៍ទៅតាមសហគមន៍ និងសាលារៀន ទាក់ទងនឹងបញ្ហាជួញដូរមនុស្សនេះ។
ក៏ប៉ុន្តែ នៅក្នុងរបាយការណ៍ កាលពីចុងខែកក្កដា សហរដ្ឋអាមេរិក បានកត់សំគាល់ថា កម្ពុជាមិនបានបំពេញតាមស្តង់ដារអប្បរមា និងមិនបានខិតខំប្រឹងប្រែងដើម្បីលុបបំបាត់ការជួញដូរមនុស្សនៅឡើយ។ បញ្ហានេះបូករួមទាំងផលប៉ះពាល់នៃជំងឺរាតត្បាតកូវីដ-១៩ និង អំពើពុករលួយជាប្រព័ន្ធ បានបន្តរារាំងដល់ប្រតិបត្តិការពង្រឹងច្បាប់ ទំនួលខុសត្រូវអ្នកជួញដូរ និងការផ្តល់សេវាជួយជនរងគ្រោះ។ នេះបើតាមរបាយការណ៍ដដែល។
បើទោះបីជាមានការចាប់ខ្លួន និងកាត់ទោស ជនជួញដូរមនុស្សជាបន្តបន្ទាប់ ក៏ប៉ុន្តែរបាយការណ៍របស់សហរដ្ឋអាមេរិក បានលើកឡើងថា រដ្ឋាភិបាលមិនបានបង្ហាញរបាយការណ៍ស៊ើបអង្កេតឲ្យបានគ្រប់ជ្រុងជ្រោយនោះទេ។ ជាក់ស្តែងក្នុងឆ្នាំ២០២១ មានសេចក្តីរាយការណ៍ថា អាជ្ញាធរបានចាប់ខ្លួនជនសង្ស័យជួញដូរមនុស្សចំនួន ៣៧០នាក់ ដែលក្នុងនោះមាន មេខ្យល់ ៣២២នាក់ ក៏ប៉ុន្តែរដ្ឋាភិបាលមិនបានរាយការណ៍បច្ចុប្បន្នភាព អំពីការចាប់ខ្លួនទាក់ទងទៅនឹងបទល្មើសជួញដូរមនុស្សទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ