លោក កឹម សុខា ជួបអ្នករាយការណ៍ពិសេសUN លើកឡើងពីរឿងក្តីដែលបន្តអូសបន្លាយ
អ្នករាយការណ៍ពិសេសរបស់អង្គការសហប្រជាជាតិស្តីពីសិទ្ធិមនុស្សនៅកម្ពុជា បានទៅជួបលោក កឹម សុខា នៅគេហដ្ឋានរបស់លោកផ្ទាល់ កាលពីថ្ងៃទី១៦ ខែសីហា។ ជំនួបនោះ អ្នកទាំងពីរបានជជែកគ្នាអំពីដំណើរការសវនាការរឿងក្តី ដែលបានអូសបន្លាយជាច្រើនឆ្នាំ។ ដំណើរការសវនាការ កាលពីថ្ងៃម្សិលមិញ មិនភាពជឿនលឿនទៅមុខទេ បន្ទាប់ពីអយ្យការដាក់ព័ស្ដុតាងបន្ថែម។ នេះបើតាមសហមេធាវីការពារក្តី។
ចុះផ្សាយនៅថ្ងៃ៖
ស្តាប់ - ០១:៤៩
ក្រោយពីមានជំនួបជាមួយប្រមុខរដ្ឋាភិបាលកម្ពុជា លោក ហ៊ុន សែន លោក វីទិត មុនតាប៊ន (Vitit MUNTARBHORN) អ្នករាយការណ៍ពិសេសរបស់អង្គការសហប្រជាជាតិស្តីពីសិទ្ធិមនុស្សនៅកម្ពុជា បាបន្តជួបលោក កឹម សុខា នៅថ្ងៃទី១៦ ខែសីហា នៅគេហដ្ឋានរបស់លោក។ លោក កឹម សុខា អតីតប្រធានគណបក្សសង្គ្រោះជាតិ ដែលកំពុងស្ថិតក្នុងសំណុំរឿងសន្ទិដ្ឋិភាពជាមួយរដ្ឋបរទេស។
បើតាមទំព័រហ្វេសប៊ុកផ្លូវការ នៅថ្ងៃទី១៧ ខែសីហា មេដឹកនាំអតីតបក្សប្រឆាំង លោក កឹម សុខា បានជជែកជាមួយ លោក វីទិត មុនតាប៊ន អំពីដំណើរការសវនាការរឿងក្តីរបស់លោក ដែលបានអូសបន្លាយជាច្រើនឆ្នាំមកហើយ។
កាលពីថ្ងៃទី១៧ ខែសីហា ដំណើរការសវនាការលើកទី៥២ នៃសំណុំរឿងសន្ទិដ្ឋិភាពជាមួយរដ្ឋបរទេសរបស់លោក កឹម សុខា មិនមានការជឿនលឿនទៅមុខគួរឲ្យកត់សម្គាល់ទេ។ នេះបើតាមការលើកឡើងរបស់ លោក ផែង ហេង សហមេធាវីការពារក្តីឲ្យលោក កឹម សុខា។
លោកមេធាវី ផែង ហេង បានបញ្ជាក់ថា ដំណើរការសវនាការ នៅថ្ងៃទី១៧ ខែសីហា ចៅក្រមបានលើយកព័ស្តុតាងបន្ថែមរបស់តំណាងអយ្យការនៃសាលាដំបូងរាជធានីភ្នំពេញ មកជជែកដេញដោលក្នុងសំណុំរឿងលោក កឹម សុខា។ ព័ស្តុតាងនេះ គឺជាសំឡេងតាមទូរស័ព្ទរបស់លោក ហូរ វ៉ាន់ អតីតតំណាងរាស្ត្របក្សប្រឆាំង ដែលលោកបានហៅទៅទូរស័ព្ទមកអ្នកក្នុងស្រុក ដោយនិយាយពាក់ព័ន្ធនឹងបាតុកម្មនៅម្តុំវត្តស្ទឹងមានជ័យដឹកនាំដោយរូបលោក។
លោកមេធាវី ផែង ហេង បញ្ជាក់ថា តាមនីតិវិធី ដែលចៅក្រមបានរៀបចំឲ្យជជែកក្នុងសំណុំរឿងក្តីរបស់លោក កឹម សុខា គឺសឹងតែអស់ទៅហើយ ពោលគឺនៅតែការផ្ទៀងផ្ទាត់ជាមួយសាក្សីប៉ុណ្ណោះ បន្ទាប់ពីនោះភាគីពាក់ព័ន្ធអាចធ្វើសេចក្តីសន្និដ្ឋានបានហើយ។ បើអយ្យការនៅតែបន្តដាក់ព័ស្តុតាងបែបនេះ លោកមេធាវីយល់ឃើញថានេះគឺគ្រាន់តែជាហេតុផលនៃការពន្យារពេលដំណើរការសវនាការឲ្យយូរតែប៉ុណ្ណោះ ព្រោះព័ស្តុតាងទាំងនោះ មិនពាក់ព័ន្ធនឹងលោក កឹម សុខា ឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ