ខេត្តសៀមរាបចុះរៀបចំហេដ្ឋារចនាសម្ព័ន្ធបន្ថែមនៅភូមិរុនតាឯក សម្រាប់ពលរដ្ឋដែលធ្លាប់រស់នៅខុសច្បាប់ក្នុងតំបន់អង្គរ
នៅខេត្តសៀមរាប អាជ្ញាធរពាក់ព័ន្ធគ្រប់លំដាប់ថ្នាក់ កំពុងតែប្រញាប់ដៃប្រញាប់ជើង ចុះរៀបចំហេដ្ឋារចនាសម្ព័ន្ធបន្ថែមថ្មី នៅភូមិធម្មជាតិរុនតាឯក សម្រាប់ពលរដ្ឋដែលយល់ព្រមរុះរើសំណង់ខុសច្បាប់ចេញពីតំបន់រមនីយដ្ឋានអង្គរ និងតំបន់ដទៃទៀត ឋិតក្រោមការគ្រប់គ្រងរបស់អាជ្ញាធរជាតិអប្សរា។ ការងារនេះ ធ្វើឡើងក្រោយពីក្រសួងដែនដីនគរូបនីយកម្ម ស្រាវជ្រាវ រកឃើញថា នៅក្នុងឧទ្យានជាតិអង្គរសព្វថ្ងៃ មានសំណង់ខុសច្បាប់ជាងរាប់ពាន់ករណី។ គិតត្រឹមថ្ងៃទី២៣ខែសីហា ក្រសួងដែនដី បញ្ជាក់ថា មានប្រជាពលរដ្ឋរស់នៅលើសំណង់ខុសច្បាប់តំបន់រមណីយដ្ឋានអង្គរចំនួន៦៩៨ គ្រួសារ ឬស្មើនឹង៧២,៤៨ភាគរយហើយ ដែលបានស្ម័គ្រចិត្តរុះរើលំនៅដ្ឋានខុសច្បាប់របស់ខ្លួន ទៅរស់នៅភូមិធម្មជាតិរុនតាឯក។
ចុះផ្សាយនៅថ្ងៃ៖
ស្តាប់ - ០២:៣៣
ការរៀបចំហេដ្ឋារចនាសម្ព័ន្ធបន្ថែមថ្មី នៅភូមិធម្មជាតិរុនតាឯក ក្នុងស្រុកបន្ទាយស្រី ខេត្តសៀមរាប កំពុងតែធ្វើឡើងយ៉ាងប្រញាប់ ក្រោយពេលដែលប្រជាពលរដ្ឋជិត៧០០គ្រួសារ ដែលធ្លាប់រស់នៅខុសច្បាប់នៅតំបន់អង្គរ ស្ម័គ្រចិត្តរុះរើចេញពីទីនោះ តាមការតម្រូវរបស់អាជ្ញាធរ។
នៅថ្ងៃពុធ ទី២៤ ខែសីហា អភិបាលខេត្តសៀមរាប លោក ទៀ សីហា, អភិបាលស្រុកបន្ទាយស្រី លោក ឃឹម ហ្វីណង់ ព្រមទាំងក្រុមការងារមកពីអាជ្ញាធរជាតិអប្សរា និងក្រុមការងារនៃក្រសួងដែនដី បានរួមគ្នាចុះត្រួតពិនិត្យការប្រុងប្រៀបរៀបចំហេដ្ឋារចនាសម្ព័ន្ធបន្ថែមថ្មី នៅក្នុងភូមិធម្មជាតិរុនតាឯក។
លោក ឃឹម ហ្វីណង់ អភិបាលស្រុកបន្ទាយស្រី គូសបញ្ជាក់ថា អាជ្ញាធរកំពុងរៀបចំវាស់វែង ត្រៀមប្រគល់ដីឡូតិ៍ ជាកម្មសិទ្ធិដីធ្លីស្របច្បាប់ ជូនដល់ប្រជាពលរដ្ឋដែលស្ម័គ្រចិត្តមករស់នៅភូមិធម្មជាតិរុនតាឯក ជាថ្នូរនឹងការយល់ព្រមរុះរើសំណង់ខុសច្បាប់ចេញពីតំបន់រមណីយដ្ឋានអង្គរ និងតំបន់ដទៃទៀតស្ថិតក្រោមការគ្រប់គ្រងរបស់អាជ្ញាធរជាតិអប្សរា។
គួរបញ្ជាក់ជូនថា ក្រសួងដែនដី នគរូបនីយកម្ម និងសំណង់ បានបើកយុទ្ធនាការ ចុះវាស់វែង កំណត់និយាមកាក្បាលដី និងសំណង់ខុសច្បាប់ក្នុងតំបន់រមណីយដ្ឋានអង្គរ និងតំបន់ដទៃទៀត កាលពីថ្ងៃទី១៧ ខែសីហា ឆ្នាំ២០២២។ យុទ្ធនាការដែលមានមន្ត្រីពាក់ព័ន្ធចូលរួមសរុបជាង៧០០នាក់នេះ រកឃើញថា នៅក្នុងតំបន់ឧទ្យានជាតិអង្គរសព្វថ្ងៃនេះ មានសំណង់ខុសច្បាប់ជាង៨ពាន់ករណី។ ហើយគ្រាន់តែក្នុងរយៈពេល៣ខែចុងក្រោយ សំណង់ខុសច្បាប់ថ្មីៗបានកើតឡើងសរុបចំនួន ៣៩៨ករណី ក្នុងនោះបានរុះរើចេញចំនួនជាង ២០០ករណី។
សម្រាប់ពលរដ្ឋដែលស្ម័គ្រចិត្តរុះរើចេញនិងមានលក្ខខណ្ឌគ្រប់គ្រាន់ក្នុងការទទួលបានទីលំនៅថ្មី ក្រុមការងារតម្រង់ទិស នឹងពិនិត្យលទ្ធភាព ផ្តល់ដីនៅតំបន់អភិវឌ្ឍន៍រុនតាឯក សម្រាប់ដោះស្រាយជាយថាហេតុ។ ចំណែកពលរដ្ឋដែលបន្តទន្រ្ទានដីក្នុងតំបន់នេះ និងអ្នកមិនរុះរើសំណង់ខុសច្បាប់ ត្រូវទទួលខុសត្រូវចំពោះមុខច្បាប់ជាធរមាន។ នេះគឺជាការព្រមានរបស់លោក ជា សុផារ៉ា រដ្ឋមន្ដ្រីក្រសួងដែនដី នគរូនីយកម្ម និងសំណង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ