មេធាវីថា ការផ្ទេរកូនក្តីលោកទាំង១៤នាក់ទៅពន្ធនាគារត្រពាំងផ្លុង ដើម្បីបញ្ចៀសការសួរសុខទុក្ខពីអ្នករាយការណ៍ពិសេសUN
លោក សំ សុគង់ មេធាវីការពារក្តីឱ្យសកម្មជនគណបក្សប្រឆាំងបានសន្និដ្ឋានថា ការផ្ទេរកូនក្តីរបស់លោកចំនួន១៤រូបពីពន្ធនាគារព្រៃស ទៅកាន់ពន្ធនាគារត្រពាំងផ្លុងជិតព្រំដែនវៀតណាម គឺដើម្បីបញ្ចៀសពីការសួរសុខទុក្ខអ្នករាយការណ៍ពិសេសអង្គការសហប្រជាជាតិស្តីពីសិទ្ធិមនុស្សនៅកម្ពុជា។ ក្នុងនោះ លោកមេធាវីបន្ថែមទៀត ការផ្ទេរកូនក្តីលោកទៅកាន់ឆ្ងាយនេះទៀតសោធ ក៏នឹងធ្វើឱ្យប៉ះពាល់ដល់ដំណើរការនិតិវិធីរបស់តុលាការ ស្របពេលដែលពួកគេនៅមិនទាន់មានសាលដីកា ឬសាលក្រមជាស្ថាពរនៅឡើយ។
ចុះផ្សាយនៅថ្ងៃ៖
ស្តាប់ - ០២:២៦
លោកមេធាវី សំ សុគង់ បានថ្លែងមកវិទ្យុបារាំងអន្តរជាតិRFIថា ការបញ្ចូនសកម្មជនអតីតគណបក្សសង្គ្រោះជាតិចំនួន១៤រូបទៅកាន់ពន្ធនាគារត្រពាំងផ្លុងកាលពីថ្ងៃទី២១ សីហា គឺជារឿងមិនសមហេតុផលទាល់តែសោះ។ មិនសមហេតុផលដោយសារតែកូនក្តីលោកនៅមិនទាន់មានសាលដីកា ឬសាលក្រមជាស្ថាពរនៅឡើយ ខណៈសាលាឧទ្ធរណ៍នឹងត្រៀមប្រកាសសាលក្រមលើសំណុំរឿងរបស់ពួកគេនៅថ្ងៃទី១៣ កញ្ញា ខាងមុខ។
លោក សំ សុគង់បន្តថា សមត្ថកិច្ចមិនគួរណាបញ្ចូនសកម្មជនទាំង១៤រូបទៅកាន់ពន្ធនាគារត្រពាំងផ្លុងដែលស្ថិតក្នុងខេត្តត្បូងឃ្មុំនោះទេ ក៏ព្រោះថា ពួកគេមែនជាអ្នកទោសដែលត្រូវជាប់ពន្ធនាគារយូរឆ្នាំឡើយ។ បើតាមលោកមេធាវី សំ សុគង់ ការផ្ទេរកូនក្តីទាំង១៤រូប គឺជាការបំបិទសិទ្ធិសេរីភាពរបស់ពួកគេ និងការគំរាមកំហែងបន្ថែមទៀតដល់សិទ្ធិនយោបាយ។
ជាការបញ្ជាក់បន្ថែមលោកមេធាវីថា ការផ្ទេរអ្នកទោសនយោបាយខាងលើ អាចជាការជម្លៀសមិនឱ្យអ្នករាយការណ៍ពិសេសអង្គការសហប្រជាជាតិទទួលបន្ទុកលើបញ្ហាសិទ្ធិមនុស្សនៅកម្ពុជា លោក វីទិត មុតាប៊ន ទៅជួបពួកគេដោយផ្ទាល់នៅពន្ធនាគារព្រៃស។ លោកបន្ថែមថា ក្រៅតែពីបញ្ហាទាំងអស់នេះ ការបញ្ចូនអ្នកទោសនយោបាយទាំង១៤រូប ទៅកាន់ពន្ធនាគារត្រពាំងផ្លុង នឹងធ្វើឱ្យពួកគេពិបាកទទួលបានព័ត៌មាន ឬការសួរសុខទុក្ខពីសំណាក់ក្រុមគ្រួសារ ក៏ដូចជាអ្នកគាំទ្រ។
បើតាមលោកមេធាវី សំ សុគង់ សកម្មជនទាំង១៤រូបរួមមាន៖ លោក កែវ ថៃ, លោក ស៊ុន ធន់, លោកឡុង ផារី, លោកពៀត ម៉ាប់, លោកយឹម សារ៉េត, លោក សុខ ចាន់ថា, លោក ញ៉ែម វាន, លោក ថៃ គន្ធា, លោក ឃឹម ភាណា, លោកជុំ ចាន់, លោក ឃុត ច្រឹប, លោក ងិន ឃាន, លោក ទុំ ប៊ុនថន និងលោក គង់ សំអាន។
តែយ៉ាងណាក្រោយមានការអះអាងពីលោក សំ សុគង់រួច លោក នុត សវនា អ្នកនាំពាក្យអគ្គនាយកនៃអគ្គនាយកដ្ឋានពន្ធនាគារនៃក្រសួងមហាផ្ទៃបានបញ្ជាក់យ៉ាងខ្លីវិញថា ដើមចមនៃការផ្ទេរអ្នកទោសទាំងអស់នោះទៅកាន់ពន្ធនាគារត្រពាំងផ្លុង គឺដើម្បីកាត់បន្ថយភាពចង្អៀតណែនខ្លាំងក្នុងពន្ធនាគារប៉ុណ្ណោះ ដោយមិនមែនជាប់ពាក់ព័ន្ធនឹងរឿងនយោបាយអ្វីឡើយ។ លោកថា ការញែកអ្នកទោសពីពន្ធនាគារមួយទៅមួយទៀត គឺជាគោលការណ៍របស់ក្រសួងមហាផ្ទៃដើម្បីផ្តល់ភាពងាយស្រួលក្នុងការគ្រប់គ្រង។
សូមរំឮកថា សកម្មជនអតីតគណបក្សសង្គ្រោះជាតិទាំង១៤រូប ត្រូវបានតុលាការផ្តន្ទាទោសដាក់ពន្ធនាគារម្នាក់ៗចំនួន ៥ឆ្នាំ ក្រោមបទចោទ «ញុះញង់ឱ្យប្រព្រឹត្តបទឧក្រិដ្ឋជាអាទិ៍ និងរួមគំនិតក្បត់»។ ប៉ុន្តែទោសសម្រាប់៥ឆ្នាំនេះ តុលាការសម្រេចឱ្យអនុវត្តទោសត្រឹមចំនួន៣ឆ្នាំ៨ខែ ហើយទោសដែលនៅសល់ គឺត្រូវបានព្យួរ។ នេះបើតាមការបញ្ជាក់ពីលោកមេធាវី សំ សុគង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ