ក្រសួងកិច្ចការនារីបដិសេធចំណាច់ការយឺតយ៉ាវក្នុងសំណុំបៀតបៀនស្ត្រីកូដករណាហ្គាវើល៍
ក្រសួងកិច្ចការនារីនៅថ្ងៃសុក្រម្សិលមិញនេះ បានចេញសេចក្តីថ្លែងការណ៍បដិសេធនូវការលើកឡើងថា ក្រសួងមានចំណាត់ការយឺតយ៉ាវនិងគ្មានប្រសិទ្ធភាព ក្នុងសំណុំរឿងបៀតបៀននិងការប្រើប្រាស់អំពើហឹង្សាលើស្ត្រីកូដករក្រុមហ៊ុនណាហ្គាវើលដ៍។ សេចក្តីថ្លែងការណ៍នេះធ្វើឡើង បន្ទាប់ពីក្រុមយុវជនមួយក្រុមបានឈរកាន់បដានិងដាក់ញត្តិទៅក្រសួងកិច្ចការនារី សុំអន្តរាគមន៍ករណីអាជ្ញាធរប្រើហិង្សាលើស្ត្រីជានិយោជិតក្រុមហ៊ុនណាហ្គាវើលដ៍។
ចុះផ្សាយនៅថ្ងៃ៖
ស្តាប់ - ០១:៥៦
ក្រសួងកិច្ចការនារីនៅថ្ងៃទី២៦សីហា បានចេញសេចក្តីថ្លែងការណ៍ច្រានចោលនិងបដិសេធដាច់អហង្ការលើការចោទប្រកាន់មកក្រសួងកិច្ចការនារី ក៏ដូចជាអាជ្ញាធរមានសមត្ថកិច្ចថា ពុំបានបំពេញតួនាទីដោះស្រាយ សំណុំរឿងបៀតបៀននិងការប្រើប្រាស់អំពើហឹង្សាលើស្ត្រីកូដករក្រុមហ៊ុនណាហ្គាវើលដ៍។ ដោយបន្តថា ការលើកឡើងទាំងអស់នោះ គឺជាការចោទប្រកាន់ គ្មានភស្តុតាងនិងមូលហេតុច្បាស់លាស់ ដើម្បីបំផ្លាញសេចក្តីថ្លែថ្នូររបស់ក្រសួងនិងអាជ្ញាធរតែប៉ុណ្ណោះ។
កាលពីថ្ងៃទី២៥សីហាថ្មីៗនេះ ក្រុមយុវជនខ្មែរថាវរៈ បានជួបជុំគ្នាដាក់ញត្តិថ្មី និងតាមដានញត្តិចាស់ដែលបានដាក់ទៅក្រសួងកិច្ចការនារីកាលពីថ្ងៃទី៤មេសា ស្នើឱ្យចាត់វិធានការតាមផ្លូវច្បាប់ចំពោះអាជ្ញាធរដែលបានប្រើហិង្សាលើកូដករដែលជាស្ត្រីនៅណាហ្គា។ ការប្រមូលផ្តុំគ្នានេះ ត្រូវបានក្រសួងកិច្ចការនារីហៅថាជា ការសំដែងឈុតឆាក។ ក្នុងសេចក្តីថ្លែងការណ៍ដដែល ក្រសួងកិច្ចការនារីបានថែមទាំងអះអាងពីភាពសកម្មរបស់ខ្លួន ក្នុងការលើកកម្ពស់ស្ត្រីនិងការពារសិទ្ធិស្ត្រី ដោយគ្មានសោះការរើសអើងនយោបាយ។
កញ្ញា ឈឹម ស៊ីថរ ប្រធានសហជីពទ្រទ្រង់សិទ្ធិការងារបុគ្គលិកក្រុមហ៊ុនណាហ្គា បានប្រាប់វិទ្យុបារាំងrfi នៅថ្ងៃទី២៧ខែសីហាថា ក្នុងការការពារសិទ្ធិស្ត្រីកូដករណាហ្គាដែលធ្លាប់ប៉ះទង្គិចជាមួយសមត្ថកិច្ចកន្លងមក ក្រសួងកិច្ចការនារី គ្មានចំណាត់សោះ ដែលពុំអាចហៅត្រឹមថា យឺតយ៉ាវ នោះទេ។ ប្រធានសហជីពរូបនេះបានបញ្ជាក់ថា ចាប់តាំងពីក្រុមកម្មករនយោជិកចាប់ចេញធ្វើបាតុកម្មចាប់ពីចុងឆ្នាំមុនមក ក្រសួងកិច្ចការនារីមិនដែលសួរនាំសូម្បីតែមួយពាក្យ និងជំនួបណាមួយសោះ។ និងសូម្បីតែលោកស្រីផ្ទាល់ត្រូវបានសមត្ថកិច្ចចាប់ឃុំខ្លួនក៏ដោយចុះ។
គួរជ្រាបថា តាមរូបភាពប្រព័ន្ធផ្សព្វផ្សាយអំពីការប៉ះទង្គិចរវាងកម្មករនយោជិតក្រុមហ៊ុនណាហ្គាដ៍ជាមួយអាជ្ញាធរកន្លងមក បានបង្ហាញពីការចាប់បញ្ចូលស្ត្រីទាំងនោះចូលក្នុងរថយន្តក្រុង ការចាប់រុញច្រាន និងប្រតាយប្រតប់គ្នានាំឱ្យមានរបួសស្នាមជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ