ជនរងគ្រោះជិត៩០០នាក់ត្រូវបានជួយសង្គ្រោះពីអំពើជួញដូរមនុស្សនៅឆ្នាំនេះ
ក្នុងរយៈពេល៨ខែឆ្នាំ២០២២នេះ គឺមានជនរងគ្រោះជិត៩០០នាក់ត្រូវបានជួយសង្គ្រោះពីអំពើជួញដូរមនុស្សខុសច្បាប់ ខណៈចាប់ខ្លួនជនសង្ស័យបានជាង៨០នាក់។ បើតាមក្រសួងមហាផ្ទៃ ជនរងគ្រោះទាំងនោះ ត្រូវបានក្រុមឧក្រិដ្ឋជនធ្វើការជួញដូរ ឬផ្ទេរពីក្រុមហ៊ុនមួយទៅក្រុមមួយទៀត ដែលមានមេក្លោងនៅប្រទេសរបស់ខ្លួន និងនៅកម្ពុជា ក្រោមការសន្យាផ្តល់ការងារដែលមានប្រាក់ខែខ្ពស់។
ចុះផ្សាយនៅថ្ងៃ៖
ស្តាប់ - ០២:១៧
នៅក្នុងសេចក្តីអំពាវនាវរបស់ប្រធានគណៈកម្មាធិការជាតិប្រយុទ្ធប្រឆាំងអំពើជួញដូរមនុស្សនៅថ្ងៃទី២៦សីហា លោក ស ខេង បានគូសបញ្ជាក់ថា គិតពីថ្ងៃទី១មករាដល់ថ្ងៃទី២០សីហាគឺមានជនរងគ្រោះ៨៦៥នាក់ ត្រូវបានអាជ្ញាធរកម្ពុជាជួយសង្គ្រោះ នៃសំណុំរឿង៨៧ករណី ដោយឃាត់ខ្លួនជនសង្ស័យ៦០នាក់។ លើសពីនេះនៅសប្តាហ៍ទី៤ខែសីហានេះអាជ្ញាធរកម្ពុជាបានបើកប្រតិបត្តិការជួយសង្គ្រោះជនរងគ្រោះសរុប២៥នាក់នៃសំណុំរឿង៧ករណី និងឃាត់ខ្លួនជនសង្ស័យ២៣នាក់។
ក្រុមជនរងគ្រោះទាំងនោះដែលសុទ្ធសឹងជាជនបរទេសមួយចំនួនធំ ត្រូវបានជនឧក្រិដ្ឋដែលមានមេក្លោងនៅប្រទេសរបស់ខ្លួន និងមានបក្សពួកនៅកម្ពុជាប្រើប្រាស់បណ្តាញទំនាក់ទំនងសង្គម ធ្វើការឆបោកឲ្យឆ្លងដែនដោយខុសច្បាប់ចូលមកម្ពុជា ក្រោមការសន្យាផ្តល់ការងារដែលមានប្រាក់ខែខ្ពស់។ ប៉ុន្តែជាក់ស្តែងជនទាំងនោះត្រូវបានចាត់ឲ្យបម្រើការងារល្បែងស៊ីសងអនឡាញខុសច្បាប់ ហើយបានក្លាយជាជនរងគ្រោះនៃអំពើជួញដូរមនុស្ស និងរត់ពន្ធមនុស្ស ដោយត្រូវបានក្រុមជនឧក្រិដ្ឋជួញដូរ ឬផ្ទេរពីក្រុមហ៊ុនមួយទៅក្រុមហ៊ុនមួយទៀត ដោយពុំមានការព្រមព្រៀងពីសាមីខ្លួនឡើយ។ ជាមួយគ្នានោះ ក៏មានករណីខ្លះទៀត ត្រូវរងអំពើហិង្សា និងការគំរាមកំហែងផ្សេងៗ ប្រសិនបើមិនអនុវត្តតាមការបង្គាប់បញ្ជាពីក្រុមឧក្រិដ្ឋជន។ នេះបើតាមគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស។
នៅចំពោះមុខនេះ លោក ស ខេង អះអាងថា កម្ពុជានៅតែបន្តប្តេជ្ញាចិត្តក្នុងការអនុវត្តន៍ច្បាប់ ដើម្បីប្រយុទ្ធប្រឆាំងអំពើឆបោក ជំរិតទារប្រាក់តាមប្រព័ន្ធបច្ចេកវិទ្យា បទល្មើសគ្រឿងញៀន និងសំអាតប្រាក់ ល្បែងស៊ីសងអនឡាញខុសច្បាប់ ព្រមជួយគាំពារជនរងគ្រោះទាំងពលរដ្ឋកម្ពុជា និងជនបរទេសផងដែរ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ