ក្រសួងការបរទេស៖ បញ្ហាជួញដូរមនុស្សនៅកម្ពុជាមិនទាន់ស្ថិតក្នុងស្ថានភាពធ្ងន់ធ្ងរទេ
អ្នកនាំពាក្យក្រសួងការបរទេសនៅថ្ងៃទី៩កញ្ញាម្សិលមិញនេះ បានចេញសេចក្តីបំភ្លឺចំពោះការលើកឡើងថា បញ្ហាជួញដូរមនុស្សនៅក្នុងប្រទេសកម្ពុជា ក្រោមរូបភាពធ្វើការងារខុសច្បាប់របស់ជនបរទេស កំពុងមានស្ថានភាពធ្ងន់ធ្ងរនិងកាន់តែអាក្រក់ទៅ។ លោក ជុំ សន្ទរី អ្នកនាំពាក្យរបស់ក្រសួងការបរទេស បានច្រានចោលចំពោះការលើកឡើងទាំងនោះ ដែលថាបានធ្វើឱ្យប៉ះពាល់ដល់មុខមាត់កម្ពុជា។
ចុះផ្សាយនៅថ្ងៃ៖
ស្តាប់ - ០២:៣៥
«ករណីជនបរទេសដែលត្រូវបានគេបោកបញ្ឆោតយកមកធ្វើការខុសច្បាប់នៅក្នុងប្រទេសកម្ពុជា កាន់តែមានស្ថានភាពធ្ងន់ធ្ងរនិងកាន់តែអាក្រក់ទៅ»។ ការលើកឡើងដូច្នោះ ចំពោះក្រសួងការបរទេសកម្ពុជាគឺជាការបំប៉ោងទំហំបញ្ហា ដែលធ្វើឱ្យប៉ះពាល់ដល់មុខមាត់កម្ពុជា ក៏ដូចជាកិច្ចខិតខំប្រឹងប្រែងរបស់អាជ្ញាធរដើម្បីជួយសង្គ្រោះក្នុងការប្រយុទ្ធប្រឆាំងយ៉ាងស្វិតស្វាញនឹងឧក្រិដ្ឋកម្មឆ្លងដែន។
នៅក្នុងសេចក្តីបំភ្លឺកម្រាស់៤ទំព័រដែលចេញផ្សាយនៅថ្ងៃទី៩ ខែកញ្ញា ឆ្នាំ២០២២ ក្រសួងការបរទេសបានយកការចុះផ្សាយរបស់ប្រព័ន្ធផ្សព្វផ្សាយមួយចំនួន ដើម្បីបង្ហាញថាស្ថានភាពជួញដូរមនុស្សនៅប្រទេសកម្ពុជាមិនអាក្រក់ដូចការលើកឡើង។ ក្នុងនោះមានដូចជា របាយការណ៍របស់ក្រសួងមហាផ្ទៃនៅត្រឹមចុងខែសីហា រកឃើញចំនួនត្រឹម១៩ករណី ក្នុងចំណោមពាក្យបណ្តឹងជាង ១០០ពាក្យបណ្តឹង ដែលពាក់ព័ន្ធនឹងការបង្ខាំងនិងជំរិតទារប្រាក់ នៅសល់ពីនោះ ជាករណីវិវាទការងាររវាងថៅកែនិងកម្មករ។
ក្រសួងការបរទេសក៏បានលើកយកការចុះផ្សាយសារព័ត៌មានម៉ាឡេស៊ី ដែលឯកអគ្គរដ្ឋទូតម៉ាឡេស៊ីប្រចាំកម្ពុជា គូសបញ្ជាក់ថា មានពលរដ្ឋម៉ាឡេស៊ីបដិសេធចាកចេញពីប្រទេសកម្ពុជាឬមិនទទួលការជួយសង្គ្រោះ ដោយសារបញ្ហាផ្ទាល់ខ្លួននៅប្រទេសស្រុកកំណើត។ មានករណីខ្លះ ត្រូវបានធ្វើការរាយការណ៍ពីឪពុកម្តាយប្រាកចាកពីការពិតថា កូនរបស់ខ្លួននៅកម្ពុជាត្រូវបានគេចាប់ពង្រត់ បង្ខំឱ្យធ្វើការជាដើម។ ល ។
នៅក្នុងសេចក្តីបំភ្លឺរបស់អ្នកនាំពាក្យក្រសួងការបរទេស បានគូសបញ្ជាក់ទៀតថា កម្ពុជាគ្មានសូម្បី១ករណី ដែលក្រុមជួញដូរមនុស្ស ធ្វើការវះយកសរីរាង្គខាងក្នុងនិងការលក់ផ្នែករាងកាយមនុស្សយកទៅលក់នៅក្នុងដែនដីកម្ពុជា។ ការលើកឡើងទាំងនោះគឺជាការបម្រើប្រយោជន៍របស់ជនរងគ្រោះក្លែងក្លាយតែប៉ុណ្ណោះ។ នេះបើតាមក្រសួងការបរទេស។
គួរជ្រាបថា ស្ថានភាពជួញដូរមនុស្សនៅកម្ពុជាកំពុងក្លាយជាប្រធានបទដ៏ក្តៅនិងស្ថិតនៅក្រោមក្រសែភ្នែកឃ្លាំមើលរបស់សហគមន៍អន្តរជាតិ បន្ទាប់ពីកម្ពុជាត្រូវបានអាមេរិកដាក់ចូលទៅក្នុងបញ្ជីខ្មៅនៃសកម្មភាពជួញដូរមនុស្សប្រចាំឆ្នាំ២០២២។ នៅកម្ពុជា ករណីជួញដូរមនុស្សដែលត្រូវបានរកឃើញកន្លងមក មានអំពើបង្ខាំង និងជួញដូរកម្លាំងពលកម្ម ភាគច្រើនកើតមាននៅតាមក្រុមហ៊ុនល្បែងស៊ីសង ឬកាស៊ីណូ ខណៈជនរងគ្រោះភាគច្រើន ជាជនជាតិវៀតណាម និងម៉ាឡេស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ