ក្រសួងទេសចរណ៍ដាក់ក្តីរំពឹងថា នឹងទទួលបានភ្ញៀវទេសចរបរទេសជាង២លាននាក់ក្នុងឆ្នាំ២០២២
ក្រសួងទេសចរណ៍បានដាក់ក្តីរំពឹងទុកថា ឆ្នាំ២០២២នេះ កម្ពុជានឹងទទួលបានភ្ញៀវទេសចរបរទេសមកកម្សាន្ត ក្នុងចន្លោះពី១លាន៥សែននាក់ ទៅ២លាននាក់។ ក្តីរំពឹងជាថ្មីនេះ គឺដោយដ្បិតថា កម្ពុជាកំពុងងើបចេញពីវិបត្តិកូវីដ១៩ និងបើកទទួលភ្ញៀវទេសចរបរទេសឡើងវិញ ដើម្បីស្តារវិស័យទេសចរណ៍ដែលរងផលប៉ះពាល់។
ចុះផ្សាយនៅថ្ងៃ៖
ស្តាប់ - ០១:៤១
លោក ថោង ខុន រដ្ឋមន្ត្រីក្រសួងទេសចរណ៍បានអះអាងថា នៅឆ្នាំ២០២២ កម្ពុជានឹងអាចទទួលបានភ្ញៀវទេសចរបរទេស ក្នុងរង្វង់ជាង២លាននាក់ មកដើរលេងកម្សាន្ត។ ការអះអាងយ៉ាងដូច្នេះ គឺព្រោះតែកំណើនភ្ញៀវទេសចរបរទេសក្នុងរយៈពេល៨ខែមកនេះ មានការកើនឡើងគួរកត់សម្គាល់។ តាមលោក ថោង ខុន គឺ ទេសចរអន្តរជាតិដែលចូលមកកម្ពុជាសរុប ៩៩៨ ២៧២នាក់ កើនឡើង ៧២០% ធៀបរយៈពេលដូចគ្នាឆ្នាំ២០២១ ដែលជាឆ្នាំនៃការរាលដាលជំងឺកូវីដ១៩។
បើតាមរដ្ឋមន្ត្រីក្រសួងទេសចរណ៍ ភាគច្រើននៃភ្ញៀវទេសចរបរទេស គឺមកពី វៀតណាម ថៃ ចិន អាមេរិក បារាំង ម៉ាឡេស៊ី ឥណ្ឌូនេស៊ី កូរ៉េ ឡាវ អង់គ្លេសជាដើម។
គួរជម្រាបថា វិស័យទេសចរណ៍ជាវិស័យរងផលប៉ះពាល់ខ្លាំងជាងគេ ដោយសារការរាតត្បាតជំងឺកូវីដ១៩ជាសកល។ សម្រាប់កម្ពុជា គឺសណ្ឋាគារ រមណីយដ្ឋាន មួយចំនួនត្រូវបង្ខំចិត្តបិទទ្វារ ព្រោះមិនមានភ្ញៀវទេសចរបរទេសមកលេងកម្សាន្ត។
ផែនការស្តារទេសចរណ៍ចុងក្រោយបង្អស់ គឺរដ្ឋាភិបាលសម្រេចជនបរទេសដែលស្នាក់នៅកម្ពុជាលើសពី ២ ឆ្នាំ អាចស្នើសុំបណ្ណចូលទស្សនារមណីយដ្ឋានអង្គរ និងប្រាសាទកោះកែររយៈពេលមួយឆ្នាំម្តង ដោយមិនបង់ថ្លៃ។
គម្រោងនេះ ត្រូវបានអ្នកជំនាញក្នុងវិស័យទេសចរណ៍ យល់ថា នឹងផ្ដល់ផលចំណេញដល់វិស័យទេសចរណ៍ ពាណិជ្ជកម្ម និងការផ្សព្វផ្សាយកម្ពុជាទៅពិភពលោក។ លោក ហូ វណ្ឌី ទីប្រឹក្សាសមាគមទីភ្នាក់ងារទេសចរណ៍កម្ពុជា អះអាងថា ជនបរទេសដែលស្នាក់នៅកម្ពុជាលើសពី ២ ឆ្នាំទាំងនោះ នឹងនាំសាច់ញាតិ គ្រួសារ មិត្តភក្តិរបស់ពួកគេ មកកម្សាន្តនៅកម្ពុជា ដែលនឹងផ្ដល់ចំណូលដល់ពលរដ្ឋកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ