កម្ពុជាប្រកាសបើកក្លិបសេដ្ឋកិច្ចអាស៊ាន
លោកនាយករដ្ឋមន្ត្រី ហ៊ុន សែន នៅថ្ងៃទី ១២ ខែកញ្ញានេះ ប្រកាសបើកក្លិបសេដ្ឋកិច្ចអាស៊ាន ដើម្បីធ្វើឱ្យសមាហរណកម្មសេដ្ឋកិច្ចអាស៊ានកាន់តែជិតស្និទ្ធ។ ការប្រកាសនេះធ្វើឡើង ក្នុងវេទិកាភាពជាអ្នកដឹកនាំអាស៊ាន ឆ្នាំ២០២២ នៅសណ្ឋាគារ ហៃយ៉ាត់ភ្នំពេញ។ ការបើកក្លិបសេដ្ឋកិច្ចអាស៊ានដូច្នេះ ត្រូវបានអ្នកជំនាញសេដ្ឋកិច្ចមើលឃើញថា នឹងជួយលើកកម្ពស់សេដ្ឋកិច្ចប្រជាជន និងប្រទេសក្នុងតំបន់អាស៊ាន។
ចុះផ្សាយនៅថ្ងៃ៖
ស្តាប់ - ០១:៣៣
ថ្លែងនៅក្នុងវេទិកាភាពជាអ្នកដឹកនាំ និងភាពជាដៃគូអាស៊ានឆ្នាំ២០២២ លោកនាយករដ្ឋមន្ត្រី ហ៊ុន សែន ដែលជាប្រធានអាស៊ានប្ដូរវេនអាស៊ាន បានប្រកាសបើកក្លិបសេដ្ឋកិច្ចអាស៊ានជាផ្លូវការ ដើម្បីលើកកម្ពស់សមាហរណកម្មសេដ្ឋកិច្ចអាស៊ានឱ្យកាន់តែជិតស្និទ្ធ។
លោកនាយករដ្ឋមន្ត្រីបន្តថា ការលើកកម្ពស់សមាហរណកម្មសេដ្ឋកិច្ចអាស៊ានឱ្យកាន់តែជិតស្និទ្ធនេះ នឹងធ្វើឡើងតាមរយៈ ការចូលរួមតាមដាន វាយតម្លៃ និងផ្តល់អនុសាសន៍ឯករាជ្យ លើការអនុវត្តកិច្ចព្រមព្រៀងទាំងឡាយ ដែលថ្នាក់ដឹកនាំអាស៊ានបានសម្រេច ជាពិសេសលើកិច្ចព្រមព្រៀងពាណិជ្ជកម្មសេរី កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) និងកិច្ចព្រមព្រៀង ដទៃពាក់ព័ន្ធនឹងសរសរស្តម្ភសេដ្ឋកិច្ច។
ជុំវិញការប្រកាសបើកក្លិបសេដ្ឋកិច្ចអាស៊ាននេះ លោក បណ្ឌិត ហុង វណ្ណៈ អ្នកជំនាញសេដ្ឋកិច្ចនៃវិទ្យាស្ថានទំនាក់ទំនងអន្តរជាតិនៃរាជបណ្ឌិតសភាកម្ពុជា យល់ឃើញថា ក្លិបសេដ្ឋកិច្ចអាស៊ាន នឹងផ្ដល់ឱកាសដល់ធូរជនក្នុងតំបន់អាស៊ាន និងបណ្ដាប្រទេសផ្សេងៗទៀត ដែលជម្រុញឱ្យមាន នវានុវត្តន៍នៃធូរកិច្ចក្នុងប្រទេសនីមួយៗក្នុងតំបន់អាស៊ាន និងពិភពលោក បើក្លិបសេដ្ឋកិច្ចអាស៊ាននេះសម្រេចបានដូចការគ្រងទុក។
អ្នកជំនាញសេដ្ឋកិច្ចរូបនេះក៏បានជម្រុញឱ្យ អ្នកដែលពាក់ព័ន្ធទាំងឡាយ គួរតែគាំទ្រ និងបង្កើតយន្ដការដើម្បីអនុវត្តឱ្យក្លាយជាសកម្មភាពជាក់ស្ដែង ដើម្បីជាប្រយោនជ៍សម្រាប់ប្រជាជន និងសេដ្ឋកិច្ចនៃប្រទេសក្នុងតំបន់។
គួរជម្រាបជូនថា កាលពីពេលថ្មីៗនេះ លោក តាន់ ស្រ៊ី មីឆែល យ៉េវ (Tan Sri Michael Yeoh) ប្រធានវិទ្យាស្ថានយុទ្ធសាស្ត្រ KSI បានមកកាន់កម្ពុជា ដើម្បីសុំការគាំទ្រ និងអនុញ្ញាតចាប់ផ្ដើមដំណើរការក្លិបសេដ្ឋកិច្ចអាស៊ាន ដែលមានទិសដៅជាចម្បង គឺចូលរួមចំណែកជួយផ្ដល់ធាតុចូលដល់អាស៊ាន ជាស្ពានរវាងអាស៊ាន និងស្ថាប័នវិស័យផ្សេងៗ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ