ពិធីភ្ជុំបិណ្ឌ៖រដ្ឋាភិបាលបន្ថែមមធ្យោបាយធ្វើដំណើរតាមផ្លូវដែកសម្រាប់ដឹកពលរដ្ឋដោយឥតគិតថ្លៃ
រដ្ឋាភិបាលកម្ពុជាត្រៀមមធ្យោបាយធ្វើដំណើរចំនួន២ បែប ទាំងផ្លូវថ្នល់ និងផ្លូវដែក ដើម្បីដឹកជញ្ជូនប្រជាពលរដ្ឋទៅស្រុកកំណើតក្នុងពិធីបុណ្យភ្ជុំពេលខាងមុខនេះ ដោយមិនយកកម្រៃ។ ការត្រៀមមធ្យោបាយដឹកជញ្ជូនប្រជាពលរដ្ឋនេះ ត្រូវបានរដ្ឋាភិបាល អះអាងថា ដើម្បីជួយសម្រួលបន្ទុកចំណាយរបស់ប្រជាពលរដ្ឋ ខណៈសហជីព យល់ថា ការអំពាវនាវកុំឲ្យដំឡើងថ្លៃដឹកជញ្ជូន ប្រហែលមិនមានប្រសិទ្ធិភាព។
ចុះផ្សាយនៅថ្ងៃ៖
ស្តាប់ - ០២:០២
សេចក្តីសម្រេចចុងក្រោយមួយរបស់ក្រសួងសាធារណការ និងដឹកជញ្ជូន នៅថ្ងៃទី១៦កញ្ញា គឺរដ្ឋាភិបាលនឹងត្រៀមរថភ្លើងចំនួន២ខ្សែដើម្បីជូនប្រជាពលរដ្ឋធ្វើដំណើរទៅស្រុកកំណើតដោយមិនគិតកម្រៃ។ មានរយៈពេល៤ថ្ងៃ ពីថ្ងៃទី២៣ដល់ថ្ងៃទី២៦កញ្ញា ក្រសួងសាធារណការបានឲ្យដឹងថា គោលដៅខ្សែទី១ គឺភ្នំពេញទៅកាន់ខេត្តកំពង់ឆ្នាំង ពោធិ៍សាត់ និងបាត់ដំបង។ រីឯគោលដៅខ្សែទី២ គឺភ្នំពេញទៅកាន់ខេត្តតាកែវ កំពត និងព្រះសីហនុ។
បើតាមសេចក្តីជូនដំណឹង គឺសំបុត្រធ្វើដំណើរនឹងចែកជូននៅតាមស្ថានីយ៍រថភ្លើងភ្នំពេញ និងតាមបណ្តាខេត្ត រយៈពេល២ថ្ងៃ មុនថ្ងៃចេញដំណើរ។ ក្រសួងសាធារណការ និងដឹកជញ្ជូន អះអាងថា ការសម្រេចនេះគឺដើម្បីជួយសម្រួលបន្ទុកចំណាយរបស់ប្រជាពលរដ្ឋ កម្មករ កម្មការិនី ដែលនឹងធ្វើដំណើរទៅស្រុកក្នុងពិធីបុណ្យភ្ជុំបិណ្ឌខាងមុខ។
ក្រៅពីការត្រៀមមធ្យោបាយធ្វើដំណើរតាមផ្លូវដែក សាលាក្រុងភ្នំពេញកាលពីថ្ងៃទី១២កញ្ញា ក៏បានត្រៀមរថយន្តក្រុងជិត២០០គ្រឿង ដើម្បីជួយសម្រួលមធ្យោបាយធ្វើដំណើរបស់ប្រជាពលរដ្ឋ។ មានរថយន្តចំនួន១៧៥គ្រឿង ត្រូវបានរដ្ឋាបាលរាជធានីភ្នំពេញ ត្រៀមដើម្បីដឹកប្រជាពលរដ្ឋ។ ក្នុងនោះ៥៥គ្រឿងសម្រាប់ដឹកប្រជាពលរដ្ឋក្នុងក្រុងភ្នំពេញ និង១២០គ្រឿងផ្សេងទៀតត្រៀមដឹកប្រជាពលរដ្ឋទៅតាមបណ្តាខេត្ត។ តាមបណ្តាខេត្ត ដែលរួមមាន កណ្តាល ព្រៃវែង ស្វាយរៀង តាកែវ កំពត កែប កំពង់ស្ពឺ ព្រះសីហនុ កំពង់ឆ្នាំង ពោធិ៍សាត់ បាត់ដំបង បន្ទាយមានជ័យ កំពង់ធំ សៀមរាប កំពង់ចាម ត្បូងឃ្មុំ ក្រចេះ និងស្ទឹងត្រែង។
សាលាក្រុងភ្នំពេញក៏បានអំពាវនាវដល់ម្ចាស់ក្រុមហ៊ុន និងម្ចាស់រថយន្តដឹកជញ្ជូនអ្នកដំណើរទាំងអស់ឱ្យរក្សាតម្លៃដឹកជញ្ជូននៅដដែល ដោយពុំតម្លើងថ្លៃ ក្នុងឱកាសពិធីបុណ្យភ្ជុំបិណ្ឌខាងមុខនេះ។
ការសម្រេចរបស់រដ្ឋាភិបាលនេះ ត្រូវបានសហជីពសម្តែងការគាំទ្រ ព្រោះអាចជួយសម្រាលបន្ទុកចំណាយការធ្វើដំណើររបស់កម្មករ។ យ៉ាងណាមិញ លោក អាត់ ធន់ ប្រធានសហភាពការងារកម្ពុជា យល់ថា ការអំពាវនាវរបស់រដ្ឋាភិបាលកុំឲ្យមានការដំឡើងថ្លៃដឹកជញ្ជូន ប្រហែលមិនមានប្រសិទ្ធិភាព។ មិនមានប្រសិទ្ធិភាពដោយលោកយល់ថា រដ្ឋាភិបាលគួរតែទម្លាក់ថ្លៃប្រេង ឬបង្កើនមធ្យោបាយដឹកជញ្ជូនដោយឥតគិតថ្លៃ ទើបមានប្រសិទ្ធិភាព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ